Read Tedim Chin GAMLAK VAKNA 19 Bible Online

GAMLAK VAKNA 19 - Tedim Chin bible

GAMLAK VAKNA 19

¹Tu-in TOPA in Moses le Aaron’ kiangah,

²“TOPA’ thupiak thukham le ngeina hih bang ahi hi: Poina a nei lo, sitbaanna a om lo, a tungah nasepna kol a kivawh ngei nai lo, bawngla a san khat nomau kiangah hong paipih nadingun Israel mite kiangah gen un.

³Siampi Eleazar kiangah na pia ding uh a, giahphual pualamah kipaipihin ama mai-ah kigo ding hi.

⁴Siampi Eleazar in a khutme tawh a si tawmkhat la-in, kikhopna buk mai lamah a si sagihvei theh ding hi.

⁵Ama muhna-ah a bawngla kihal ding a, a vun, a sa, le a si, a ek tawh kihal ding hi.

⁶Siampipa in taamtak sing le puknah le a ausan khaute la-in bawngla a kihalna sungah tuate khul ding hi.

⁷Tua ciangin siampipa in ama puante sawpin tui sungah kipumsil ding a, tua khit ciangin giahphual ah hong pai ding hi. A nitak mateng siampipa a nin hi ding hi.

⁸Bawngla a hal mipa in ama puante sawpin tui sungah kipumsil ding a, a nitak mateng a nin hi ding hi.

⁹Mi a siang khat in bawngla vu khawmin, giahphual pualam a siang mun khatah tuate koih ding a, khialhna maisak nading, nitna siansak nading tui-ah zat dingin Israel mihonpite a dingin tuate kikem ding hi.

¹⁰Bawngla vute a khawm mipa in ama puante sawpin, a nitak mateng a nin hi ding hi. Hih pen Israel mite le amaute lakah a peem khualmi tungah tawntung ngeina hi ding hi.

¹¹“Misi luang khatpeuh a lawng pa ni sagih sung a nin hi ding hi.

¹²A ni thum ni le a ni sagih ni-in amahmah tui tawh kisiangsakin, tua khit ciangin a siang hi ding hi. Ahih hangin a ni thum ni le a ni sagih ni-in amahmah a kisiansak kei leh, amah a siang suak thei lo ding hi.

¹³Misi khatpeuh a lawng mi in amahmah a kisiansak tawm kei leh amahmah in TOPA’ biakbuk a ninsak hi a, Israel sung panin tua mi kihawlkhia ding hi. Nitna hangin ama tungah tui kibuak lo ahih manin ama tungah nitna baang lai ahih ciangin a nin hi ding hi.

¹⁴“Mi khat puanbuk sungah a sih ciangin puanbuk sungah a pai mi peuhmah le puanbuk sungah a om mi peuhmah ni sagih sung a nin hi ding hi.

¹⁵A kisiincip lo a kihong beel peuhmah a nin ahi hi.

¹⁶Namsau tawh gamlakah a kithat mi ahi a, misi pumpi ahi a, mi guh ahi a, han ahi zongin a lawng mi peuhmah ni sagih sung a nin hi ding hi.

¹⁷“Amaute in a nin mipa a dingin a kihal khialhna hanga biakna vute la-in beel sung khatah tui luanglai tawh hel ding uh hi.

¹⁸Tua ciangin a siang mi khat in puknah la-in a sungah diah ding a, puanbuk tung le a nazat khempeuh tung le tua lai-ah a om mi khempeuh tung le guh ahi a, a kithat mi ahi a, misi ahi a, han ahi zongin a lawng mipa tungah theh ding hi.

¹⁹A ni thum ni le a ni sagih ni-in a siang mipa in a nin mipa tungah theh ding a, tua bangin a ni sagih ni-in amah in mi ninpa siangsakin, amah in a puante sawpin, tui sungah kipumsil ding a, a nitak ciangin amah a siang hi ding hi.

²⁰“Ahih hangin a nin hi napi-in a kisiangsak lo mipa in TOPA’ biakbuk ninsak ahih manin mihonpi panin tua mipa kihawlkhia ding hi. Nitna hangin ama tungah tui kibuak lo ahih manin amah a nin ahi hi.

²¹Tua pen amaute a dingin tawntung ngeina khat hi ding hi. Nitna hangin tui a theh mipa in ama puante sawp ding a, nitna hangin a kizang tui a lawng mipa a nitak mateng a nin hi ding hi.

²²A nin mipa in a lawn’ na khat peuhpeuh a nin hi ding a, tua na a lawng peuhpeuh zong a nitak mateng a nin hi ding hi,” a ci hi.