Read Tedim Chin GAMLAK VAKNA 25 Bible Online

GAMLAK VAKNA 25 - Tedim Chin bible

GAMLAK VAKNA 25

¹Shittim-ah Israel mite a om laitakin Moab gam numeite tawh paktat ding kipan uh hi.

²Hih numeite in amau’ pasian biakpiakna pawi-ah Israel mite sam uh a, amaute in a pawi an nekpihin, amau’ pasian-te’ mai-ah kun uh hi.

³Tua ahih ciangin Peor-a Baal tawh Israel mite va kizomtawm hi. Israel mite tungah TOPA heh mahmah a,

⁴TOPA in Moses kiangah, “Israel mite’ tung panin TOPA’ hehna a kihtakhuai a bei theih nadingin mite’ ukpite khempeuh man inla, TOPA’ mai-ah suntangin amaute khai in,” a ci hi.

⁵Moses in Israel thukhente kiangah, “Note khempeuh in Peor-a Baal tawh a va kizomtawm na mite khempeuh uh na that ciat ding uh hi,” a ci hi.

⁶Kikhopna bukkongah amaute kapin a om laitak, Moses’ muhna le Israel mihon buppi’ muhna-ah Israel mite khat hong pai-in, Midian numei khat ama innkuanpihte kiangah hong ciahpih hi.

⁷Siampi Aaron’ tapa Eleazar, Eleazar’ tapa Finehas in a muh ciangin dingin mihonte’ lak panin paikhia a, a khutah teipi khat tawi-in

⁸Israel mipa inndei sungah zui a, Israel mipa le a numei, a numei’ pumpi pailetin a nihin sun khawm hi. Tua bangin Israel mite’ sung panin gimna dai hi.

⁹Ahi zongin gimna tawh a si mite tul sawmnih le tulli ahi hi.

¹⁰TOPA in Moses kiangah,

¹¹“Siampi Aaron’ tapa Eleazar, Eleazar’ tapa Finehas in Israel mite tungah ka hehna damsakkik hi. Keimah in pammaih ka sak bangin amah in pammaihsa ahih ciangin pammaih ka sakna tawh Israel mite ka beisak kei hi.

¹²Tua ahih ciangin, ‘En in, ka thuciam ahi nopsakna, amah ka pia hi.

¹³Ama tung le ama khitah a suanlekhakte tungah tawntung siampi hihna thuciamna hi ding hi; bang hang hiam cih leh ama Pasian a’ ding amah in pammaih saksak a, Israel mite a ding kilemna bawlsak hi,’ ci in,” a ci hi.

¹⁴Midian numei tawh a kithat khawm, Israel mi a kithat pa’ min pen Simeon mite sung panin a beh lutang Salu’ tapa Zimri ahi hi.

¹⁵Midian numei a kithatnu’ min pen Midian innkuan sungah a beh lutang ahi Zur’ tanu Kozbi ahi hi.

¹⁶TOPA in Moses kiangah,

¹⁷“Midian mite gimsakgawp inla, amaute vatgawp in;

¹⁸bang hang hiam cih leh amaute in a khelpilna uh tawh note hong gimsakgawp uh a, Peor tawh kisai thu le Peor’ hangin gimna ni-in a kithat, amau’ sanggamnu, Midian uliante’ tanu Kozbi thu-ah note hong khem uh hi,” a ci hi.