Read Tedim Chin GAMLAK VAKNA 34 Bible Online

GAMLAK VAKNA 34 - Tedim Chin bible

GAMLAK VAKNA 34

¹TOPA in Moses kiangah,

²“Israel mite kiangah hih bangin gen in: Note tungah ka hong piak Kanaan gamah na lut uh ciangin

³na leitaw lampang uh pen Zin gam panin Edom pang teng hi ding a, leitaw lam na gamgi uh nisuahna lamah Ci Tuipi mong pan kipan ding hi.

⁴Na gamgi uh Akrabbim mual leitaw lamah kawi-in Zin dong banin, Kadeshbarnea leitaw lamah pai ding hi. Tua ciangin Hazaraddar lamah paisuakin Azmon dongah pai ding a,

⁵Azmon panin Egypt Lui lamah kawi-in Tuipi-ah tawp ding hi.

⁶“Nitumna gamgi dingin Tuipi Lian le a gei dungteng na nei ding uh hi; hih pen nitumna lam na gamgi uh hi ding hi.

⁷“Leilu lam na gamgi ding uh pen Tuipi Lian panin Hor Mual dong na ciamteh ding uh hi.

⁸Hor Mual panin Hamath tumna ciang dong na ciamteh ding uh a, gamgi in Zedad dong ban ding hi.

⁹Tua ciangin Zifron dongah gamgi kikhung ding a, a mong pen Hazarenan-ah tawp ding hi; hih pen leilu lam na gamgi uh hi ding hi.

¹⁰“Nisuahna lam na gamgi uh Hazarenan panin Shefam dong na ciamteh ding uh hi.

¹¹Gamgi pen Shefam panin Ain nisuahna lam Riblah dongah paisuk ding hi. Gamgi paisuk lai-in nisuahna lamah Khinnereth tuipi liangko dong ban ding hi.

¹²Jordan dongah gamgi paisuk ding a, a mong pen Ci Tuipi-ah tawp ding hi. Hih pen a kimkota gamgi a nei na leitang uh hi ding hi, ci-in gen in,” a ci hi.

¹³Tua ahih ciangin Moses in Israel mite thu pia-in, “Hih pen minam kua le minam langte tungah piak dingin TOPA in a thupiak, aisanna tawh na luah ding uh leitang ahi hi.

¹⁴Bang hang hiam cih leh Reuben minamte a behbeh le Gad minamte in a behbehin amau’ luah ding ngah khinzo uh a, Manasseh minam alangte in zong ngah khinzo uh hi.

¹⁵Minam nih le minam langte in nisuahna lam, Jerikho nai Jordan galkhatah amau’ luah ding ngah khinzo uh hi,” a ci hi.

¹⁶TOPA in Moses kiangah,

¹⁷“Luah dingin note’ tungah gam a hawm ding mite pen siampi Eleazar le Nun’ tapa Joshua ahi uh hi.

¹⁸Luah dingin gam a hawm dingin minam simah makai khat na la ding hi.

¹⁹Tua na lak ding mite: Judah minam sung panin Jefunneh’ tapa Kaleb ahi hi. Simeon minam panin Ammihud’ tapa Shemuel ahi hi. Benjamin minam panin Khislon’ tapa Elidad ahi hi. Dan minam panin makai khat, Jogli’ tapa Bukki ahi hi. Josef’ tapate’ sung pan: Manasseh minam-ah makai khat, Efod’ tapa Hanniel ahi hi. Efraim minam-ah makai khat, Shiftan’ tapa Kemuel ahi hi. Zebulun minam sung pan makai khat, Parnak’ tapa Elizafan ahi hi. Issakhar minam sung pan makai khat, Azzan’ tapa Paltiel ahi hi. Asher minam sung pan makai khat, Shelomi’ tapa Ahihud ahi hi. Naftali minam sung pan makai khat, Ammihud’ tapa Pedahel ahi hi.

²⁹“Hihte pen Kanaan gamah Israel mite a dingin gamh a hawm dingin TOPA in a thupiak mite ahi hi,” a ci hi.