Read Tedim Chin GAMLAK VAKNA 16 Bible Online

GAMLAK VAKNA 16 - Tedim Chin bible

GAMLAK VAKNA 16

¹Tu-in Levi mite sung pan Levi’ tapa Kohath, Kohath’ tapa Izhar, Izhar’ tapa Korah; le Reuben mite sung pan Reuben’ tapa Eliab, Eliab’ tapa Dathan; le Abiram; le Peleth’ tapa On;

²hih mite in pawl kai uh hi. Israel mite sung panin mi’ theihkim, mihon sung panin a kiteel, mihonte a makai mi zanih le sawmnga tawh Moses’ mai-ah ding uh hi.

³Moses le Aaron langpangin amaute kikaikhawmin amaute kiangah, “Khengval lua uh teh! Mihon khempeuhte a milipin siangtho uh a, amaute’ lakah TOPA om hi. Bang hangin TOPA’ mihonpite tungah nomau kiliansak tawm na hi uh hiam” a ci uh hi.

⁴Moses in tua thu a zak ciangin boksukin

⁵Korah le a pawlte khempeuh kiangah, “Zing ciangin TOPA in a siangtho ahi mi, ama a’ ahi mi hong lakin, ama kiangah paisak ding a, amah in a teel ding mipa ama kiangah paisak ding hi.

⁶Hih bangin gamta un: Korah le a pawlte khempeuh in paknamtui beel la un.

⁷Zing ciangin TOPA’ mai-ah tua beelte sungah mei koihin, mei tungah paknamtui koih unla, tua ciangin TOPA’ teel mi pen a siangtho hong hi ding hi. Levi’ tapate aw, khengvallua uh teh!” a ci hi.

⁸Tua ciangin Moses in Korah kiangah, “No Levi mite aw, tu-in za un.

⁹Israel mite’ Pasian in ama kiangah hong paipih ding, TOPA’ biakbuk sungah nasep sem ding, mihonte’ na a sem dingin amau’ mai-ah a ding dingin Israel mihonte’ kiang panin hong khenkhiatna,

¹⁰le nang le na sanggamte ahi Levi’ mite, ama kiangah hong paipihna hawmthawh lai na hi hiam? Siampi nasepna zong deih lai na hi hiam?

¹¹Tua ahih ciangin nang le na pawlte khempeuh hih lai-ah na kikaihkhopna uh pen TOPA langpanna ahi hi. Note in na phunsan uh Aaron pen bang mi hi mawk ahi hiam?” a ci hi.

¹²Tua ciangin Moses in mi sawlin Eliab’ tapa Dathan le Abiram samsak hi. Amaute in, “Kong pai kei ding uh hi.

¹³Kote’ tungah nangmah ulianin kibawl tawmin, gamlakah kote hong that dingin bawngnawi le khuaizu tui bangin a luanna gam panin nong paikhiatpihna thu hawmthawh lai na hi hiam?

¹⁴Tua tham loin nangmah in bawngnawi le khuaizu tui bangin a luanna gamah kote hong paipih loin, lote le leenggui lote zong nong luahsak kei hi. Hih mite’ mit khelkhia ding na hi hiam? Kong pai kei ding uh hi,” a ci uh hi.

¹⁵Moses heh mahmah ahih manin TOPA’ kiangah, “Amau’ biakna thupi ngaihsut kei in. Amaute tungah bangmah ka gamta khial kei a, a la uh khat beek nangawn ka laksak kei hi,” a ci hi.

¹⁶Tua ciangin Moses in Korah kiangah, “Nang le na pawlte, nang le amaute, Aaron tawh zing ciangin TOPA’ mai-ah hong om un.

¹⁷Note in na milipun na paknamtui beel ciat uh la-in, a sungah paknamtui koih unla, TOPA’ mai-ah na paknamtui beel ciat uh, paknamtui beel zanih le sawmnga paipih un. Aaron le nangmah in zong na paknamtui beel tuak uh paipih un,” a ci hi.

¹⁸Tua ahih ciangin a milipun a paknamtui beel ciat uh la uh a, tuate sungah mei koihin a tungah paknamtui koih uh a, kikhopna buk kongah Moses le Aaron tawh ding khawm uh hi.

¹⁹Tua ciangin Korah in amaute’ langkhat, kikhopna bukkongah mihonte khempeuh khawm hi. TOPA’ minthanna mihon khempeuhte tungah hong kilang hi.

²⁰Tua ciangin TOPA in Moses le Aaron kiangah,

²¹“Amaute tomno sungin ka beisak theih nadingin hih mihonte lak panin kihem un,” a ci hi.

²²Amaute boksuk uh a, “Pasian, mi khempeuhte’ tungah nuntakna a pia Pasian aw, mi khat’ khialhna hangin mihon khempeuhte’ tungah nang heh ding na hi hiam?” a ci uh hi.

²³TOPA in Moses kiangah,

²⁴“Mihonte tungah hih bangin gen in: Korah, Dathan, le Abiram-te’ omna kiim panin paikhia un, ci in,” a ci hi.

²⁵Tua ciangin Moses dingin Dathan le Abiram kiangah pai a, Israel upate in zong amah a zui uh hi.

²⁶Amah in mihonte kiangah, “Amaute’ khialhna khempeuh tawh note hong kiphiatkhia kha ding ahih manin, hih migilote’ puanbuk panin paikhia unla, amau’ na khat beek lawng kha kei un, hong thum ing,” a ci hi.

²⁷Tua ahih ciangin Korah, Dathan, le Abiram-te’ omna kiim panin amaute a paikhia uh hi. Dathan le Abiram-te, a zite uh le a tapate uh le a taneute uh tawh hong pusuakin a puanbuk kong uhah dingkhawm uh hi.

²⁸Tua ciangin Moses in, “Hih na khempeuh a sem dingin TOPA in kei hong sawl hi. Hih nasep pen keima utthu ahih lohna, hih thu tawh na thei ding uh hi.

²⁹Mi khempeuh a sih ngei bang danin hih mite si a, tua ahih kei leh mi khempeuh in a tuah ngeite a tuah leh, TOPA in kei hong sawl loh ahi hi.

³⁰Ahih hangin TOPA in a thak khat hong piangsakin, leitang in a kam ka-in amaute’ neih khempeuh tawh hih mite valhtumin, a hingtangin Leinuai-ah a tumsuk uhleh, hih mite in TOPA a simmawh ahihna thu na thei ding uh hi,” a ci hi.

³¹Hih thute a gen khit phetin amau’ nuai-ah lei kiphelkham hi.

³²Leitang a kam ka-in, Korah tawh a kipawl mi khempeuh le a innkuanpihte uh le a neihsa khempeuh uh valhtum hi.

³³Tua ahih ciangin amaute le a neihsa khempeuh uh a hingtangun Leinuai-ah tumsuk uh hi. Leitang in amaute khupnelhin mihonpite’ lak panin amaute bei uh hi.

³⁴Amaute’ kikona hangin a kiim uha om Israel mite khempeuh tai uh hi. Bang hang hiam cih leh amaute in, “Leitang in hong valhtum kha in teh!” ci uh hi.

³⁵Tua ciangin TOPA’ kiang panin mei hong paikhia a, paknamtui a pia mi zanih le sawmngate kangtum hi.

³⁶Tua ciangin TOPA in Moses kiangah,

³⁷“Siampi Aaron’ tapa Eleazar in meikuang sung panin paknamtui beelte a lakkhiat ding gen inla, tua ciangin a gamlapi-ah mei thehthang in. Bang hang hiam cih leh tua nate,

³⁸amau’ nuntakna a beina dongin a khial hih mite’ paknamtui beelte a siangtho hi. Tua ahih ciangin biakna tau sitna kuangdai dingin seek un; bang hang hiam cih leh amaute in TOPA’ mai-ah tuate pia uh hi. Tua ahih ciangin tua nate siangtho hi. Israel mite tungah tua bangin hih nate pen lim khat hi ding hi,” a ci hi.

³⁹Tua ahih ciangin siampi Eleazar in mei tawh a kangtum mite’ piak paknamtui sumngo beelte la-in biakna tau sitna-in a seek hi.

⁴⁰TOPA in Moses tungtawnin Eleazar tungah a gen bangin Korah le a pawlte tawh a kibang kha lo dingin, siampi ahi lo, Aaron’ suanlekhakte ahi lo mi peuhmah, TOPA’ mai-ah paknamtui hal dingin a pai loh nading, Israel mite tungah phawksakna khat ahi hi.

⁴¹Ahih hangin a zing ciangin Israel mihon khempeuh in Moses le Aaron phunsan uh a, “TOPA’ mite na that uh hi,” a ci uh hi.

⁴²Moses le Aaron langpangin mihonte a kikhop uh ciangin, kikhopna buk lamah amaute a khuadak uh ciangin, meii in na tuam a, TOPA’ minthanna vang kilang hi.

⁴³Kikhopna buk mai lamah Moses le Aaron pai a,

⁴⁴TOPA in Moses kiangah,

⁴⁵“Tomno sungin amaute ka siatsak theih nadingin hih mihonte’ lak panin paikhia un,” a ci hi. Tua ciangin amau tegel zong boksuk uh hi.

⁴⁶Moses in Aaron kiangah, “Na paknamtui beel la-in, biakna tau pana mei a sungah koih inla, a tungah paknamtui koihin, mihonte’ lakah paipih mengmeng inla, amaute a dingin kilemna bawlsak in. Bang hang hiam cih leh TOPA’ kiang panin hehna hong paikhia khin a, gimna kipan khin hi,” a ci hi.

⁴⁷Tua ahih ciangin Moses’ gen bangin Aaron in paknamtui beel la-in mihonte lakah a tai hi. Mite lakah gimna kipan khin takpi a, amah in paknamtui koihin mite a dingin kilemna a bawlsak hi.

⁴⁸A si le a hingte’ kikalah amah ding a, gimna a veng hi.

⁴⁹Tu-in Korah’ tungtangah a site simloh, hih gimna tawh a si mi tul sawm le tulli le zasagih ahi hi.

⁵⁰Gimna a ven’ ciangin kikhopna bukkong Moses kiangah Aaron a ciahkik hi.