Read Tedim Chin GAMLAK VAKNA 31 Bible Online

GAMLAK VAKNA 31 - Tedim Chin bible

GAMLAK VAKNA 31

²“Israel mite’ phu Midian-te tungah la in. Tua khit ciangin na mipihte kiang na zuan ding hi,” a ci hi.

³Tua ahih ciangin Moses in mite kiangah, “Midian-te’ tungah TOPA’ phulakna a sem ding, Midian-te a do dingin note’ lak panin mi pawlkhat galhiam guan un.

⁴Israel minamte nam khat panin mi tulkhat ciat gal sungah na kuansak ding uh hi,” a ci hi.

⁵Tua ahih ciangin Israel mi tul tampi sung panin minam khatah tulkhat, tul sawm le tulnih galdo dingin galhiam kiguan’ hi.

⁶Moses in amaute, minam khat panin tulkhat ciat, biakinn nate le pataukoh nadingin peengkulte siampi Eleazar’ tapa Finehas kengsakin ama makaihna tawh gal sungah a kuansak hi.

⁷TOPA in Moses a thupiak bangin Midian-te do uh a, pasal khempeuh that uh hi.

⁸Amaute in midangte le Midian kumpi ngate Evi, Rekem, Zur, Hur, le Reba a thahna uhah, Beor’ tapa Balaam zong namsau tawh that khawm uh hi.

⁹Israel-te in Midian nupite le a tate uh manin, a bawngte, a tuuhonte khempeuh le a na khempeuh uh laksak uh hi.

¹⁰Amau’ tenna a khuapi khempeuh uh le a giahphual khempeuh uh mei tawh halsak uh a,

¹¹a matsa khempeuh uh, mihing ganhing ciahpih khin uh hi.

¹²Tua ciangin amaute in Jerikho nai, Jordan kiang, Moab zanglei-a a giahphual uh a Moses le siampi Eleazar le Israel mihonte kiangah a galmatte uh le a na lakte uh tunpih uh hi.

¹³Moses, siampi Eleazar, le mihon makaite khempeuh zong giahphual pua-ah vai dawn dingin pai uh hi.

¹⁴Galdona panin a hong ciah mi tul tampi a ukte le mi za tampi a uk galkap uliante’ tungah Moses heh hi.

¹⁵Moses in amaute tungah, “Numei khempeuh hingkhawi na hi uh hiam?

¹⁶En un, hih mite in Balaam’ lamlahna tawh Peor-ah TOPA’ tungah Israel mite zuautatsak hi. Tua ahih manin TOPA’ mihonte lakah gimna hong tung hi.

¹⁷Tua ahih ciangin tu-in, a khangnote lakah pasal peuhmah that unla, pasal tawh a lumkhawmsa numei peuhmah zong that un.

¹⁸Ahih hangin pasal tawh a lumkhawm nai lo nungaknote khempeuh note a dingin kem un.

¹⁹Tu-in note lakah mi khat peuhpeuh a thatte le a kithatsa a lawng mi peuhmahte, giahphual pua-ah ni sagih sung om un. A ni thum ni le a ni sagih ni-in note le na galmatte uh na kisiansuah ding uh hi.

²⁰Puan khempeuh, savun tawh a kibawl na khempeuh, keel mul tawh a kibawl na khempeuh, le sing tawh a kibawl na khempeuh na siansuah ding uh hi,” a ci hi.

²¹Siampi Eleazar in galdona-ah a va kuan galkapte tungah, “TOPA in Moses a thupiak thukham ngeina hih bang ahi hi:

²²Kham, ngun, sumngo, sik, dal, le haknaw,

²³mei a do zo peuhmahte bek mei-ah na hal ding uh a, a siang hi ding hi. Ahi zongin mei a do zo lo peuhmahte, nitna siansuahna tui tawh kisiansuah ding a, tui-ah na sawp ding uh hi.

²⁴A ni sagih ni-in na puante uh na sawp ding uh a, note a siangtho na hi ding uh hi. Tua khit ciangin giahphual ah nong ciahkik thei pan ding uh hi,” a ci hi.

²⁵TOPA in Moses kiangah,

²⁶“Nang le siampi Eleazar le mihon beh lutangte in gal sunga a kiman mihing le ganhingte sim un.

²⁷Gal sunga a kingahte khen nih suah inla, galdo dingin a kuan galhangte le inn-a om mihonte tungah a kikimin hawmsak in.

²⁸Galdo dingin a kuankhia galkapte’ tung panin mite, bawngtalte, late, le tuuhonte zanga ciangin TOPA’ siah dingin khat ciat la in.

²⁹Alang a ngah uh sung panin la inla, TOPA’ tungah biakna-in siampi Eleazar tungah pia in.

³⁰Israel mihonte in alang a ngah uh sung panin mite, bawngtalte, late, tuuhonte, ganhing khempeuh, sawmnga ciangin khat ciat la inla, TOPA’ biakbuk a kem Levi mite tungah pia in,” a ci hi.

³¹TOPA in Moses a thupiak bangin Moses le siampi Eleazar in a sem uh hi.

³²Tu-in galkapte in a lak gal sunga a mat uh a omlai a kihawm dingte: Tuu tul zaguk le tul sawmsagih le tulnga,

³³bawng tul sawmsagih le tulnih,

³⁴la tul sawmguk le tulkhat,

³⁵le pasal tawh a lumkhawm nai lo nungak a vekpi-in tul sawmthum le tulnih ahi hi.

³⁶Alang ahi, gal sungah a kuankhia mite’ ngah pen tuu tul zathum le tul sawmthum le tulsagih le zanga hi a,

³⁷TOPA’ tuusiah pen tuu zaguk le sawmsagih le nga ahi hi.

³⁸Bawngte tul sawmthum le tulguk hi a, TOPA’ siah sawmsagih le nih ahi hi.

³⁹Late tul sawmthum le zanga hi a, tua sung panin TOPA’ siah sawmguk le khat ahi hi.

⁴⁰Nungak tul sawm le tulguk hi a, tua sung panin TOPA’ siah nungak sawmthum le nih ahi hi.

⁴¹TOPA in Moses a thupiak bangin Moses in siampi Eleazar’ tungah TOPA biak nading siah a pia hi.

⁴²Galdo dingin a kuankhia mite a dingin Moses in a khenkhiat zah mah Israel mihonte in ngah uh a,

⁴³mihonte in a ngah alang teng pen tuu tul zathum le tul sawmthum le tulsagih le zanga,

⁴⁴bawng tul sawmthum le tulguk,

⁴⁵la tul sawmthum le zanga,

⁴⁶nungak tul sawm le tulguk ahi hi.

⁴⁷Israel-te in a ngah alang sung panin Moses in mihing le ganhing sawmnga ciangin khat ciat la-in, TOPA in ama tungah a thupiak bangin TOPA’ biakbuk a kem Levi mite tungah a pia hi.

⁴⁸Tua ciangin galkap tul tampite tunga uliante ahi, tul tampi a ukte le za tampi a ukte, Moses kiangah hong pai uh a,

⁴⁹“Kote’ ukna nuai-a a om galkapte, na nasem kote in ka sim khin uh a, kote’ kiang panin mi khat zong a pelhem om lo hi.

⁵⁰Kote in TOPA’ mai-ah ko a dingin kilemna bawl nading, TOPA biak nadingin kham tawh a kibawl nate, banbuhte le taaute, min gelhna zungbuhte, bilbahte, le khite ka muh ciat uh kong puak uh hi,” hong ci uh hi.

⁵¹Moses le siampi Eleazar in amaute’ tung panin na-a a kibawl khamte a sang uh hi.

⁵²Tul tampi a ukte le za tampi a ukte’ tung panin a kingah, TOPA’ tungah biakna-in a piak uh khamte khempeuh shekel tul sawm le tulguk le zasagih le sawmnga a gik hi.

⁵³(Gal sunga a kuan mite in amau a’ ding ciat a la uh hi.)

⁵⁴Moses le siampi Eleazar in tul tampi le za tampi a uk mite’ tung panin khamte sang uh a, Israel mite a dingin TOPA’ mai-ah phawk tawntungna-in kikhopna buk sungah a koih uh hi.