Read Tedim Chin GAMLAK VAKNA 15 Bible Online

GAMLAK VAKNA 15 - Tedim Chin bible

GAMLAK VAKNA 15

¹TOPA in Moses kiangah,

²“Israel mite tungah hih bangin gen in: Note kong piak leitangah a teng dingin na tun uh ciangin

³bawnghon pan hitaleh tuuhon pan hitaleh thuciamna tunsak nadingin TOPA’ tungah meihal biakna ahi a, biakpiakna ahi zongin na piak ciang uh hitaleh, TOPA’ tungah a gim namtui bawl nadingin utthu-a biakna hitaleh, a kiseh pawi hunte-ah biakpiakna hitaleh na piak uh ciangin,

⁴biakna a paipih mipa in annel lawh khat sathau biing khat tawh a kibawl an tawh biakna TOPA’ tungah pia ding hi.

⁵Tuuno khat tawh piak khawm dingin meihal biakna ahih kei leh biakpiakna tawh, tuibuah dingin leenggahzu thawl khat na bawl ding uh hi.

⁶Tua ahih kei leh tuutal khat tawh piakkhawm dingin annel lawh nih sathau biing nih tawh a kibawl an tawh biak nading na bawl ding uh hi.

⁷TOPA’ tungah a gim namtui-in tuibuah dingin leenggahzu thawl khat na pia ding uh hi.

⁸Meihal biak nading ahi a, thuciamna tunsakna-in biakpiak nading ahi a, TOPA’ tungah thunuama biak nading ahi zongin bawngtal na bawl uh ciangin,

⁹mi khat in a bawngtal tawh annel lawh thum sathau biing thum tawh a kibawl an tawh biakna pia ding a,

¹⁰TOPA’ tungah a gim namtui, mei tawh kihal biakna-in tuibuah dingin leenggahzu thawl nih na pia ding uh hi.

¹¹“Bawngtal ahi a, tuutal ahi zongin, tuuno a pa ahi a, keelno a pa tawh ahi zongin piak khawm dingin tua bangin kihih ding hi.

¹²Na piak uh ganhing khempeuh a malzah tawh kizui-in tua bangin na bawlkim ding uh hi.

¹³TOPA’ tungah a gim namtui, mei tawh kihal biakna a piakna uhah tualsung mi khempeuh in hih nate tu-a bangin hih ding uh hi.

¹⁴Note kiangah khualmi khat hong peem ahi a, na khang tawntungun note lakah mi khatpeuh hong om ahi zongin, amah in TOPA’ tungah a gim namtui, mei tawh kihal biakna a piak nop leh, note’ hih mah bangin hih ding hi.

¹⁵Mihonpi a dingin ngeina khat om ding a, note le note’ lakah hong peem mi a dingin tawntung ngeina khat na khang tawntungun om ding hi. TOPA’ mai-ah note le peemta mite na kibang ding uh hi.

¹⁶Note le note’ lakah hong peem mi a dingin a kibang thukhat, ngeina kip khat om ding hi,” a ci hi.

¹⁷TOPA in Moses kiangah,

¹⁸“Israel mite tungah hih bangin gen in: Note kong paipihna gamah tungin

¹⁹tua gam a piang ante na nek uh ciangin TOPA’ tungah biakna na pia ding uh hi.

²⁰Na anlak uh a masa pen sung panin biakna-in moh khat na pia ding uh a, an cilna pana biakna-in na piak bangun na bawl ding uh hi.

²¹Na khang tawntungun na anlak uh a masa pen TOPA’ tungah biakna-in na pia ding uh hi.

²²“Ahih hangin note khialin, TOPA in Moses tungah a gensa hih thupiaknate khempeuh,

²³TOPA in a thupiak a kipanin na khang tawntungun, Moses tungtawnin TOPA in note hong thupiakte khempeuh na zuih kei uhleh,

²⁴theih lohna hangin mihonte’ phawk lohin a kikhial ahihleh, mihonte khempeuh in TOPA’ tungah a gim namtui, meihal biak nadingin bawngtalno khat, ngeina kip om bangin an tawh biakna le a tuibuah tawh, le khialhna hanga biakna-in keel a pa khat pia ding hi.

²⁵Siampipa in Israel mihonte khempeuh a dingin kilemna bawlsak ding a, amaute kimaisak ding hi. Bang hang hiam cih leh tua pen tatkhialhna hi a, amaute in tua amau’ tatkhialhna hangin TOPA’ tungah mei tawh kihal amau’ biakna le khialhna hanga amau’ biakna uh TOPA’ mai-ah paipih khin uh hi.

²⁶Tua tatkhialhna in amaute khempeuh huamkha ahih manin Israel mihonte khempeuh le amau’ lakah a peem khualmi zong kimaisak ding hi.

²⁷“Theihlohna hangin mi khat a khialh leh, khialhna hanga biak nadingin kum khat a pha keelnu khat pia ding hi.

²⁸Mi khat, theih lohna hangin a khialh ciangin, amah a siankik theih nadingin siampipa in tua a khial mipa a dingin TOPA’ mai-ah kilemna bawlsak ding a, amah kimaisak ding hi.

²⁹Theihlohna hangin na khat peuhpeuh a hih kha, Israel mite’ lakah a om tualsung mipa le amaute’ lakah a peem khualmipa a dingin ngeina a kibang khat na nei ding uh hi.

³⁰“Ahih hangin tualsung mi hitaleh peemta hitaleh, na khat peuhpeuh a hih teitei mipa in TOPA a simmawh hi a, tua mipa kithat ding hi.

³¹Amah in TOPA’ thu simmawhin, a thupiakna siasak ahih manin, tua mipa kithat ding a, ama mawhna amah in thuak ding hi,” a ci hi.

³²Israel mite gamlakah a om sungun, Sabbath ni-in sing a tom mi khat mu uh hi.

³³Sing a tom laitak a mu mite in Aaron le Moses , le mihonte khempeuh kiangah amah paipih uh hi.

³⁴Amah bang kicih ding ci-in teltakin kigen lo ahih manin amaute in khumcip uh hi.

³⁵TOPA in Moses kiangah, “Tua mipa kithat ding hi. Mihonte khempeuh in giahphual pua-ah suang tawh amah deng ding uh hi,” a ci hi.

³⁶Mihonte khempeuh in giahphual pua-ah amah paipih uh a, TOPA in Moses a thupiak bangin suang tawh amah a denglum uh hi.

³⁷TOPA in Moses kiangah,

³⁸“Israel mite tungah gen inla, a khang tawntungun a puan mongte uhah a teep bawlin, a puan mongteep tungah khau dum khat a khih dingun sawl in.

³⁹Tua pen, note in utluatna tawh na zuih theihzel uh ahi nomau’ lungsim le nomau’ mittang’ deihna zuikha loin, note in na et ding uh puanmongteep le TOPA’ thupiakte khempeuh phawkin na sep nading uh ahi hi.

⁴⁰Tua ahih ciangin note in ka thupiakte khempeuh phawkin na sem ding uh a, na Pasian uh tungah na siangtho ding uh hi.

⁴¹Kei pen, note’ Pasian ahi dingin Egypt panin note a hong paikhiatpih TOPA na Pasian uh ka hi hi; kei pen TOPA na Pasian uh ka hi hi,” a ci hi.