Read Tedim Chin HOSEA 7 Bible Online

HOSEA 7 - Tedim Chin bible

HOSEA 7

¹Israel-te a ci uh damsakkik ning, ci-in ka ngaihsut ciangin, amau’ mawhna le amau’ siatna bekbek kimu thei hi. Amaute in mi khemin, inn luhin na gu uh a, konglak nangawnah mi’ na sut uh hi.

²Amau’ gamtatsiatna khempeuh ka phawk lamtak amaute in ngaihsutin neikha lo uh hi. Amau’ mawhna in amaute gakcip a, ka muhna mahmahah om gige uh hi.

³Amaute in a zuaupiteng uh tawh kumpipa lungdamsak uh a, a khemnateng uh tawh a uliante uh nuamsak uh hi.

⁴Amaute zuautatin citak lo uh hi. Amaute pen, mohbawl pa in a anlom meek a pawm mateng, moh emna meikhuk sunga a tawhsa, mut loh seem lohin a koih phot mei tawh kibang uh hi.

⁵Kumpipa in pawi a Sbawl ni-in amaute in uliante zu khamsakin haisak uh a, amau’ ngimna a thei lopi-in kumpipa zong tua lakah hong kihel hi.

⁶Tua bangin amau’ sawmsimna mei bangin hong kuang hi. Zanthapai-in a hehna uh mei bangin khukhu a, zingsangin mei bangin hong kuangkhia hi.

⁷A hehluatna uh tawh amau a ukte a thatlum uh hi. A kumpite uh khat khit khat a banbanin kithat a, ahi zongin kuamah in kei kiangah huhna hong ngen lo uh hi.

⁸Israel, a kiima om minam dangte tawh kipawlin tua mite muanin nei a, a kihei lo moh ki-em tawh kibang uh hi.

⁹A kipawlpih minam dangte in a thahatnateng uh teeptum a, ahi zongin a kiteeptumlam phawkkha lo uh hi. A lu tung uha om a sam uh a kanlam nangawn phawkkha lo uh hi.

¹⁰Israel mite’ kiphatsakna in amau’ langkhatah teci pang hi. Ahi zongin hih thu khempeuhah zong, amau’ TOPA Pasian ahi kei’ lamah hong kihei tuan lo uh a, kei hong zong lo uh hi.

¹¹Israel pen a khemnop kawl vakhu hai tawh kibang hi. Egypt-te kiangah huhna va ngen masa uh a, tua ciangin Assiria-te kiangah a va tai uh hi.

¹²Amaute a va pai laitakun ka ngen tawh amaute ka na siah ding a, vasa mat bangin ka ngen tawh amaute ka man ding hi. Amau’ gamtatsiatna hangin gim ka pia ding hi.

¹³Amaute in kei hong taisanin hong lehdo uh ahih manin gimna ngahin siatna tuak ding uh hi. Amaute ka hotkhiat nop hangin amaute in kei hong lehgen zawsop uh hi.

¹⁴Amaute in lungsim takpi tawh kei tungah huhna hong ngen lo uh a, dawibia mite bang lelin a gamta uh hi. An le leenggahzu a nget uh ciangin zong lawkite bangin a ngen uh hi. Amaute in kei hong lehdo uh hi.

¹⁵Amaute khoi-in a thahat mite suaksak napi-in, amaute in kei hong lehsawm zawsop uh hi.

¹⁶Amaute, kei’ lam hong nga loin, Baal pasian’ lam nga tawntung uh hi. A khakna ding san a kha thei lo thalpeu tel tawh kibang uh hi. Amau’ kiphatsak pauna hangun a uliante uh namsau-in si ding uh a, Egypt mite in amaute nuihsan lel ding uh hi.