Read Tedim Chin HOSEA 11 Bible Online

HOSEA 11 - Tedim Chin bible

HOSEA 11

¹Israel a neu lai-in ka it mahmah a, Egypt gam panin ka tapa ka samkhia hi.

²Ahi zongin limsap semsem leng gamla pai semsem hi. Ka mite in Baal tungah biakna pia uh a, milim biakna-in paknamtui a hal uh hi.

³Ahi zongin Israel mite lam a paitheihna ding a hilh pa keimah ka hi a, ka ang sungah amaute ka tawi hi. Ahi zongin amaute ka don lamtak phawkkha lo uh hi.

⁴Amaute, itna le hehpihna tawh ka len a, domto-in ka biang ciangah ka tawi a, awn sukin an ka pia hi.

⁵Tua bang hinapi, kei lamah amaute hong kihei nuam lo uh ahih manin Egypt gamah paikik ding uh a, Assiria mite, amau’ kumpi hi ding hi.

⁶Galte in a khuapi sung uh luhin, a khuapi kulhkongpi zawlte uh suktansak ding hi. Ka mite in thu hoih lo zuikha uh ahih manin gal in susiamang ding hi.

⁷Ka mite in kei kiang panin pial ding ngaihsun tawntung uh ahih manin amaute in kolbulhna thuak ding uh a, kuamah in a kol sutsak lo ding hi.

⁸Israel mite aw, bangci-a hong nusia thei ding a, bangci-a hong paidak thei ding ka hi hiam? Admah khua ka suksiat bangin kong susia nuam kei a, Zeboiim khua ka bawl bangin kong bawl nuam kei hi. Note hong khasiat mahmah ka hih manin tua banga hih ding ka lungsimah om lo hi.

⁹Ka heh manin gim kong pia kei ding a, no Israel-te kong susia kei ding hi. Bang hang hiam cih leh keimah, mihing hi loin, Pasian ka hi hi. Kei a Siangtho Pa, note tawh kong omkhawm a, a hehsa-in note kiangah kong pai kei ding hi.

¹⁰Humpinelkai bangin a galte uh ka hawksan gawp ding a, tua ciangin ka mite in kei hong zui ding uh hi. Nitumna lam gam panin kei kiangah hong nawhtai ding uh hi.

¹¹Egypt gam panin vasa bangin lawptakin hong leeng ding uh a, Assiria gam panin vakhu bangin hong leeng ding uh hi. Tua ciangin keimah in amaute’ inn ngeisa-ah ka tunpih kik ding hi, TOPA in ci hi.

¹²TOPA in hih bangin ci hi: Israel mite in zuauna le khemna bekbek tawh kei hong khuhcip uh hi. Judah mite in zong a citak a Siangtho Pa keimah hong langpang lai uh hi.