Read Tedim Chin GAMLAK VAKNA 18 Bible Online

GAMLAK VAKNA 18 - Tedim Chin bible

GAMLAK VAKNA 18

¹Tua ciangin TOPA in Aaron kiangah, “Nang le na tapate le na behte in biakbuk sung nasepnate tawh kisai-in khialhna a om leh mawhna na puakhawm ding uh hi. Ahi zongin nang le na tapate in na siampi nasepna uh tawh kisai-in khialhna a om leh no teng bek in mawhna na pua ding uh hi.

²Amaute in nang hong pawlin, thuciamna puanbuk mai-ah nang le na tapate na om laitakun note’ na hong sepsak theih nadingin na pate nam ahi Levi minam na sanggamte zong paipih in.

³Amaute in note hong huhin puanbuk nasep khempeuh sem ding uh a, ahih hangin note le amaute si kha ding na hih ciangun biakbuk nazatte leh biakna tau-ah na hong seppih lo ding uh hi.

⁴Amaute in note hong pawlin, kikhopna buk vaanin puanbuk nasep khempeuh sem ding uh a, note’ nasepte midang kuamah in hong seppih thei lo ding hi.

⁵Israel mite tungah hehna a om nawn loh nadingin biakbuk nasep leh biakna tau nasep note in na sem ding uh hi.

⁶En un, Israel mite kiang panin na sanggam uh Levi mite ka la khin a, amaute pen kikhopna buk nasep a sem dingin TOPA’ tungah a kipia, note’ tungah letsong ahi hi.

⁷Nang le na tapate in biakna tau tawh kisai nate le dalna puan sunga om nate khempeuhah na siampi nasep uh na sem ding uh hi. Na siampi nasep uh letsongin kong piak hi a, midangte in hong sep leh kithat ding hi,” a ci hi.

⁸Tua ciangin TOPA in Aaron kiangah, “En in, kei tungah hong kipia biakna a kikoih khempeuh, Israel mite in a ap nate khempeuh nang kong pia hi. Nangma tanh ding le na suanlekhakte’ kaih ahi tawntung dingin note tungah kong pia hi.

⁹Mei tawh hal dingte lak panin a kisit, a siangtho pen nangma ngah dingte in: Amaute in kei’ tungah hong piak amau’ biaknate khempeuh, an tawh amau’ biaknate khempeuh, khialhna hanga amau’ biaknate khempeuh, leh mawhna hanga amau’ biaknate khempeuh pen nang le na suanlekhakte a dingin a siangtho pen hi ding hi.

¹⁰A siangtho pen mun khatah na ne ding uh hi. Pasal peuhmah in ne thei ding hi; note a dingin a siangtho ahi hi.

¹¹“Amau’ letsong biakna, Israel mite in vei-a biaknate khempeuh uh zong nomau-a’ ahi hi. Nang le na tapate le na tanute’ kaih tawntung dingin tuate kong pia hi. Na inn sunga om a siangtho mi peuhpeuh in ne thei ding hi.

¹²“Sathau limci pen khempeuh, le leenggahzu le an a limci pen khempeuh, TOPA’ tungah amau’ piak anpalte, note’ tungah kong pia hi.

¹³Amaute in TOPA’ tungah a piak uh, amau’ leitangah a min masa gah khempeuh nomau a’ hi ding hi. Na inn sunga om a siangtho mi peuhpeuh in ne thei ding hi.

¹⁴“Israel-te’ sungah a ki-ap na peuhmah nomau a’ hi ding hi.

¹⁵“Mihing le ganhing khempeuh sung panin TOPA’ tungah mite in a piak tacil khempeuh, mihing hitaleh ganhing hitaleh, nomau a’ hi ding hi. Ahi zongin mihing tacil na tankhia ding uh a, ganhing nin tacil zong na tankhia ding uh hi.

¹⁶Tuate a kitatna man (kha khat a phak ciangin tuate na tankhia ding uh hi) gerah sawmnih a pha biakinn shekel tawh kizui-in ngun shekel nga-in na seh ding uh hi.

¹⁷Ahih hangin bawng tacil, ahih kei leh tuu tacil, ahih kei leh keel tacilte na tan kei ding uh hi; tuate a siangtho ahi hi. Biakna tau tungah tuate’ si na theh ding uh a, TOPA’ tungah a gim namtui, mei tawh kihal biakna-in tuate’ thau na hal ding uh hi.

¹⁸Ahih hangin a kivei sa-iik le a taklam phei nomau-a’ ahih mah bangin, tuate’ sate nomau a’ hi ding hi.

¹⁹“Israel mite in TOPA’ tungah a piak a siangtho biaknate khempeuh, nang le na tapate le na tanute tungah kaih tawntung dingin kong pia hi. Tua pen nang le na suanlekhakte a dingin TOPA’ mai-ah a tawntungin a kiphel thei lo, ci tawh thuciamna ahi hi,” a ci hi.

²⁰TOPA in Aaron kiangah, “Nang in amau’ gam sungah gamhluah na nei kei ding a, amaute’ lakah tanh zong na nei kei ding hi. Kei pen Israel mite’ lakah nangma tanh le nangma luah ka hi hi.

²¹“Kikhopna buk sungah amaute’ nasepna thaman dingin Israel sunga sawm-ah-khat khempeuh, Levi mite’ tungah gamh-in ka pia hi.

²²Amaute in khialhna thuakin si kha ding uh ahih manin, tu a kipanin kikhopna buk sungah Israel midangte pai-in tua sawm-ah-khat nekpih lo ding uh hi.

²³Ahih hangin Levi mite in kikhopna buk nasep sem ding uh a, amaute in a tavuan uh pua ding uh hi. Tua pen amau’ khang tawntungin ngeina kip hi ding a, amaute in Israel mite’ lakah luah nei lo ding uh hi.

²⁴Bang hang hiam cih leh amaute in biakna-in TOPA’ tungah a piak uh Israel mite’ sawm-ah-khat pen Levi mite tungah luah dingin ka pia khin hi. Tua ahih ciangin Israel mite lakah amaute in luah a neih loh ding uh ka gensa ahi hi,” a ci hi.

²⁵TOPA in Moses kiangah,

²⁶“Levi mite kiangah hih bangin na gen lai ding hi: ‘Note’ luah dingin amaute’ tung panin kong piak sawm-ah-khat, Israel mite’ tung panin na lak uh ciangin, tua sung panin TOPA’ tungah biakna, sawm-ah-khat sung pan sawm-ah-khat na pia sawn ding uh hi.

²⁷Tua na biaknate uh, ancilna pana an le leenggah sukna pana kipia mah bangin note-a’ in kiciamteh ding hi.

²⁸Tua ahih ciangin Israel mite’ tung panin na ngah uh sawm-ah-khat khempeuh tung panin TOPA’ tungah biakna na pia ding uh hi. Tua bangin siampi Aaron’ tungah TOPA a kibiakna na pia ding uh hi.

²⁹Note tungah hong kipia letsong lakah a limci pen, a siangtho pen paipihin TOPA a’ ding biakna khempeuh na pia ding uh hi,’ ci-in gen in.

³⁰Tua ahih ciangin amaute kiangah, ‘Tuate sung panin a limci pen teng na piak khit uh ciangin, a omlai teng Levi mite a dingin ancilna panin a piangte le leenggah sukna panin a piangte a kipia mah bangin kiciamteh ding hi.

³¹Nang le na innkuanpihte in mun khat peuhpeuhah na ne thei ding uh hi; bang hang hiam cih leh tua pen kikhopna buk sungah note’ nasepna thaman ahi hi.

³²Tua sung panin a limci pen na piak nak-uhleh tua thu hangin mawhsakna na thuak kei ding uh hi. Israel mite’ na a siangthote na ninsak kei ding uh hi. Na nitsak uhleh na si ding uh hi,’ ci-in gen in,” a ci hi.