Read Tedim Chin HOSEA 12 Bible Online

HOSEA 12 - Tedim Chin bible

HOSEA 12

¹Israel mite, a nung kawikawi huih tawh kibang a, sun thapai a a nasepna uh a mawkna ahi hi. Zuauna le siatna lamsang bekbek khangsak uh hi. Assiria-te tawh kipawlna bawl uh a, Egypt-te tawh kizopna nei uh hi.

²TOPA in Israel mite a mawhsakna ding a thu om hi. Jakob a gamtatna tawh kizui-in gim pia ding a, ama gamtatna bangin thukkik ding hi.

³Jakob in a nu sung nangawn pek panin a sanggampa sawk pah a, a khangham ciangin zong Pasian tawh kilai hi.

⁴Vantung mi tawh kilai-in a lel hi. Tua ciangin Jakob zong kapin ama tung panin hehpihna a ngen hi. Pasian in Bethel munah amah mu-in a hopih hi.

⁵Ama min pen TOPA, Vanglian TOPA Pasian ahi hi.

⁶Pasian’ huhna tawh note khempeuh kiheikik unla, thuman thutangin gamta un. Pasian muang tawntung un.

⁷Sumbukte in tawitehna man lo zang uh a, amaute in mi khem ding nuam a sa uh hi.

⁸Israel mite in, “Tu-in ka hau uh a, kote a dingin neihsa tampi ka ngah uh hi,” ci uh hi. Ahi zongin a hauhnateng un a mawhnateng uh loh zo lo hi.

⁹Egypt gamah na omlai pek uh a kipanin kei pen note’ TOPA Pasian ka hi a, ahi zongin tu-in tanglai hun bangin puanbuk sungah note kong tengsakkik ding hi.

¹⁰Kamsangte tungah thu ka gen hi. Maangmuhna a banbanin pia-in, kamsangte tungah thugentehna tawh thu a gen pa zong keimah ka hi hi.

¹¹Gilead gamah milim biakna om a, tuate a kimanna om lo hi. Gilgal gamah bawngtal tawh bia uh a, lokhote in a suang deih lohteng uh a phualphualin a cian kawikawi tawh kibangin, a biakna taute uh bangmahin kimang lo ding hi.

¹²Aram gamah Jakob tai a, Israel in tua lai-ah zi khat thalawhin na sem a, zi thalawhna-in tuu a cing hi.

¹³TOPA in kamsang khat zangin Egypt panin Israel-te paikhiatpih a, kamsang khat’ nasepna tawh amaute suakta-in a nungta uh hi.

¹⁴Heh mahmah theih nadingin Israel mite gamta uh ahih manin amaute’ TOPA in amau’ tung mahah a mawhna uh tungsak ding a, amaute’ mawhna mah a thuaksak ding hi.