Read Tedim Chin GAMLAK VAKNA 32 Bible Online

GAMLAK VAKNA 32 - Tedim Chin bible

GAMLAK VAKNA 32

¹Reuben minamte le Gad minamte in ganhing hon tampi nei uh hi. Amaute in Jazer gam le Gilead gam a muh uh ciangin gan khawi nading munin hoihsa mahmah uh hi.

²Tua ahih ciangin Gad minamte le Reuben minamte pai-in Moses le siampi Eleazar le mihon makaite kiangah,

³“Ataroth, Dibon, Jazer, Nimrah, Heshbon, Elealeh, Sebam, Nebo, le Beon

⁴TOPA in Israel mihonte a hong luahsak gamte pen a gan gam hi a, na nasem kote in gan ka nei uh hi.

⁵Nong hehpihna-un hih gam hong pia unla, Jordan kantanin kote hong paipih kei un,” a ci uh hi.

⁶Ahih hangin Moses in Gad minamte le Reuben minamte tungah, “Note hih laitakah om hithiatin na sanggamte uh gal sungah kuan ding ahi hiam?

⁷TOPA in amaute a piakna gamah a pai nading uhah Israel mite bang hangin lungkiasak ding na hi uh hiam?

⁸Na pu na pate uh Kadeshbarnea panin gam vel dingin ka sawl lai-in zong tu-a mah a bang uh hi.

⁹Bang hang hiam cih leh amaute Eshkol Kuam-ah paito-in tua gam a muh uh ciangin, TOPA in amaute a piakna gamah a pai nading uhah Israel mite lungkiasak uh hi.

¹⁰Tua hunin TOPA heh mahmah ahih manin amah kiciamin,

¹¹‘Amaute in kei hong zui taktak lo uh ahih manin Egypt gam pan a paikhia mite kum sawmnih panin a tungsiah peuhmah khat beek in, Abraham, Isaac, le Jakob tungah piak dingin ka ciamsa gam mu lo ding uh hi.

¹²Ahi zongin Kenaz mi Jefunneh’ tapa Kaleb le Nun’ tapa Joshua in TOPA zui taktak uh ahih manin a mu ding uh hi,’ ci hi.

¹³Israel mite tungah TOPA heh a, ama muhna-ah siatna a gamta tua khangmi khempeuh a bei mateng kum sawmli sung gamlakah amaute vak kawikawisak hi.

¹⁴En un, Israel mite tungah TOPA’ hehluatna a khangsakto lai dingin, na pu na pate uh’ tangin hong khang na hi uh hiam!

¹⁵Bang hang hiam cih leh amah zuihna panin note na pial uhleh amah in gamlakah amaute nusia kik ding a, note pen hih mi khempeuh a susia na hi ding uh hi,” a ci hi.

¹⁶Tua ciangin ama kiang nai-ah amaute hong pai-in, “Hih lai-ah ka tuute uh a dingin tuukhawkte bawlin, ka zi ka tate uh a dingin khua ka sat ding uh a,

¹⁷ahih hangin kote in hiam tawi-in amau’ munah Israel mite ka tunpih mateng uh amau’ mai-ah a pai dingin ka kiging ding uh hi. Tua kikal sungin hih gam sungah a teng mite’ kiang pan kihut nadingin khuapi muanhuai sungah ka zi ka tate uh a na om ding uh kisam hi.

¹⁸Israel mite in amau’ luah ding ciat a luah khit matengun ka inn uhah ka ciah kei ding uh hi.

¹⁹Jordan galkhat le tua ban siahah amaute tawh ka luah khawm kei ding uh hi. Bang hang hiam cih leh Jordan hih lamgal nisuahna lam kote’ luah hong suak hi,” a ci uh hi.

²⁰Tua ahih ciangin Moses in amaute kiangah, “Note, tu-a bangin gamta-in, galdo dingin TOPA’ mai-ah a pai dingin hiam la-in,

²¹TOPA in a mai panin a galte a hawlkhiat matengin hiam a tawi note khempeuh in ama mai-ah Jordan kantanin,

²²TOPA’ mai-ah leitang a kilak matengin na om uhleh, TOPA le Israel mite a’ ding na sep ding teng uh a zo khin na hih manun note na ciahkik ding uh a, hih leitang pen TOPA’ mai-ah note’ neihsa hi ding hi.

²³Ahih hangin note tua bangin na gamtat kei uhleh, en un, TOPA’ tungah a khial khin na hi uh hi. Na khialhna un note hong sulzuih ding theitel un.

²⁴Na zi na tate uh a dingin khuapite satin, na tuute uh a dingin tuukhawkte bawl unla, na ciamsa bangun gamta un,” a ci hi.

²⁵Tua ciangin Gad minamte le Reuben minamte in Moses kiangah, “Ka topa’ thupiak bangin na nasemte ka gamta ding uh hi.

²⁶Ka tate uh, ka zite uh, ka tuuhonte uh le ka ganhing khempeuhte uh Gilead gam khuapite-ah na om ding uh hi.

²⁷Kote’ topa in nong thupiak bangin na nasemte, galdo dingin hiam a tawi thei khempeuh, galdo dingin TOPA’ mai-ah ka galkah ding uh hi,” a ci uh hi.

²⁸Tua ahih ciangin Moses in amaute’ thu tawh kisai-in siampi Eleazar’ tung le Israel minam beh lutang khempeuh tungah thu a pia hi.

²⁹Moses in amaute tungah, “Gad minamte le Reuben minamte, TOPA’ mai-ah galdo dingin hiam a tawi thei khempeuh in note tawh Jordan kantanin tua gam hong zawhpih leh, Gilead gam a neih dingun amaute tungah na pia ding uh hi.

³⁰Ahih hangin hiam tawi-in note tawh hong galkah kei uhleh zong amaute in Kanaan gam sungah note mah bangin ngah nei veve ding uh hi,” a ci hi.

³¹Tua ciangin Gad minamte le Reuben minamte in dawng uh a, “Topa aw, TOPA’ thupiak bangin kote ka gamta ding uh hi.

³²Hiam tawi-in TOPA’ mai-ah Kanaan gam sungah ka pai ding uh a, kote’ luah ahi ka neihsa uh Jordan galkhatah kote a’ mahin na kip ding hi,” a ci uh hi.

³³Tua ahih ciangin Moses in Gad minamte, Reuben minamte, le Josef’ tapa Manasseh minam alangte tungah, Amor kumpi Sihon’ gam le Bashan kumpi Og’ gam, a leitang le a khuapite a gam sung tawh, a gam sunga leitang tunga om khuapi khempeuh a pia hi.

³⁴Gad minamte in khuapi muanhuai Dibon, Ataroth, Aroer,

³⁵Atrothshofan, Jazer, Jogbehah,

³⁶Bethnimrah, le Bethharan-te satin, tuute a dingin tuukhawkte a bawl uh hi.

³⁷Reuben minamte in Heshbon, Elealeh, Kiriathaim,

³⁸Nebo, le Baalmeon (a minte kheel ding), le Sibmah khuapite sat uh a, amau’ satsa khuapite’ min a thak a phuak uh hi.

³⁹Manasseh’ tapa Makhir-te beh, Gilead-ah pai-in va la uh a, tua sunga om Amor mite suankhia uh hi.

⁴⁰Moses in Manasseh’ tapa Makhir-te beh tungah Gilead pia a, tua lai-ah amaute a teng uh hi.

⁴¹Manasseh minam sung panin Jair pai-in amau’ khuaneute va la a, tuate Havvothjair, ci-in min a phuak hi.

⁴²Nobah pai-in Kenath le a khuaneute va la a, ama min tamin Nobah a phuak hi.