Read Tedim Chin GAMLAK VAKNA 29 Bible Online

GAMLAK VAKNA 29 - Tedim Chin bible

GAMLAK VAKNA 29

¹“A kha sagihna a ni masa ni-in kikhopna siangtho khat na nei ding uh a, tua ni-in leitung nasep na sem kei ding uh hi. Tua ni pen note in peengkul na tum ni ding uh hi a,

²meihal biakna, TOPA’ tungah a gim namtui na piak dingte un: Bawngtalno khat, tuutal khat, le kum khat a pha tuuno a pa sagih, a vekpi-in a sitbaang lo hi ding hi.

³Bawngtal tawh piak dingin sathau tawh a kibawl annel ahi an tawh biaknate lawh thum, tuutal tawh lawh nih,

⁴le tuuno sagihte khat ciangin lawh khat hi ding hi.

⁵Note a dingin kilemna bawl nadingin khialhna hanga biakna-in keel a pa khat zong hi ding hi.

⁶A khasim meihal biakna le an tawh biakna , le a kitatsat lo-a meihal biakna le an tawh biakna , le tuate a’ ding ngeina a om bangin a gim namtui, TOPA’ tungah mei tawh kihal biakna ahi leenggahzu tawh biaknate banah hi ding hi.

⁷“Hih kha sagihna a ni sawm ni-in a siangtho kikhopna khat na nei ding uh a, an tangin tua ni-in na na sem kei ding uh hi.

⁸TOPA’ tungah a gim namtui meihal biakna na piak dingte un: Bawngtalno khat, tuutal khat, le kum khat a pha tuuno a pa sagih hi ding a, tuate pen note’ muhna-ah a sitbaang lo hi ding hi.

⁹Sathau tawh a kibawl annel tawh biaknate pen, bawngtal tawh piak khawm dingin lawh thum, a tuutal tawh lawh nih,

¹⁰tuuno sagihte khat ciangin lawh khat hi ding hi.

¹¹Kilem nadingin khialhna hanga biakna le a kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

¹²“A kha sagihna ni sawm le ni nga ni-in a siangtho kikhopna khat nei-in tua ni-in leitung nasep na sem kei ding uh a, TOPA a dingin ni sagih sung pawi na kham ding uh hi.

¹³A ni masa ni-in meihal biakna, TOPA’ tungah a gim namtui, mei tawh kihal biak nadingin bawngtalno sawm le thum, tuutal nih, kum khat a pha tuuno a pa sawm le li na pia ding uh a, tuate a sitbaang lo hi ding hi.

¹⁴Sathau tawh a kibawl annel ahi an tawh biaknate pen, bawngtal sawm le thumte khat ciangin lawh thum, tuutal nihte khat ciangin lawh nih,

¹⁵le tuuno sawm le lite khat ciangin lawh khat hi ding hi.

¹⁶A kitatsat lo-a meihal biakna, an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

¹⁷“A ni nih ni-in bawngtalno sawm le nih, tuutal nih, le kum khat a pha tuuno a pa sawm le li, a vekpi-in a sitbaang lo,

¹⁸ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi.

¹⁹A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

²⁰“A ni thum ni-in bawngtal sawm le khat, tuutal nih, le kum khat a pha tuuno a pa sawm le li, a vekpi-in a sitbaang lo,

²¹ngeina kip om bangin a phazah tawh kizui-in bawngtalte, tuutalte, le tuunote tawh piak bangin an tawh biakna le leenggahzu tawh biaknate zong hi ding hi.

²²A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

²³“A ni li ni-in bawngtal sawm, tuutal nih, le kum khat a pha tuuno a pa sawm le li, a vekpi-in a sitbaang lo,

²⁴ngeina om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi.

²⁵A kitatsat lo-a meihal biakna, an tawh biakna , le leenggahzu tawh biaknate banah khialhna hanga biakna-in keel a pa khat zong hi ding hi.

²⁶“A ni nga ni-in bawngtal kua, tuutal nih, le kum khat a pha tuuno a pa sawm le li, a vekpi-in a sitbaang lo,

²⁷ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi.

²⁸A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

²⁹“A ni guk ni-in bawngtal giat, tuutal nih, le kum khat a pha tuuno a pa sawm le li, a vekpi-in a sitbaang lo,

³⁰ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi.

³¹A kitatsat lo-a meihal biakna, an tawh biakna , le leenggahzu tawh biaknate banah khialhna hanga biakna-in keel a pa khat zong hi ding hi.

³²“A ni sagih ni-in bawngtal sagih, tuutal nih, le kum khat a pha tuuno a pa sawm le li, a vekpi-in a sitbaang lo,

³³ngeina kip om bangin a phazah tawh kizui-in bawngtalte, tuutalte, le tuunote tawh piak dingin an tawh biakna le leenggahzu tawh biaknate zong hi ding hi.

³⁴A kitatsat lo-a meihal biakna, an tawh biakna , le leenggahzu tawh biaknate banah khialhna hanga biakna-in keel a pa khat zong hi ding hi.

³⁵“A ni giat ni-in a thupi kikhopna khat na nei ding uh a, tua ni-in leitung nasep na sem kei ding uh hi.

³⁶Meihal biakna, mei tawh kihal biakna, TOPA’ tungah a gim namtui na piak dingte un: Bawngtal khat, tuutal khat, kum khat a pha tuuno a pa sagih, a vekpi-in a sitbaang lo,

³⁷ngeina kip om bangin bawngtal, tuutal, le tuunote a phazah tawh kizui-in piakkhawm dingin an tawh biakna le leenggahzu tawh biaknate zong hi ding hi.

³⁸A kitatsat lo-a meihal biakna le an tawh biakna le leenggahzu tawh biaknate banah khialhna hanga biakna-in keel a pa khat zong hi ding hi.

³⁹“Na thuciam biakpiakna uh le utthu-a na biakpiaknate uh banah na meihal biaknate, le an tawh na biaknate, le leenggahzu tawh na biaknate, le thunuama na biak nadingun a kiseh na pawi hunte uhah hihte, TOPA’ tungah na pia ding uh hi,” a ci hi.

⁴⁰TOPA in Moses a thupiak bangin amah in Israel mite tungah a thu a kimin a gensawn hi.