Read Tedim Chin GAMLAK VAKNA 22 Bible Online

GAMLAK VAKNA 22 - Tedim Chin bible

GAMLAK VAKNA 22

¹Tua ciangin Israel mite ding khia uh a, Jerikho gei Jordan galkhat Moab gam zanglei-ah giahphual a sat uh hi.

²Israel-te in Amor mite tungah a bawlna khempeuh Zippor’ tapa Balak in mu hi.

³Amaute tam mahmah uh ahih manin Moab mite in tua mite kihta uh a, Israel mite kihtakna hangin Moab mite linggawp uh hi.

⁴Moab mite in Midian upate kiangah, “Bawngtal in gamlak lopate a liah bangin hih mite in i kiima om mi khempeuh liaktum mang ding hi,” a ci hi. Tua ahih ciangin Zippor’ tapa Balak, tua hun laitak a Moab kumpipa in

⁵Amaw mite’ gam Gun gei Pethor-ah a om Beor’ tapa Balaam kiangah kamtaite sawlin, “En in, Egypt panin mihon khat hong paikhia hi. Amaute, lei maitang teng dim khin uh a, keima galkhatah amaute om uh hi.

⁶Tu-in hong pai inla, amaute hat lua uh ahih manin hih mite hong samsiatsak in. Tua hileh amaute zo-in hih gam panin ka hawlkhiazo kha ding hi. Bang hang hiam cih leh thupha na piak mi in thupha ngahin, na samsiat mi in siatna a ngahna ka thei hi,” cisak hi.

⁷Tua ahih ciangin Moab upate le Midian upate aisanna man ding tawh kuankhia-in Balaam kiangah pai uh a, Balak’ thu ama kiangah sung uh hi.

⁸Balaam in amaute kiangah, “Tuzan hih lai-ah giak phot un. TOPA in kei tungah hong gen bangin note tungah kong genkik ding hi,” a ci hi. Tua ahih ciangin Moab uliante Balaam tawh a om uh hi.

⁹Balaam kiangah Pasian hong pai-in, “Nang tawh a om hih mite kua ahi hiam?” a ci hi.

¹⁰Balaam in Pasian kiangah, “Zippor’ tapa Balak, Moab kumpipa in kei kiangah mi hong sawlin,

¹¹‘En in, Egypt panin mihon khat hong paikhia a, lei maitang teng dim uh hi. Tu-in hong pai inla, amaute hong samsiatsak in. Tua hileh amaute do-in ka hawlkhiazo kha ding hi,’ hong ci hi,” ci-in a gen hi.

¹²Pasian in Balaam kiangah, “Amaute na zui kei ding hi. Tua mite thupha a kipia ahih manin na samsia kei ding hi,” a ci hi.

¹³Tua ahih ciangin zingsangin Balaam tho-in Balak’ uliante kiangah, “Na gam uhah ciah un; bang hang hiam cih leh TOPA in note kong zuih ding hong phal lo hi,” a ci hi.

¹⁴Tua ahih ciangin Moab uliante dingin Balak kiangah ciah uh a, “Balaam in kote hong zui nuam lo hi,” a ci uh hi.

¹⁵Tua ciangin Balak in amaute sangin a tamzaw leh a zahtakhuai zaw uliante khatvei sawlkik hi.

¹⁶Amaute zong Balaam kiangah pai-in ama kiangah, “Zippor’ tapa Balak in hih bangin ci hi: ‘Kei kiangah nong pai nading bangmah kikol-awksak kei in;

¹⁷bang hang hiam cih leh minphatna lianpi nang kong pia ding a, kei’ tunga nong gen peuhpeuh ka hih ding hi. Hong pai inla, hih mite hong samsiatsak in,’ ci hi,” ci-in a gen uh hi.

¹⁸Ahih hangin Balaam in Balak’ nasemte kiangah, “Balak in kham leh ngun tawh a kidim ama inn hong pia ding hitaleh zong, TOPA ka Pasian’ thupiakna banah a tamzaw hitaleh a tawmzaw hitaleh bangmah ka hih thei kei hi.

¹⁹Tu-in kong thum hi; TOPA in kei tungah bang hong ci lai ding hiam cih ka theihna dingin tuzan zong hih lai-ah giak phot un,” ci-in a dawng hi.

²⁰Tua zanin Balaam kiangah Pasian hong pai-in, “Nangmah a sam dingin mite hong pai ahihleh, tho inla amaute zui in. Ahih hangin nang kong sawl teng bek na hih ding hi,” a ci hi.

²¹Tua ahih ciangin zingsangin Balaam tho-in a la tutphah vawhin Moab uliante a zui hi.

²²Ahih hangin amah pai ahih manin Pasian heh a, amah a khaktan dingin TOPA’ vantungmi in lampi-ah na pang hi. Tu-in a la tungah amah tuang a, a nasemte nih in zong a zui uh hi.

²³TOPA’ vantungmi in a khut sungah namsau dawhsa tawi-in lampi-ah a ding, a la in mu ahih manin lampi panin pialin gamlakah a pai hi. Balaam in lampi-ah a paikik nadingin a la a sat hi.

²⁴Tua ciangin leenggui lo kikal, a pang tuakah phung a omna lam kawcikah vantungmi na ding leuleu hi.

²⁵La in TOPA’ vantungmi a muh ciangin phung phu a, phungah Balaam’ khe nengcip ahih ciangin amah in a la sat kik hi.

²⁶Tua ciangin TOPA’ vantungmi na ma pai-in, taklamah ahi a, veilamah ahi zongin kihei theih nading a om lohna mun kawcik khatah na ding leuleu hi.

²⁷La in TOPA’ vantungmi a muh ciangin Balaam’ nuai-ah lumsuk hi. Balaam heh mahmah a, a ciangkhut tawh a la a sat hi.

²⁸Tua ciangin TOPA inla pau theisak a, la in Balaam kiangah, “Thumvei dong nong sat nadingin nang bang hong cih ka hi hiam?” a ci hi.

²⁹Balaam in a la kiangah, “Nang in kei nong mawlpihna hang ahi hi. Ka khutah namsau a tawi hi leng ka ut hi. Tua hileh nang kong that khin ding hi,” a ci hi.

³⁰La in Balaam’ kiangah, “Na khantawnin tuni ciang dong na tuanna na la hi lo ka hi hiam? Hih bangin nang hong hih ngei ka hi hiam?” a ci hi. Amah in, “Nong hih ngei kei hi,” a ci hi.

³¹Tua ciangin TOPA in Balaam’ mitte honsak a, a khut sungah namsau dawhsa tawh TOPA’ vantungmi lampi-ah a ding mu ahih manin a lu kunin a boksuk hi.

³²TOPA’ vantungmi in ama kiangah, “Bang hangin na la thumvei dong sat na hi hiam? En in, hih na khualzinna-ah lungkim lo ka hih manin nang hong pang dingin kong kuankhia hi.

³³La in kei hong mu-in thumvei dong hong peel hi. Hong peel kei leh, tu mahmahin nang hong that khinin na la ka hingsak ding hi,” a ci hi.

³⁴Tua ciangin Balaam in TOPA’ vantungmi kiangah, “Kei hong pangin lampi-ah na dinlam thei lo ka hih manin ka khial hi. Tua ahih ciangin tu-in ka khualzinna hoihsa lo na hih leh ka ciahkik ding hi,” a ci hi.

³⁵TOPA’ vantungmi in Balaam kiangah, “Mite zui in; ahih hangin nang kong sawlteng bek na gen ding hi,” a ci hi. Tua ahih ciangin Balaam in Balak’ uliante a zuisuak hi.

³⁶Balaam’ hong paina thu Balak in a zak ciangin, Arnon gun gamgi-in a kizatna dunga om, Moab gamgi gei-a om Ar khuapi ciangah amah a dawn dingin a paikhia hi.

³⁷Balak in Balaam kiangah, “Nang hong sam ding mi hong sawl hi lo ka hi hiam? Bang hangin hong pai lo na hi hiam? Nang hong liansak lah ding ka hi hiam?” a ci hi.

³⁸Balaam in Balak kiangah, “En in, na kiang hong tung ing! Thu khatpeuh ka gen theih nading vangliatna nei ka hi hiam? Pasian in hong sawl thu bek ka gen ding hi,” a ci hi.

³⁹Tua ciangin Balaam in Balak zui a, Kiriathhuzoth khua-ah a tung uh hi.

⁴⁰Balak in bawngtalte le tuute tawh biakna pia-in Balaam le amah tawh a om uliante kiangah a puak hi.

⁴¹A zing ciangin Balak in Balaam samin Bamothbaal munah paipihto hi. Tua lai panin amah in Israel mi a madawk pente galmuh thei hi.