Read Tedim Chin GAMLAK VAKNA 17 Bible Online

GAMLAK VAKNA 17 - Tedim Chin bible

GAMLAK VAKNA 17

¹TOPA in Moses kiangah,

²“Israel mite tungah thu gen inla, amaute tung panin, beh khat ciangin ciangkhut khat, a beh tawh kizui-in a makaite khempeuh tung panin ciangkhut sawm le nih la in. A ciangkhut tungah amau’ min ciat gelh inla,

³Levi ciangkhut tungah Aaron’ min gelh in. Bang hang hiam cih leh beh lutang khatah ciangkhut khat hi ding hi.

⁴Tua ciangin kikhopna buk sung, thuciamna mai, nang tawh i kituahna munah tuate na koih ding hi.

⁵Keimah in ka teel mipa’ ciangkhut hong sel ding hi. Amaute in nang hong phunsanna, Israel mite’ phunna tua bangin kei’ kiang panin ka beisak ding hi,” a ci hi.

⁶Moses in zong Israel mite tungah tua thu a gen hi. A makaite khempeuh in a beh tawh kizui-in makai khat ciangin khat pai, ciangkhut sawm le nih ama tungah pia uh a, Aaron’ ciangkhut zong amau’ ciangkhut lakah a om hi.

⁷Moses in thuciamna puanbuk sung TOPA’ mai-ah tua ciangkhutte a koih hi.

⁸A zing ciangin thuciamna puanbuk sungah Moses a pai leh, Levi-te beh a’ ding Aaron’ ciangkhut selin nguumkhia a, paakin, almond min gah a gah hi.

⁹Tua ciangin Moses in TOPA’ mai panin Israel mite khempeuh kiangah ciangkhut khempeuh paikhiatpih hi. Amaute in en uh a, a ciangkhut ciat uh a la uh hi.

¹⁰TOPA in Moses kiangah, “Amaute si kha ding ahih manin, amaute in kei hong phunsanna beisak theih nadingin a lehdo mite a dingin lim ahi dingin thuciamna mai-ah Aaron’ ciangkhut koihkik in,” a ci hi.

¹¹Tua ahih manin TOPA’ sawl bangin Moses in zong a hih hi.

¹²Israel mite in Moses kiangah, “En in, kote a si ka hi ta uh a, kote khempeuh a mawkna ka hi ta uh hi.

¹³A nai-ah a pai, TOPA’ biakbuk nai-ah a pai peuhmah si ding hi. Kote khempeuh ka bei nading uh hita hi lo ahi hiam?” a ci uh hi.