Read Tedim Chin GAMLAK VAKNA 23 Bible Online

GAMLAK VAKNA 23 - Tedim Chin bible

GAMLAK VAKNA 23

¹Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, kei a dingin bawngtal sagih le tuutal sagih hong pia in,” a ci hi.

²Balaam’ gen bangin Balak gamta a, Balak le Balaam in biakna tau simah bawngtal khat le tuutal khat ciat a pia uh hi.

³Balaam in Balak kiangah, “Na meihal biakna kiangah na ding in; kei ka va pai ding hi. Kei hong dawn dingin TOPA hong pai kha ding hi. Amah in kei hong lah khempeuh nang kiangah kong gen ding hi,” a ci hi. Tua ciangin a sang mual dawn pawn khatah amah a paito hi.

⁴Pasian in Balaam na dawn hi. Balaam in ama kiangah, “Biakna tau sagih ka bawl khin a, biakna tau simah bawngtal khat le tuutal khat ciat ka pia hi,” a ci hi.

⁵TOPA in Balaam kiangah thu gen a, “Balak kiangah ciahkikin hih bangin na gen ding hi,” a ci hi.

⁶Balak kiangah a ciahkik ciangin amah le Moab uliante khempeuh ama meihal biakna gei-ah na ding uh hi.

⁷Balaam in a thugen ding teng genin: “Aram panin Balak in kei hong paipih a, nisuahna mualte panin Moab kumpipa in kei hong paipih hi: ‘Hong pai in, Israel mite mawhsak in!’ hong ci hi.

⁸Pasian’ samsiat loh mite bangci samsiat ding ka hi hiam? TOPA’ mawhsak loh mite bangci mawhsak ding ka hi hiam?

⁹Bang hang hiam cih leh mual dawn panin amaute ka mu a, mual neute panin amaute ka en hi. En in, a tangten’ mite, minamte lakah a kihel lote!

¹⁰Leivui zahin a tam Jakob mite, kua in a mal simzo ding a, Israel mi phazah a mal simzo ding ahi hiam? Mi thuman pa’ sihna bangin hong sisak inla, ka mailam thu ama a’ bang hisak in!” a ci hi.

¹¹Tua ciangin Balak in Balaam kiangah, “Kei bang hong cih na hi hiam? Ka galte a samsia dingin nang kong sam a, ahi zongin amaute bangmah cih loin, amaute thupha na pia zawsop hi,” a ci hi.

¹²Amah in, “TOPA in ka gen dingin hong sawl thu, don lo ding ka hi hiam?” ci-in a dawng hi.

¹³Tua ciangin Balak in ama kiangah, “Amaute na muh theih nading mun dangah kei hong zui in. Amaute a madawk teng bek na mu ding a, a vekpi-in na mu kei ding hi. Tua ciangin tua lai panin amaute nong samsiatsak ding hi,” a ci hi.

¹⁴Tua ciangin amah in Zofim gamlak, Pisgah mual dawnah amah paipihin, biakna tau sagih bawl a, biakna tau simah bawngtal khat le tuutal khat ciat a pia hi.

¹⁵Balaam in Balak kiangah, “Hua lamah TOPA tawh ka va kituah kalun na meihal biakna gei hih lai-ah na ding in,” a ci hi.

¹⁶TOPA in Balaam na dawnin ama kiangah, “Balak kiangah ciahkikin hih bangin thu na gen ding hi” a ci hi.

¹⁷Balak kiangah a paikik ciangin a meihal biakna gei-ah amah na ding a, Moab uliante tawh na om uh hi. Balak in ama kiangah, “TOPA in bang hong gen ahi hiam?” a ci hi.

¹⁸Tua ciangin Balaam in a thugen ding teng genin: “Balak aw, ka thugen ding za in. Zippor’ tapa aw, ka thu ngai in:

¹⁹A zuau dingin Pasian pen mihing hi lo a, a kisik dingin mihing’ tapa hi lo hi. Amah in gen khin hi; a gen bangin hih lo ding ahi hiam? Amah in ci khin hi; a cih bangin tungsak lo ding ahi hiam?

²⁰En in, thupha piak ding thu ka ngah hi. Amah in thupha pia khin a, ke’n ka kheelkik thei kei hi.

²¹Amah in Jakob mite tungah mawhna mu lo a, Israel mite tungah gamtatsiatna mu lo hi. TOPA amau’ Pasian, amaute tawh om a, kumpipa phatna awging amaute’ lakah om hi.

²²Pasian in Egypt panin amaute paikhiatpih a, amaute in gamsial tha bang hatna nei uh hi.

²³Bang hang hiam cih leh Jakob mite a kibum nading om lo a, Israel mite’ langkhatah aisan ding om lo hi. Tu-in Israel-te tawh kisai-in, ‘Pasian’ sepna en un,’ kici ding hi.

²⁴En un, hua mite! Humpinelkai bangin thoto a, humpinelkai bangin kaangto hi. A an a nek mateng, amaute’ si a dawn mateng, lumsuk lo hi,” a ci hi.

²⁵Tua ciangin Balak in Balaam kiangah, “Amaute samsia peuhmah kei inla, thupha zong pia peuhmah kei in,” a ci hi.

²⁶Ahih hangin Balaam in Balak kiangah, ” TOPA’ cih khempeuh keimah in ka hih ding hi,’ hong ci hi lo ka hi hiam?” ci-in a dawng hi.

²⁷Balak in Balaam kiangah, “Tu-in hong pai in; mun dangah kong paipih ding hi. Tua lai panin amaute nong samsiatsak nading Pasian in hong lungkimpih kha ding hi,” a ci hi.

²⁸Tua ahih ciangin Balak in sehnel gam a kimuh sukna Peor mual dawnah Balaam paipih hi.

²⁹Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, bawngtal sagih le tuutal sagih hih lai-ah hong pia in,” a ci hi.

³⁰Balaam’ cih bangin Balak in hih a, biakna tau simah bawngtal khat le tuutal khat ciat a pia hi.