Read Tedim Chin GAMLAK VAKNA 20 Bible Online

GAMLAK VAKNA 20 - Tedim Chin bible

GAMLAK VAKNA 20

¹Israel mite, a mihon buppi, a kha masa sungin Zin gamlak tung uh a, Kadesh munah phual sat uh hi. Tua lai-ah Miriam si a, tua lai mahah kivui hi.

²Tu-in mihonte a’ ding tui om lo ahih manin Moses le Aaron’ langah amaute kikhawmin kituah uh hi.

³Mite, Moses tawh kiselin, “TOPA’ mai-ah ka sanggamte uh a sih lai-in a si hizaw hoh ta le ung!

⁴Bang hangin hih lai-ah kote le ka ganhingte uh a si dingin TOPA’ mihonte hih gamlakah hong paipih na hi hiam?

⁵Bang hangin hih mun sia-ah hong paipih dingin Egypt panin kote hong paitosak na hi hiam? An ahi a, thei ahi a, leenggui ahi a, mang kawlsing ahi zongin a omna mun ahih loh banah tui dawn ding nangawn zong om lo hi,” a ci uh hi.

⁶Tua ciangin mihonte omna panin kikhopna bukkongah Moses le Aaron pai-in boksuk uh hi. TOPA’ minthanna vang amaute’ tungah hong kilangin

⁷TOPA in Moses kiangah,

⁸“Ciangkhut la-in, nang le na sanggampa Aaron in mihonte khawm un la, suangpi in amau’ muhin tui a piak ding sawl un. Tua bangin mihonte le amau’ ganhingte tui na ngahsak ding uh hi,” a ci hi.

⁹Moses in zong TOPA’ thupiak bangin ciangkhut a la hi.

¹⁰Moses le Aaron in suangpi mai-ah mihonte kaikhawmin amah in amaute kiangah, “Tu-in za un, a lehdo mite aw; hih suangpi panin note a’ ding tui hong phulkhiasak ding ka hi uh hiam?” a ci hi.

¹¹Moses in a khut laamto-in a ciangkhut tawh tua suangpi nihvei sat a, tui tampi phulkhia-in mihonte le amau’ ganhingte in a dawn uh hi.

¹²Ahi zongin TOPA in Moses le Aaron kiangah, “Israel mite’ mai-ah kei hong um lo, hong siangthosak lo na hih uh ciangin amaute ka piaksa leitangah hih mihonte na tunpih kei ding uh hi,” a ci hi.

¹³Hihte pen, Israel mite in TOPA a phunsanna, amaute lakah amahmah a siangtho-a a kilahna mun, Meribah tui phuala thupiang ahi hi.

¹⁴Moses in Kadesh panin Edom kumpipa kiangah kamtaite sawl a, “Na sanggam Israel-te in hih bangin ci hi: Kote’ tuahkhak kamsiatna khempeuh na thei hi.

¹⁵Ka pu ka pate uh Egypt-ah na paisukin Egypt-ah sauveipi ka teng uh a, Egypt mite in kote le ka pu ka pate uh hong gimbawl hi.

¹⁶TOPA’ tungah ka kiko uh ciangin amah in ka aw uh hong za a, vantungmi khat hong sawlin, Egypt panin hong paikhiatpih a, tu-in nangma gam nawl Kadesh khuapi-ah ka om uh hi.

¹⁷Tu-in kote na gam hong kantansak in. Lo ahi a, leenggui lo ahi zongin nawkkha loin, tuikhuk panin zong tui ka dawn kei ding uh hi. Kumpipa’ Lamlian dungah ka pai ding uh a, na gam sung ka khen’ matengun lam ka pial kei ding uh hi,” a ci hi.

¹⁸Ahih hangin Edom mite in ama kiangah, “Nong nawk kei ding uh hi; nong nawk uhleh note langpangin namsau tawh kong kuan ding uh hi,” na ci hi.

¹⁹Israel mite in, “Lamlian tawnin ka paito ding uh hi. Kote le ka ganhingte un na tui uh ka dawn uhleh, a man kong pia ding uh hi. Khe tawh pai-in hong nawksak un; adang kong ngen kei uh hi,” a ci uh hi.

²⁰Ahih hangin Edom mite in, “Nong nawk kei ding uh hi,” na ci uh hi. Amaute’ langkhatah galkap tampi tawh Edom mite kuan hi.

²¹Israel mite, amau’ gam a nawksak ding tua bangin Edom mite in nial uh ahih ciangin amau’ kiang panin Israel mite paikhia uh hi.

²²Kadesh panin Israel-te pai uh a, a hon buppi-in Hor Mual tung uh hi.

²³Edom gamgi Hor Mual-ah TOPA in Moses le Aaron’ tungah,

²⁴“Aaron in ama mite kiang zuan ta ding hi; bang hang hiam cih leh Meribah tui-ah no tegel in ka thupiak hong nial na hih manun, Israel mite tungah ka piak leitangah amah tum lo ding hi.

²⁵Aaron le ama tapa Eleazar sam inla, Hor Mual-ah amaute paipih in.

²⁶Aaron’ tung panin a puante suahkhia inla, a tapa Eleazar silhsak in. Aaron in ama mite kiang zuan ta ding a, tua lai-ah si ding hi,” a ci hi.

²⁷TOPA’ thupiak bangin Moses zong gamta hi. Mihonte khempeuh’ muhin Hor Mual tungah amaute paito uh hi.

²⁸Moses in Aaron’ puante suahkhiatsakin a tapa Eleazar silhsak a, tua mual dawnah Aaron a si hi. Tua ciangin mualtung panin Moses le Eleazar paisuk uh hi.

²⁹Aaron si hi, ci-in mihonte khempeuh in a theih uh ciangin, Aaron’ hangin Israel mi khempeuh ni sawmthum sung a kap uh hi.