Read Tedim Chin GAMLAK VAKNA 10 Bible Online

GAMLAK VAKNA 10 - Tedim Chin bible

GAMLAK VAKNA 10

¹TOPA in Moses kiangah,

²“Ngun peengkul nih bawl in. Tuate na bawl ciangin na seek ding a, mihonte khop nading le giahphual nusiat nadingin na zang ding hi.

³A nihin a kitum ciangin kikhopna bukkong nangma kiangah mihon khempeuh hong kikhawm ding uh hi.

⁴Ahih hangin khat bek a kitum leh Israel minamte’ lutang ahi makaite nangma kiangah hong kikhawm ding uh hi.

⁵Dinkhiat nading zaksakna na tum ciangin nisuahna lampang a giahphual-ate ding khia masa ding uh hi.

⁶A nih veina na tum ciangin leitaw lampang a giahphual-ate ding khia ding hi. Amaute a dinkhiat ding peuhmah ciangun zaksakna kitum ding hi.

⁷Mihonte a kikaihkhop ding ciangin na tum ding a, ahih hangin a gindan na kibangsak kei ding hi.

⁸Aaron’ tapa siampite in peengkulte tum ding uh hi. Peengkul zatna pen na khang tawntungun note a dingin a kip den ngeina khat hi ding hi.

⁹Na gam sung uhah, no hong nengniam na galte uh tawh na kido ding uh ciangin, TOPA na Pasian uh mai-ah note hong kiphawk nadingin peengkulte tawh pataukohna aw na gingsak ding uh a, na langte panun note hong kihon ding hi.

¹⁰Na lungdam hun uh, a kiseh na pawi hunte uh, le kha kipat hunte-in, note in na meihal biaknate uh le thunuama na biakpiaknate uhah zong peengkulte na tum ding uh hi. Tuate pen na Pasian uh mai-ah phawkna-in kimang ding hi; kei pen TOPA na Pasian uh ka hi hi,” a ci hi.

¹¹A kum nihna, a kha nihna, a ni sawmnih ni-in thuciamna biakbuk tung san panin meii kilakhia to a,

¹²Sinai sehnel gam panin Israel mite phual khat pan phual khatah ding khia uh a, Paran gamlakah meii a khawl hi.

¹³Moses’ tungtawnin TOPA’ thupiakna tawh khualzin cilna kipan uh hi.

¹⁴Judah mite’ giahphual dialkhai a neite a pawlpawlin ding khia masa uh hi. Tua mihonte, Amminadab’ tapa Nahshon in uk hi.

¹⁵Issakhar minam honte, Zuar’ tapa Nethanel in uk hi.

¹⁶Zebulun minam honte, Helon’ tapa Eliab in uk hi.

¹⁷Biakbuk a kiphel khit ciangin, biakbuk a pua Gershon mite le Merari mite ding khia uh hi.

¹⁸A zomah Reuben’ giahphual dialkhai a neite a pawlpawlin ding khia uh hi. Tua mihonte, Shedeur’ tapa Elizur in uk hi.

¹⁹Simeon minam honpite, Zurishaddai’ tapa Shelumiel in uk hi.

²⁰Gad minam honpite, Deuel’ tapa Eliasaf in uk hi.

²¹Tua ciangin a siangtho nate pua-in Kohath mite ding khia uh a, amaute a tun ma-in biakbuk na kidingsak khin hi.

²²A zomah Efraim mite’ giahphual dialkhai a neite a pawlpawlin ding khia uh hi. Tua mihonte, Ammihud’ tapa Elishama in uk hi.

²³Manasseh minam honte, Pedahzur’ tapa Gamaliel in uk hi.

²⁴Benjamin minam honte, Gideoni tapa Abidan in uk hi.

²⁵Tua ciangin adang khempeuh’ nungdalin Dan mite’ giahphual dialkhai a neite a pawlpawlin ding khia uh hi. Tua mihonte, Ammishaddai’ tapa Ahiezer in uk hi.

²⁶Asher minam honte, Okran’ tapa Pagiel in uk hi.

²⁷Naftali minam honte, Enan’ tapa Ahira in uk hi.

²⁸Hih pen Israel mite a dinkhiat uh ciangin amau’ mihonte tawh kizui-in a paina zia uh ahi hi.

²⁹Moses in ama zi’ sanggampa ahi, Midian mi Reuel’ tapa Hobab kiangah, “TOPA in, ‘Note’ tungah kong pia ding hi,’ a cihna mun zuanin a ding khia ding ka hi uh hi. Ko hong zui in; nang kong limbawl ding uh hi. Bang hang hiam cih leh TOPA in Israel-te hong limbawl ding hong ciam hi,” a ci hi.

³⁰Ahih hangin amah in, “Kong zui kei ding hi. Ka leitang le ka behte kiangah ka pai ding hi,” a ci hi.

³¹Moses in, “Kote hong nusia kei in, kong thum hi; nangmah in gamlakah giahphual sat nading zia thei na hih manin, kote a dingin lamhilh nong hi ding hi.

³²Kote hong zui lecin, TOPA in kote hong limbawl ding bangbangin nang zong kong limbawl ding uh hi,” a ci hi.

³³Tua ciangin TOPA’ mual panin amaute dingkhia-in ni thum lam a pai uh hi. A tawlngak nading mun uh a zonsak dingin TOPA’ Thuciamna Singkuang, amau’ mai ni thum lam na pai khol hi.

³⁴Giahphual panin a dinkhiat peuhmah uh ciangin sunin amaute’ tungah TOPA’ meii a om hi.

³⁵Singkuang a dinkhiat peuhmah ciangin Moses in, “TOPA aw, dingin na galte kithehthangsak inla, nang hong mudahte na mai-ah taisak in,” a ci hi.

³⁶A khawl ciangin, “TOPA aw, Israel tul sawm tampite’ kiangah hong ciahkik in,” a ci hi.