Read Tedim Chin HOSEA 4 Bible Online

HOSEA 4 - Tedim Chin bible

HOSEA 4

¹Israel mite aw, TOPA’ thugen ngai un. Hih gam sungah a teng mite tungah TOPA lungkim lo ahih manin hih bangin mawhsak hi: Hih gam sungah cihtakna ahi a, itna ahi zongin om lo a, mite in kei pen Pasian-in hong ngaihsun lo uh hi.

²Mite in thuciamna bawl napi-in a thuciamte uh palsat uh hi. Zuau genin, mi thatin, guta-in, nulepa mawhna bawl uh hi. A sia khat khit a sia khat a banbanin gamta-in a mawhna uh behlaplap uh hi.

³Tua ahih ciangin leitang keugaw-in a tunga teng khempeuh si ding a, leitung a om gamsa khempeuh le huihlaka leeng vasa khempeuh tawh si mang ding uh a, tuipi sunga om ngasate nangawn si mang ding hi.

⁴Kuamah in mihonte mawhsak kei hen la, mihonte taii kei hen. Kei’ lungkim lohna no siampite’ tung ahi hi.

⁵A sun a zan cih om loin na nasepnate uh a kimanna mel om lo hi; kamsangte zong note bangmah hi lel hi. Na nu uh Israel ka susia ding hi.

⁶Ka mite in kei hong phawk lo uh ahih manin ka susia ding hi. No siampite in kei hong phawknuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi.

⁷Siampi tam semsem leh kei tungah a khialhna uh tam semsem hi. Amau’ minthanna pen mindaina ka suaksak ding hi.

⁸Ka mite’ mawhna amaute in hauhlawh uh a, ka mite a mawh semsem ding uh a ut uh hi.

⁹Mite’ thuak dingin a kilawm gimna mah siampite in zong thuak ding uh a, amau’ gamtatna bangin gim pia-in amau’ siatna bangin ka thukkik ding hi.

¹⁰Amaute, pasian dangte a bia dingin kei kiang panin kiheikhia uh ahih manin biakpiakna a sa tanhte uh a nek hangun a gil uh vah tuan lo ding hi. Mi punna ding deihna-in biakpiakna-in numei tawh mawhna a bawl uh hangin mi pung tuan lo ding hi.

¹¹Leenggahzu in ka mite’ thungaihsut theihna beisak hi.

¹²Ka mite in aisanin singthem peuh thudotin nei uh a, amau’ thu theihnopte, ciangkang peuh in gen tazen hi. Amaute in kei hong taisan uh a, a paktat numei bangin pasian dangte a zuan uh hi.

¹³Amaute in mualsangte dawna biakna munte-ah biakna pia uh a, a nuai liim hoih ahih manin mual neute tungah a po tawsaw kung, poplar kung, le terebinth kungte nuai-ah paknamtui halin a bia uh hi. Tua thu hangin na tanute uh numei paktat suak uh a, na mote un midang tawh mawhna a bawl uh hi.

¹⁴Na tanute uh a paktat manin gim ka pia kei ding a, na mote uh midang tawh a mawh manin zong gim ka pia tuan kei ding hi; bang hang hiam cih leh note mahmah numei paktatte tawh na mawh uh a, biakinn numeite tawh nulepa mawhna biakna na bawl uh hi. Paunak-ah, “Thuhoih phawktheihna a nei lo mite in siatna thuak ding hi,” kici hi.

¹⁵Kei tungah no Israel mite citak loin nong taisan hangun, note bangin Judah mite khial kei tahen. Gilgal-ah ahi a, Bethaven-ah ahi zongin pai kei unla, tua lai munah TOPA’ min tawh na kiciam kei un.

¹⁶A kizualsak zo lo bawngla bangin Israel mite phengphi uh ahih manin, lonona munah tuunote anvak bangin amaute bangci vak ding ka hi hiam?

¹⁷Israel mite, milim biak uuklua uh a, cihtheih hi lo hi.

¹⁸Amaute, zukham honpi hi uh a, nulepa mawhna a bawlbawl uh hi. Minphat ding sangin minsiat ding utzaw uh hi.

¹⁹Huihpi nung in a mutkhiat bangin amaute a phiatkhiamang ding lungsim a nei uh hi. Amau’ biak pasian-te in amaute huh lo ding hi.