Read Tedim Chin GAMLAK VAKNA 24 Bible Online

GAMLAK VAKNA 24 - Tedim Chin bible

GAMLAK VAKNA 24

¹Israel-te thupha piak ding in TOPA lungkimsak ahihna Balaam in a muh ciangin, a hun dang a bangin kihilna lim a mu dingin pai lo a, a maitang gamlak lam ngat hi.

²Balaam khuadak a, a nam namin Israel-te in giahphual a sat a mu hi. Pasian’ Kha ama tungah hong tung a,

³amah in a thugen ding teng genin: “Beor’ tapa Balaam’ thugen, a mit in khua a mu thei mipa’ thugen,

⁴Pasian’ thute a za, Vanglianpa’ maangmuhna a mu, maang mu napi-in a mit in khua a mu thei mipa’ thugen:

⁵Jakob mite aw, na puanbukte uh bangzahin hoih ahi hiam? Israel mite aw, na giahphual uh bangzahin hoih ahi hiam?

⁶Saupi a kiphah kuamte tawh kibang a, gun gei-a om huante tawh kibang hi. TOPA in a suan aloes paknamtui kungte tawh kibang a, tuipi gei-a om taamtak kungte tawh kibang hi.

⁷A phelkhaite panin tui luang ding a, a khaici in tui tampi ngahin, a kumpipa uh, Agag sangin lianzaw ding a, ama kumpi gam kiliansak ding hi.

⁸Pasian in Egypt gam panin amaute paikhiatpih a, gamsial bangin amaute thahat uh hi. Amaute in a gal uh ahi minam dangte sugawp ding uh a, amau’ guhte suzan gawp ding uh a, a thaltang uh tawh amaute kaplet ding uh hi.

⁹Amaute bok a, humpinelkai pa bangin lumsuk uh hi. Humpinelkaipi bangin lumsuk uh hi. Kua in amaute phong ngam ding ahi hiam? Note thupha hong piate in thupha ngah hen la, note hong samsiate in samsiatna ngah ta hen,” a ci hi.

¹⁰Balaam’ tungah Balak heh mahmah a, amah in a khut le a khut a tuum hi. Balak in Balaam kiangah, “Ka galte a samsia dingin nang kong sam hi. En in, nang in amaute thumvei tak thupha na pia khinzo hi.

¹¹Tua ahih ciangin tu-in na omna munah tai in. ‘Nang kong min liansak ding hi,’ ka hong ci hi. Ahih hangin na min liat nading panin TOPA in nang hong khaktan hi,” a ci hi.

¹²Balaam in Balak kiangah, “Kei kiangah nong sawl na kamtaite kiangah,

¹³‘Balak in kham le ngun tawh a kidim ama inn hong pia ding hitaleh zong, TOPA’ thu banah keima thu-in a pha bawl ding ahi a, a sia bawl ding ahi zongin bangmah ka hih thei kei hi. TOPA’ gente bek keimah in ka gen ding hi,’ ci-in gen khin hi lo ka hi hiam?

¹⁴“Tu-in en in, ka mipihte kiangah ka pai ding hi. Hong pai in; nidang ciangin hih mite in na mite’ tungah a bawl dingte kong theisak ding hi,” a ci hi.

¹⁵Amah in a thugen ding teng genin, “Beor’ tapa Balaam’ thugen, a mit in khua a mu thei mipa’ thugen,

¹⁶Pasian’ thute a za, Sang Pen pa’ thugen a thei, Vanglianpa’ maangmuhna a mu, maang mu napi-in a mit in khua a mu thei mipa’ thugen in:

¹⁷Amah ka mu hi; ahih hangin tunai hun hi lo hi: Jakob sung pan aksi khat hong suakkhia ding a, Israel sung pan kumpi ciangkhut hong piang ding hi. Tua in Moab thaltang satkham ding a, Sheth’ suante khempeuh sugawp ding hi.

¹⁸Israel gualzo ding a, Edom mite kisuankhia ding a, a galte ahi Seir zong, kisuankhia ding hi.

¹⁹Jakob tawh ukna na kisem ding a, khuapi sunga a suaktate kisusia ding!” a ci hi.

²⁰Tua ciangin amah in Amalek mite enin, ama thugen ding teng genin, “Amalek, minamte lakah a masa pen hi a, ahih hangin a tawpna-ah siatna a tuak ding hi,” a ci hi.

²¹Tua ciangin amah in Ken mite enin, ama thugen ding teng genin, “Na omna mun kho a, suangpi sungah na bu kibawl hi.

²²Ahih hangin Kain bei ding hi. Asher in galmatin nang bang tanvei hong nei ding ahi hiam?” a ci hi.

²³Amah in a thugen ding a omlai teng genin, “Ala! Pasian in hihte a hih ciangin kua nungtazo ding ahi hiam?

²⁴Ahih hangin Kittim panin teembawte hong pai-in Asshur le Eber gimsak ding a, amah in zong siatna tuak ding hi,” a ci hi.

²⁵Tua ciangin Balaam dingin ama gamah ciahkik a, Balak zong a ciah hi.