Read Tedim Chin GAMLAK VAKNA 14 Bible Online

GAMLAK VAKNA 14 - Tedim Chin bible

GAMLAK VAKNA 14

¹Tua ciangin mihon khempeuh nakpitakin kiko uh a, tua zan sung kap uh hi.

²Israel mite khempeuh in Moses le Aaron phunsan uh a, mihon buppi in amaute tungah, “Egypt gamah a si khin hizaw hoh le-ung! Tua ahih kei leh zong hih gamlakah a si khin hizaw hoh le-ung!

³Namsau tawh a si dingin bang hangin TOPA in hih gamah kote hong paipih ahi hiam? Ka zite uh le ka tate uh galte’ mat suak ding uh hi. Egypt-ah ciahkik ding ko a dingin hoihzaw ding hi lo ahi hiam?” a ci uh hi.

⁴Amaute khatlekhat kiangah, “Makai khat teelin Egypt-ah ciahkik ni,” kici uh hi.

⁵Tua ciangin Israel mihon kikhawmte khempeuh’ mai-ah Moses le Aaron boksuk uh hi.

⁶Gam vaante’ lakah a kihel Nun’ tapa Joshua le Jefunneh’ tapa Kaleb-te in a puan uh balkekin,

⁷Israel mihonte khempeuh tungah, “A vaan dingin kote ka va painasa uh leitang a hoih mahmah ahi hi.

⁸Eite’ tungah TOPA a lungkim leh, bawngnawi le khuaizu tui bangin a luanna hih leitangah eite hong paipihin eite tungah tua leitang hong pia ding hi.

⁹TOPA phunsan kei hamtang un. Amaute pen zialmang pak ding ihih manin tua gam mite kihta kei un. Amau’ kiang panin amau’ kidalna kilakhia khin a, eite tawh TOPA hong om hi; amaute kihta kei un,” a ci uh hi.

¹⁰Ahih hangin mihonte khempeuh in, amaute suang tawh deng un, a ci uh hi. Tua ciangin Israel mi khempeuh’ muhin kikhopna buk tungah TOPA’ minthanna vang hong kilang hi.

¹¹TOPA in Moses kiangah, “Hih mite in bang tanvei kei hong simmawh ding ahi uh hiam? Amaute’ lakah ka hihsa limte om napi-in, amaute in bang tanvei hong um lo lailai ding ahi uh hiam?

¹²Pulnatna tawh amaute vatgawpin ka lawnkhia kik ding a, amaute sangin a lianzaw a thahat zaw minamin nang kong bawl ding hi,” a ci hi.

¹³Ahih hangin Moses in TOPA’ kiangah, “Tua bang hileh Egypt mite in hih thu za ding uh hi; bang hang hiam cih leh amaute’ lak panin na thahatna tawh hih mite na paikhiatpih hi.

¹⁴Amaute in hih gam a teng mite tungah gen ding uh hi. TOPA aw, hih mite’ lakah nang na omna thu hih mite in za khinzo uh hi; bang hang hiam cih leh TOPA aw, maitang kituahin nang hong kimu a, amaute’ tungah nangma meii a ding hi. Amaute’ mai-ah sunin meii khuam sungah, zanin mei khuam sungah nang na pai hi.

¹⁵Tu-in hih mite mihing khat thah bangin that lecin, nangma minthang vangliatna a zasa minamte in,

¹⁶‘Amaute’ tungah piak dinga a kiciam leitangah TOPA in hih mite paipih zo lo ahih manin, amah in gamlakah amaute that hi,’ ci ding uh hi.

¹⁷Tu-in, nang tungah hong thum ing. Nangmah in thu ciamin, ‘TOPA heh hak a, a itna kip lianin, mawhna le thu palsatna maisak a, ahih hangin a mawhte siangsak ngei loin, pate’ mawhna tate tungah, khang thum khang lina dongin thuk hi,’ na cih mah bangin TOPA’ vangliatna liansak in.

¹⁹A lian nangma itna kip tawh a kizui le Egypt panin tuhun dong hih mite na maisaksa tawh kizui-in hih mite’ mawhna maisak in, kong thum hi,” a ci hi.

²⁰Tua ciangin TOPA in, “Nangma gen bangin ka maisak hi.

²¹Ahih hangin a taktakin, ka nuntak laiteng, TOPA’ minthanna tawh leitung kidim ding ahih mah bangin,

²²Egypt le gamlakah ka hihsa ka vangliatna le ka limte mu khin napi-in sawmvei kei hong ze-etin keima aw a ngai lo mite,

²³amau’ pate tungah piak dinga ka kiciam leitang a mu kuamah om lo ding uh hi. Kei hong simmawh mi kuamah in tua leitang mu lo ding hi.

²⁴Ahih hangin ka nasem Kaleb ahihleh, amah in lungsim tuam nei-in limtakin kei hong zui ahih manin, amah in a zuat leitangah ka tunpih ding a, ama suanlekhakte in tua leitang luah ding uh hi.

²⁵Tu-in tua kuam sungah Amalek mite le Kanaan mite teng uh ahih manin, San Tuipi paina lampi tawnin zing ciangin gamlakah pai un,” a ci hi.

²⁶TOPA in Moses le Aaron kiangah,

²⁷“Hih a gi lo mihonte in bang tanvei kei hong phunsan ding uh ahi hiam? Israel mite in kei hong phunsanna ka za khin hi.

²⁸Amaute tungah hih bangin gen in: TOPA in, ‘Kei a nungta ka hih mah bangin ka zakna-ah na gente uh no tungah ka hong hih ding hi.

²⁹Na luanghawmte uh hih gamlakah lum ding hi. Note khempeuh, kum sawmnih pan a tungsiah, kei hong phunsante,

³⁰Jefunneh’ tapa Kaleb le Nun’ tapa Joshua simloh, note tengsak dingin ka kiciamna leitangah khat beek na tung kei ding uh hi.

³¹Ahih hangin galte in man ding na cih uh na tate uh, keimah in ka tumpih ding a, note in na thusim loh uh leitang amaute in mu ding uh hi.

³²Ahih hangin note ahihleh, na luanghawmte uh hih gamlakah lum ding hi.

³³Na luanghawmte uh a nunung pen gamlakah a kisial mateng, gamlakah kum sawmli sung na tate uh tuucing hi ding uh a, note’ ginat lohna thuak ding uh hi.

³⁴Na gam vaan sung uh ni phazah tawh kizui-in, ni sawmli, ni khat ciangin kum khat, note in na mawhna uh kum sawmli sung na thuak ding uh a, keima lungkim lohna na thei ding uh hi,’ ci hi.

³⁵TOPA ahi keimah in thu ka gen hi. Keimah langpangin a kikaikhawm hih a gilo mihonte khempeuh tungah hih thu ka hih taktak ding hi. Hih gamlakah amaute beimang ding uh a, amaute si ding uh hi,” a ci hi.

³⁶Moses in gam vaan dingin a sawl mite hong ciahkikin a gam thu a sialamin gen uh ahih manin mihonte TOPA a phunsansak,

³⁷a gam thu a sialamin a gen tua mite, TOPA’ mai-ah gimna in sisak hi.

³⁸Ahih hangin gam vaan dingin a pai mite lak panin Nun’ tapa Joshua le Jefunneh’ tapa Kaleb-te hing lai uh hi.

³⁹Moses in Israel mite khempeuh tungah hih thute gen a, nakpitakin mite thum uh hi.

⁴⁰Amaute zingsangin tho baih uh a, gamlak mual dawnah paito-in, “Thei un, hih lai-ah i om hi. TOPA’ ciamnasa munah i paito ding hi; bang hang hiam cih leh i khial khin hi,” a ci uh hi.

⁴¹Ahih hangin Moses in, “Bang hangin tu-in TOPA’ thupiakna palsat na hi uh hiam, tangtung lo ding hi lo ahi hiam?

⁴²Na galte uh mai-ah note hong kisatpuk kha ding ahih manin kuanto kei un. Bang hang hiam cih leh note’ lakah TOPA om lo hi.

⁴³Amalek mite le Kanaan mite na mai uhah om ahih ciangin namsau tawh note na puk ding uh hi. TOPA zuihna panin nungkik na hih uh ciangin note tawh TOPA hong om lo ding hi,” a ci hi.

⁴⁴Ahih hangin TOPA’ thuciamna singkuang hitaleh Moses hitaleh giahphual panin ding khia lo napi-in gamlak mual dawnah kuantoh ding amaute in ngaihsun veve uh hi.

⁴⁵Tua ciangin mualtung gamah a teng Amalek mite le Kanaan mite hong paisuk uh a, amaute zo-in Hormah ciang dong nangawnah amaute a delh uh hi.