Read Tedim Chin GAMLAK VAKNA 11 Bible Online

GAMLAK VAKNA 11 - Tedim Chin bible

GAMLAK VAKNA 11

¹Mihonte in amau’ tuahsiatna hangin TOPA’ zakin a phun uh hi. TOPA in tua thu a zak ciangin heh mahmah a, amaute’ lakah TOPA’ mei kuangin, giahphual nawl kimkhat kangtum hi.

²Tua ciangin Moses’ zak dingin mite kiko uh hi. Moses in TOPA’ tungah thu ngen a, mei a mit hi.

³Tua ahih manin tua mun pen Taberah kici hi. Bang hang hiam cih leh amaute’ lakah TOPA’ mei a kuang hi.

⁴Tu-in amaute’ lakah a om gamdang mite in anlim a lunggulh mahmah uh hi. Israel mite zong kap kik uh a, “Sa nek ding nei hi leeng maw!

⁵Egypt-ah man pia loin i nek ngasate, tangmaite, dawnpawlte, lo-uih neute, lo-uih sante, le lo-uih kangte i phawkphawk hi.

⁶Ahih hangin tu-in i tha bei ta a, hih manna simloh bangmah dang om peuhmah lo hi,” a ci uh hi.

⁷Manna pen nannan tang tawh kibang a, a mel pen bedolak singnai tawh kibang hi.

⁸Mite pai kawikawi-in khawm uh a, an gawina tawh gawi-in, tua ahih kei leh sum sungah su-in, beelin huan uh a, mohin a bawl uh hi. A limna pen sathau tawh a kibawl moh ki-em tawh kibang hi.

⁹Zanin giahphual tungah daitui a kiat ciangin manna tawh kia khawm hi.

¹⁰Mite a innkuankuanun a milipin a puanbuk kongah a kahna uh Moses in a za hi. TOPA nak hehlua mahmah ahih manin Moses lungkim lo hi.

¹¹Moses in TOPA’ kiangah, “Bang hangin na nasempa hong hici bawlsiat na hi hiam? Bang hangin na maipha hong musak loin, hih mi khempeuhte’ tavuan kei’ tungah hong suan na hi hiam?

¹²Keimah in hih mite khempeuh paii ka hi hiam? Nangmah in kei’ kiangah, ‘Nau cingnu in nawine naungek a puak bangin, nangmah in amau’ pate piak dingin ka ciam leitangah amaute ang puakin paipih in,’ nong cih theih nadingin kei’ sunga piang ahi uh hiam?

¹³Hih mite khempeuh piak ding koi-ah sa ngah ding ka hi hiam? Bang hang hiam cih leh ka mai-ah amaute kapin, ‘Ka nek ding uh sa hong pia in,’ hong ci uh hi.

¹⁴Kei guak in hih mite khempeuh ka sizo kei a, kei a dingin tavuan lianlua hi.

¹⁵Hih bangin kei hong bawl ding na hih leh, ka gentheihna ka kimuh loh nadingin nong hehpih zawh leh, thakhatin hong thatzaw in,” a ci hi.

¹⁶TOPA in Moses kiangah, “Mite’ upa le ulian hi ci-in na theih, Israel upate’ sung panin mi sawmsagih hong khopsakin, kikhopna bukah amaute paipih inla, tua lai-ah nang tawh dingkhawmsak in.

¹⁷Keimah hong paisukin tua munah nang tawh i kiho ding a, keimah in nang’ sunga om kha pawlkhat la-in amaute’ sungah ka guang ding hi. Nang guak in na puak loh nadingin amaute in mite’ tavuan hong puakpih ding uh hi.

¹⁸Mite tungah, ‘Zing cianga dingin note ki-ap pha un, sa na ne ding uh hi; bang hang hiam cih leh TOPA’ zakin na kap uh a, “Sa nek ding kua in hong pia ding ahi hiam? Bang hang hiam cih leh Egypt gamah nuam i sa hi,” na ci uh hi. Tua ahih ciangin note’ tungah TOPA in sa hong pia ding a, note in sa na ne ding uh hi.

¹⁹Note in ni khat sung, ahih kei leh ni nih sung, ahih kei leh ni nga sung, ahih kei leh ni sawm sung, ahih kei leh ni sawmnih sung bek ne loin,

²⁰na ikkhiat dong uh le na kih dong matengun kha khat sung tawntung sa na ne ding uh hi. Bang hang hiam cih leh note’ lakah a om TOPA nialin a mai-ah na kap uh a, “Bang hangin Egypt panin paikhia ihi hiam?” na ci uh hi,’ ci in,” a ci hi.

²¹Ahih hangin Moses in, “Kei tawh a kisim khawm mi tul zaguk tak om hi. Nangmah in, ‘Kha khat sung tawntung a nek dingun amaute sa pia ning!’ na ci hi.

²²Amaute’ khamzah dingin tuuhonte le bawnghonte amau a dingin kigozo ding ahi hiam? Tua ahih kei leh tuipi ngasate khempeuh amau’ khamzah ding kimanzo ding ahi hiam?” a ci hi.

²³TOPA in Moses kiangah, “TOPA’ hih theih ding zah kiciangtan sa na hi hiam? Ka thugen a manin hong tun leh hong tun loh tu-in na mu ding hi,” a ci hi.

²⁴Tua ahih ciangin Moses paikhia-in mite’ tungah TOPA’ thugente a gensawn hi. Amah in mite a makai mi sawmsagih kaikhawmin, Puanbuk kimkotah amaute omsak hi.

²⁵Tua ciangin meii sungah TOPA hong paisukin amah hopih a, ama sunga om kha pawlkhat la-in upa sawmsagihte’ sungah a guang hi. Amaute’ sungah tua kha a om ciangin, amaute in kamsangte bangin thu genin a kiko uh hi. Ahih hangin amaute in tua khit zawh hih nawn lo uh hi.

²⁶Giahphual ah mi nih om uh a, khat Eldad kici-in, a khat Medad kici a, amaute’ sungah tua kha a lut hi. Amaute pen a kiciamtehte lakah a kihelte hi uh a, ahih hangin Puanbukah pai loin, giahphual ah kamsangte bangin thu genin a kiko uh hi.

²⁷Tangval khat va tai-in Moses kiangah, “Eldad le Medad-te in giahphual ah thu a gen uh hi,” va ci hi.

²⁸Ama teel mite lakah khat ahi, Moses’ nasem, Nun’ tapa Joshua in, “Ka topa Moses aw, amaute kham in,” a ci hi.

²⁹Ahih hangin Moses in ama kiangah, “Keima tangin hong hazatsak na hi hiam? TOPA’ mi khempeuh kamsang hi hen la, TOPA in amau’ sungah ama Kha guan leh ka cih laitak hi,” a ci hi.

³⁰Tua ciangin Moses le Israel upate giahphual ah a ciahkik uh hi.

³¹TOPA’ kiang panin huih nungin, tuipi panin vamimte hong puak a, giahphual kiang hih lampang ni khat paina ciang, hua lampang ni khat paina ciang mah giahphual kimkotah kiasak a, lei maitang tungah pi thum bang a sah hi.

³²Tua sun tawntung le a zan tawntung le a zing ciang tawntung mite dingin vamimte a khawm uh hi. Tawm a khawm pen mipa in beem sawm dim khawm a, amaute in amau a dingin giahphual kimkotah tuate a pho uh hi.

³³Sa a kigaih ma, amau’ ha kawmah sa a baang laipi mahin, mite’ tungah TOPA hong heh mahmah a, TOPA in gimna lianpi khat tawh mite a vatgawp hi.

³⁴Tua ahih ciangin tua mun pen Kibrothhattaavah kici hi. Bang hang hiam cih leh amaute in sa a lunggulh mite tua lai munah a vui uh hi.

³⁵Kibrothhattaavah panin Hazeroth munah mite pai uh a, Hazeroth-ah amaute a taam uh hi.