Read Tedim Chin GAMLAK VAKNA 27 Bible Online

GAMLAK VAKNA 27 - Tedim Chin bible

GAMLAK VAKNA 27

¹Tua ciangin Josef’ tapate sung panin Manasseh’ tapa Makhir, Makhir’ tapa Gilead, Gilead’ tapa Hefer, Hefer’ tapa Zelofehad’ tanute a nai-ah hong pai uh hi. Ama tanute’ minte in: Mahlah, Noah, Hoglah, Milkah, le Tirzah ahi hi.

²Amaute, Moses’ mai le siampi Eleazar’ mai le makaite’ mai le mihonte khempeuh’ mai, kikhopna bukkongah ding uh a,

³“Ka pa uh gamlakah a si hi. Korah tawh kipawlin TOPA langpangin a kikaikhawm mihonte lakah amah kihel lo hi. Ahih hangin ama khialhna hangin si a, amah in tapa nei lo hi.

⁴Amah in tapa a neih loh man bekin bang hangin a beh sung panin ka pa uh’ min mangthang ding ahi hiam? Ka pa uh sanggamte’ lakah kote zong neihsa hong pia un,” a ci uh hi.

⁵Moses in TOPA’ mai-ah amau’ thu a gen hi.

⁶TOPA in Moses kiangah,

⁷“Zelofehad’ tanute’ thugen man hi. Amau’ pa’ sanggamte lakah neihsa gamh amaute tungah na pia ding a, amau’ pa’ gamh amaute’ tungah na tungsak ding hi.

⁸Israel mite tungah hih bangin na gen ding hi: ‘Pasal khat si-in, tapa a neih kei leh, ama gamh a tanu na luahsak ding uh hi.

⁹Amah in tanu a neih kei leh, ama gamh a sanggam pasalte tungah na tungsak ding uh hi.

¹⁰Amah in sanggam pasal a neih kei leh, ama gamh ama pa’ sanggam pasalte tungah na pia ding uh hi.

¹¹Ama pa in sanggam pasal a neih kei leh, ama gamh ama innkuan tawh a kinai ama behpa’ tungah na pia ding uh a, amah in tang ding hi. TOPA in Moses a thupiak bangin hih pen Israel mite tungah thukham le ngeina kip hi ding hi,’ ci in,” a ci hi.

¹²TOPA in Moses kiangah, “Hih Abarim mual tungah paito inla, Israel mite’ tungah ka piak leitang en in.

¹³Na muh khit ciangin na sanggampa Aaron mah bangin nang zong na mite kiang na zuan ta ding hi. Bang hang hiam cih leh,

¹⁴mihonpite a kitot lai-un tui phualah keimah sianthosak ding hunin Zin gamlakah keima thu nong lehpan’ hi,” a ci hi. (Hihte pen Zin gamlak, Kadesh gam Meribah tui a thupiangte a cihna ahi hi.)

¹⁵Moses in TOPA kiangah,

¹⁶“Topa’ mihonte, a cing nei lo tuute a bat loh nadingin amaute’ mai-ah paikhia-in amaute’ mai-ah a tum ding, amaute paikhiatpihin amaute a ciahpih ding, mihonte a uk dingin, TOPA, mi khempeuh tungah nuntakna a pia Pasian ahi nangmah in mi khat seh in,” a ci hi.

¹⁸TOPA in Moses kiangah, “Nun’ tapa Joshua, siamna a nei mipa la inla, ama tungah na khut nga in.

¹⁹Siampi Eleazar le mihon khempeuh mai-ah amah na dingsak ding a, amaute’ muhna-ah amah za na pia ding hi.

²⁰Israel mihon khempeuh in ama thu a man’ theih nadingin thuneihna pawlkhat amah na guan ding hi.

²¹Siampi Eleazar’ mai-ah amah ding ding a, amah in TOPA’ mai-ah Urim thukhenna tawh thu dotsak ding hi. Amah le amah tawh a om Israel mi khempeuh, mihon buppi, ama thu tawh pusuak ding uh a, ama thu mah tawh sungtum ding uh hi,” a ci hi.

²²TOPA in amah a thupiak bangin Moses gamta a, amah in Joshua la-in siampi Eleazar le mihon buppi mai-ah dingsak a,

²³amah in ama tungah a khutte nga-in, TOPA in ama tungah a gen bangin Joshua tungah za a pia hi.