Read Tedim Chin HOSEA 6 Bible Online

HOSEA 6 - Tedim Chin bible

HOSEA 6

¹Amaute in, “Hong pai un, TOPA kiangah ciahkik ni; amah in eite hong balgawp hangin hong damsakkik ding a, eite hong liamsak hangin i liammate hong tunsakkik ding hi lo ahi hiam?

²Ni nih sungin eite hong thahatsak ding a, ni thum sungin i ngei hong bangsak ding hi. Tua ciangin amah tawh i kikhawl ding hi.

³TOPA i theihzawh nadingin hanciam ni. Zingsang sialin pel loin khua a vak mah bangin pel loin eite kiangah amah hong pai ding a, lei a kawtsak khuapi guah pel loin hong zuk bangin eite kiangah amah hong pai hamtang ding hi,” a ci ding uh hi.

⁴Israel le Judah aw, note bang hong cih thei nawn ding ka hi hiam? Note’ hong itna pen zingsang meiilum bangin thengpak a, a mangthangpak daitui tawh kibang lel hi.

⁵Tua ahih manin note a hong thuhilh ding le note a hong taii dingin ka kamsangte kong sawl hi. No ka mite’ gamtat ding ka deih zia kitel sinsen hi.

⁶Keima deih pen nong it tawntung ding uh hizaw a, gan tawh nong biakna uh ka deih pen hi lo zaw hi. Gan tawh nong biakna uh sangin kei nong theih ding uh ka deihzaw hi.

⁷Ahi zongin ka ciamna gam a tun uh ciangin amaute in Adam khua-ah ka thuciamna palsat uh a, kei tungah hong thuman lo uh hi.

⁸Gilead pen migilo hontangte’ omna khuapi hi a, mi thahna sisan luang tawh amau’ sul a kidim hi.

⁹Zawhthawh thu-in mi’ na a sut dingin a pangsim mite bangin siampite gamta uh a, biakna a pia dingin Shekhem khua-ah a pai mite nangawn, lamkalah a that uh hi. Amau gamtatna siahuai mahmah hi.

¹⁰Israel mite lakah siatna lianpi khat ka mu hi. Milim biakna tawh amaute kininsak uh hi.

¹¹No Judah mite zong gim kong piak ding hun kiseh khinzo hi. Ka mihingte a ngei uh bangsakkik ning,