Read Tedim Chin GAMLAK VAKNA 21 Bible Online

GAMLAK VAKNA 21 - Tedim Chin bible

GAMLAK VAKNA 21

¹Kanaan mi, Negeb gam a teng Arad gam kumpipa in Atharim lam tawnin Israel mite hong paina thu a zak ciangin amah in Israel-te do-in, amaute kimkhat salin a man hi.

²Tua ciangin Israel-te in TOPA’ tungah kiciamna khat bawl uh a, “Ka khutsung uhah hih mite nong piak nakleh kote in amau’ khuapite ka susiamang ding uh hi,” a ci uh hi.

³TOPA in zong Israel-te’ cihna mangin Kanaan mite a pia hi. Israel-te in amau le a khuapite uh susiamang ahih ciangin tua mun pen Hormah kici hi.

⁴Hor Mual panin amaute dingkhia-in Edom gam kiimah a pai dingin San Tuipi lamah pai uh a, lamkalah mite lungkia uh hi.

⁵Mite in Pasian le Moses gensia uh a, “Bang hangin sehnel gamah a si dingin Egypt panin kote hong paikhiatpih to na hi hiam? An le tui om lo a, bangmah a man lo hih an ka kih uh hi,” a ci uh hi.

⁶Tua ciangin TOPA in mite’ lakah gul guphate khah a, tuate in mite tu-in Israel mi tampi a si hi.

⁷Moses kiangah mite hong pai-in, “TOPA le nang hong gensia-in kampau kha ka hih manun ka khial uh hi. Kote’ kiang panin gulte a lakkhiat nadingin TOPA’ tungah thum in,” a ci uh hi. Tua ahih ciangin mite a dingin Moses in thumsak hi.

⁸TOPA in Moses kiangah, “Gul gupha tawh a kibang sumngo gul khat bawl inla, khuam khat tungah khai in. Gul in a tuk mi peuhmah in tua gul a et ciangin hing ding hi,” a ci hi.

⁹Tua ahih ciangin Moses in sumngo gul khat bawl a, khuam khat tungah a khai hi. Gul in mi khatpeuh a tuk leh amah in tua sumngo gul enin hing pah hi.

¹⁰Israel mite ding khia uh a, Oboth munah giahphual sat uh hi.

¹¹Oboth panin ding khia uh a, nisuahna lam, Iyeabarim munah giahphual sat uh hi.

¹²Tua lai panin ding khia uh a, Zered Kuam-ah giahphual sat uh hi.

¹³Tua lai panin ding khia uh a, Amor mite’ gamgi panin a hong kikhungsuk gamlak a om Arnon gun galkhatah giahphual sat uh hi; bang hang hiam cih leh Arnon gun pen Moab le Amor mite’ kikalah Moab-te’ gamgi ahi hi.

¹⁴Tua ahih manin TOPA’ Gal Laibu sungah, “Sufa gam a Vuahep khua, le Arnon gun kuamte,

¹⁵le Ar khua ciang ban sukin, Moab gamgi lamah a paisuk kuam” kici hi.

¹⁶Tua lai panin Beer munah pai uh hi. Tua mun pen TOPA in Moses kiangah, “Mite kaikhawm in; amaute tui ka pia ding hi,” a cihna tuikhuk ahi hi.

¹⁷Tua ciangin Israel mite in hih la sa uh hi: “Tuikhuk aw, phul in! La kong sak ding uh hi.

¹⁸Kumpi ciangkhut le amau’ ciangkhutte tawh mite’ uliante in a tawh, kumpi tate in a tawh tuikhuk aw,” a ci uh hi. Gamlak panin amaute Mattanah munah pai uh a,

¹⁹Mattanah panin Nahaliel, Nahaliel panin Bamoth,

²⁰Bamoth panin sehnel gam a kimuhsuk theihna Pisgah mual kiang nai, Moab gam sunga kuam khatah tung uh hi.

²¹Tua ciangin Israel-te in Amor kumpipa Sihon kiangah kamtaite sawl uh a,

²²“Na gam hong kantansak in. Lo ahi a, leenggui lo-ah ahi zongin ka pial kei ding uh hi. Tuikhuk tuite kong neksak kei ding uh a, na gam ka khen’ khit mateng uh Kumpipa’ Lamlian tawnin ka pai ding uh hi,” a ci uh hi.

²³Ahih hangin Sihon in Israel mite ama gam kantansak lo hi. Amah in a mite khempeuh kaikhawmin, Israel-te a do dingin gamlakah pai-in Jahaz mun tung a, Israel-te a do hi.

²⁴Israel-te in namsau tawh amah le a mite tampi thatin, Arnon gun panin Jabbok lui, Ammon mite kiang dong bek a gam laksak hi. Bang hang hiam cih leh Ammon mite’ gamgi nawksuak zo lo uh hi.

²⁵Israel-te in a khuapite khempeuh la-in, Heshbon gam sunga Amor mite’ khuapi khempeuh le khuaneu khempeuhah a teng uh hi.

²⁶Bang hang hiam cih leh Heshbon pen, nidangin Moab kumpipa simin a khutsung panin Arnon gun ciang dong a gam khempeuh a laksak, Amor mite’ kumpipa Sihon’ khuapi ahi hi.

²⁷Tua ahih ciangin la a sa pawlte in, “Heshbon-ah hong pai un. Lamkik unla, Sihon’ khuapi kipsak un.

²⁸Heshbon panin mei piangkhia a, Sihon’ khuapi panin meikuang piangkhia hi. Moab mite’ khuapi Ar, Arnon mual sang a ukte kangtum hi.

²⁹Moab! Gimna na ngah hi. Khemosh mite! Na mangthang uh hi. Amah in a tapate galtai-in, a tanute galmatin, Amor kumpipa Sihon a dingin hong bawl hi.

³⁰Tua ahih ciangin amau’ suanlekhakte Heshbon pan Dibon ciang dong si uh a, mei in Medeba ciang dong a bat mateng ka siasak uh hi,” ci-in sa uh hi.

³¹Tua bangin Amor mite’ gam sungah Israel-te teng uh hi.

³²Moses in Jazer khua thu a kansim dingin mi a sawl hi. Amaute in a khuaneute la-in tua lai-a om Amor mite suankhia uh hi.

³³Tua ciangin amaute kihei-in Bashan lamah paito uh hi. Bashan kumpipa Og le a mite khempeuh Edrei-ah amaute a do dingin hong kuan uh hi.

³⁴Ahih hangin TOPA in Moses kiangah, “Amah kihta kei un; bang hang hiam cih leh amah le a mite khempeuh le a leitang, nomau khut sungah kong pia khin hi. Heshbon-ah a teng Amor kumpipa Sihon na bawl bangun amah na bawl ding uh hi,” a ci hi.

³⁵Tua ahih ciangin khat beek a nungta a om nawn lo dingin amaute in amah le a tapate le a mite khempeuh that uh a, amaute in ama gam a luah uh hi.