Read Tedim Chin GAMLAK VAKNA 13 Bible Online

GAMLAK VAKNA 13 - Tedim Chin bible

GAMLAK VAKNA 13

¹TOPA in Moses kiangah,

²“Israel mite tungah ka piak Kanaan leitang a vaan dingin mi sawl inla, amaute lakah makai ahi, nam khat sung panin mi khat ciat sawl in,” a ci hi.

³Tua ahih ciangin Moses in TOPA’ thupiakna tawh Paran gamlak panin Israel mite’ lutang ahi mi khempeuh a sawl hi.

⁴A sawl mite’ min hih bang ahi hi: Reuben minam panin Zakkur’ tapa Shammua; Simeon minam panin Hori’ tapa Shafat; Judah minam panin Jefunneh’ tapa Kaleb; Issakhar minam panin Josef’ tapa Igal; Efraim minam panin Nun’ tapa Hoshea; Benjamin minam panin Rafu’ tapa Palti; Zebulun minam panin Sodi’ tapa Gaddiel; Josef minam (Manasseh minam) panin Susi’ tapa Gaddi; Dan minam panin Gemalli’ tapa Ammiel; Asher minam panin Mikhael’ tapa Shethur; Naftali minam panin Vofsi’ tapa Nahbi; Gad minam panin Makhi’ tapa Geuel ahi hi.

¹⁶Hihte pen gam vaan dingin Moses in a sawl mite’ min ahi hi. Moses in Nun’ tapa Hoshea pen Joshua ci-in a min kheelsak hi.

¹⁷Moses in Kanaan gam a vaan dingin amaute sawlin amaute kiangah, “Negeb gam galkhatah paito-in, mualtung gamah paito unla,

¹⁸leitang bangci hiam, tua leitangah a teng mite thahat hiam, amaute tawm hiam, tam hiam,

¹⁹amau’ tenna gam pen nuntak olna gam hiam, haksatna gam hiam, amau’ tenna khuapite pen giahphual hiam, munmuanhuai hiam,

²⁰a leitang a lei hoih hiam, lei sia hiam, sing om hiam, om lo hiam, va thei un. Na siam tawpun va hih unla, tua leitang a gah pawlkhat hong ciahpih un,” a ci hi. Tua hun pen leenggah a palte a min hun ahi hi.

²¹Tua ahih ciangin amaute paito-in Zin gamlak panin Hamath khua lutna gei, Rehob mun dong gam a vaan uh hi.

²²Amaute Negeb lamah paito uh a, Hebron tung uh hi. Anak’ suanlekhakte ahi Ahiman mite, Sheshai mite, le Talmai mite, tua lai-ah na om uh hi. (Hebron pen Egypt gam a Zoan a kisat ma kum sagih lai-in kisat hi.)

²³Amaute Eshkol kuam tung uh a, tua lai panin leenggah bawk khat bek a hiang tawh loin, mi nih in zawl khatin a zawng uh hi. Amaute in mang kawlsing le thei zong tawmkhat a pua uh hi.

²⁴Tua lai panin Israel mite in leenggah bawk a lawhna hangin tua mun pen Eshkol Kuam kici hi.

²⁵Ni sawmli a cin ciangin gam vaanna panin amaute hong ciahkik uh hi.

²⁶Paran gamlak Kadesh mun a Moses le Aaron le Israel mihonte khempeuh kiangah amaute hong tung uh hi. Amaute le mihon khempeuh tungah thu puakkik uh a, tua leitang a gahte amaute a lak uh hi.

²⁷Amaute in Moses kiangah, “Kote nong sawlna leitangah ka va tung uh hi. Tua lai-ah bawngnawi le khuaizu tui bangin luang a, hih pen tua gam a gah ahi hi.

²⁸Ahi zongin tua gam a teng mite thahat uh a, a khuapite uh kulh tawh ki-umin lian mahmah hi. Tua banah Anak’ suanlekhakte tua lai-ah ka mu uh hi.

²⁹Amalek mite Negeb gamah teng uh hi. Hit mite, Jebus mite, le Amor mite, mualtung gamah teng uh hi. Kanaan mite tuipi gei le Jordan dungah teng uh hi,” ci-in a gen uh hi.

³⁰Ahih hangin Kaleb in Moses’ mai-ah mite gamdaisakin, “Thakhatin paito-in va luah ni; bang hang hiam cih leh eite pen a zo thei mahmah ding ihi hi,” a ci hi.

³¹Tua ciangin amah tawh a paito mite in, “Tua mite a sim dingin i pai ngam kei ding hi; bang hang hiam cih leh eite sangin amaute hatzaw uh hi,” a ci uh hi.

³²Tua ahih ciangin amaute a tamzaw in amau’ vaansa gam thu Israel mite tungah a sia lamin hong puak uh a, “Kote, a vaan dingin ka va paina uh gam pen a tunga teng mite a puksisak thei ding gam hoih lo ahi hi.

³³Tua lai-ah Nefilim mite (Nefilim pana hong piang Anak mite) ka mu uh hi. Kote pen kauphe bang lelin ka kingaihsun uh a, amau’ muhna-ah zong tua bangmah ka hi takpi uh hi,” a ci uh hi.