Read Tedim Chin GAMLAK VAKNA 35 Bible Online

GAMLAK VAKNA 35 - Tedim Chin bible

GAMLAK VAKNA 35

¹Jerikho nai Jordan kiang Moab zanglei-ah TOPA in Moses kiangah,

²“Amaute in amau’ neih a luah uh sung panin ten nadingin Levi mite tungah khuapite a piak dingun Israel mite thu pia in. Khuapi kiima lonona gamte Levi mite tungah na pia ding hi.

³Khuapite pen amau’ tenna hi ding a, a lonona gamte pen amau’ bawngte le a inn ganhingte le a ganhing khempeuh uh a’ ding ahi hi.

⁴Levi mite tungah na piak ding uh khuapi lonona gamte pen khuapikulh panin a kimkot pi tul le zanga ciang ban ding hi.

⁵Khuapi laizang panin na teh ding a, nisuahna lampang pi tulthum, leitaw lampang pi tulthum, nitumna lampang pi tulthum, leilu lampang pi tulthum hi ding a, a laizangah khuapi om ding hi. Hih pen amau’ khuapi lonona taanggam dingin a neih ding uh ahi hi.

⁶Levi mite tungah na piak uh khuapite pen bukna khuapi gukte hi ding a, mi thatte tua lai-ah na taisak ding uh a, tuate’ banah khuapi sawmli le nih na pia thuah ding uh hi.

⁷Levi mite tungah na piak ding uh khuapi vekpi sawmli le giat hi-in, a lonona gamte tawh hi ding hi.

⁸Israel mite’ neihsa sung panin na piak ding khuapite pen minam tamte tung panin tam la-in, minam tawmte tung panin tawm na la ding hi. Amau’ luah gamh tawh a kizui-in Levi mite tungah a khuapite uh a piak ciat ding uh ahi hi,” a ci hi.

⁹TOPA in Moses kiangah,

¹⁰“Israel mite tungah hih bangin gen in: Jordan kantanin Kanaan gamah na tun uh ciangin,

¹¹sawm lopi-in mi khatpeuh a thatkha mi thatte a va tai theih nading, note a dingin bukna khuapi dingin khuapite na teel ding uh hi.

¹²Thu kikhen dingin mihonpi mai-ah a din ma-in mi thatte a sih loh nadingin tua khuapite pen phulapa’ kiang panin note a dingin bukna hi ding hi.

¹³Na piak uh tua khuapite, note’ bukna khuapi gukte hi ding hi.

¹⁴Bukna khuapi dingin Jordan galkhatah khuapi thum, Kanaan gamah khuapi thum na teel ding uh hi.

¹⁵Sawm lopi-in mi khatpeuh a thatkhate a tai theih nadingin hih khuapi gukte pen Israel mite, khualmite, le note’ lakah a peemte a dingin bukna hi ding hi.

¹⁶“Ahih hangin mi khat in na-a kizang sik khat tawh midang khat satin a sih leh, amah mi that hi a, tua mi that pa kithat ding hi.

¹⁷Amah in mi a sih theih nading mah ahi a khutsunga om suang khat tawh a suk a, a sih leh, amah mi that hi a, tua mi that pa kithat ding hi.

¹⁸Tua ahih kei leh, amah in mi a sih theih nading ahi a khutsunga om sing a kibawl hiam khat tawh amah a sat a, a sih leh, mi that hi a, tua mi that pa kithat ding hi.

¹⁹A kinaipih pen khat in a phu la-in mi that pa that ding a, amah a tuahna peuhah that ding hi.

²⁰“Amah in muhdahna tawh sunin, ahih kei leh bukin a khawh-a a sih leh,

²¹tua ahih kei leh galbawlna tawh a khutin tumin a sih leh, tua a tum pa kithat ding hi. Amah mi that hi a, a phulapa in a tuah ciangin tua mipa that ding hi.

²²“Ahih hangin galbawl lopi-in thakhatin amah sunin, ahih kei leh buk lopi-in na khatpeuh tawh amah khawhin,

²³ahih kei leh, amah pen ama gal hi lo, ama siat nading a zong hi lo napi-in, mi a sih theih nading suang khat zangin a muh lohpi-in amah in deng kha-in a sih leh,

²⁴tua mi that pa le a phulapa’ kikalah hih ngeina kipte tawh kizui-in mihonpi in khen ding hi.

²⁵A phulapa’ khutsung panin mihonpi in mi that pa honkhia-in, mihonpi in amah a va taina, bukna khuapi-ah amah puakkik ding a, sathau siangtho a kinilh siampi lianpen pa a sih matengin tua khua-ah a teng ding hi.

²⁶Ahih hangin hun khat peuhpeuhah amah a taina bukna khuapi gamgi khengin a pai a,

²⁷a phulapa in ama bukna khuapi daihual pualamah amah mu-in, a phulapa in mi that pa a thah leh, tua a that pa mawh lo ding hi.

²⁸Bang hang hiam cih leh siampi lianpen pa a sih matengin tua mipa a bukna khuapi sungah a om ding ahi hi. Ahih hangin siampi lianpen pa a sih khit ciangin mi that pa a neihsa leitangah ciahkik thei ding hi.

²⁹“Hihte pen na tenna khempeuh uhah na khang tawntungun thukham le ngeina hi ding hi.

³⁰Khatpeuh in mi khat a thah leh, tecite’ genna siksanin mi that pa kithat ding hi. Ahih hangin teci khat bek’ teci panna siksanin kuamah kithat lo ding hi.

³¹Tua tham loin, sihna thuak dingin a kilawm mipa tat nading sum na sang kei ding uh hi; amah kithat ding hi.

³²Siampi lianpen pa a sih ma-in bukna khuapi-ah a taisa mipa a gamah a ciahkik theih nadingin ama nuntakna tat nading sum na sang kei ding uh hi.

³³Na tenna uh leitang na ninsak kei ding uh hi; bang hang hiam cih leh mi thahna in leitang ninsak a, a that mipa a kithah kei buang leh, tua mi kithahna leitang siansak nading thudang om thei lo hi.

³⁴A laizangah keimah ka tenna leitang na ninsak kei ding uh hi; bang hang hiam cih leh TOPA keimah, Israel mite’ laizangah ka teng hi, ci hi, ci-in gen in,” a ci hi.