Read Tedim Chin GAMLAK VAKNA 5 Bible Online

GAMLAK VAKNA 5 - Tedim Chin bible

GAMLAK VAKNA 5

¹TOPA in Moses kiangah,

²“Amaute in miphakte, ninneite le misi tawh kisukha-in a ninte khempeuh giahphual pua-ah a omsak nadingun Israel mite thu pia in.

³A laizangah keima omna ahi amau’ giahphual a nitsak loh nadingun hih bangin a nin numei le pasal paikhiasakin, giahphual pua-ah na omsak ding uh hi,” a ci hi.

⁴Tua mah bangin Israel mite in hih uh a, giahphual pua-ah amaute hawlkhia uh hi. TOPA in Moses tungah a gen bangin Israel mite in hih uh hi.

⁵TOPA in Moses kiangah,

⁶“Israel mite tungah hih bangin gen in: TOPA’ tungah mite a khialh theihna ahi khialhna khat peuhpeuh, numei ahi a, pasal ahi zongin gamta-in a mawh leh,

⁷a gamtatnasa a khialhna pulak ding hi. Amah in a tatkhialhna-ah a kicingin dinkik ding a, tua tungah nga-ah khat behlapin, a khialhna mi tungah pia ding hi.

⁸Ahih hangin a khialhna mi in tua khialhna hanga ditkikna a sang ding tanau a neih kei leh, a khial mi a dingin kilemna a bawlsakna ahi kilemna tuutal banah, khialhna hanga tua ditkikna pen siampipa a dingin TOPA’ tungah tung ding hi.

⁹Amaute in siampipa tungah a paipih uh biakna peuhmah, Israel mite’ na a siangthote khempeuh, ama a’ hi ding hi.

¹⁰Mi khempeuh’ na a siangthote zong ama a’ hi ding a, mi khatpeuh in siampipa tungah a piak peuhmah ama a’ hi ding hi,” a ci hi.

¹¹TOPA in Moses kiangah,

¹²“Israel mite kiangah hih bangin gen in: Mi khatpeuh’ zi vakvai-in a pasal a palhngulh a,

¹³pasal khat in tua nu luppihin, a pasal in tua thu a theih kei a, tua nu kininsak napi-in kuamah in phawk loin, a khialh laitakin tua nu kiman lo ahih manin a langah a pang ding teci a om loh hangin,

¹⁴a pasal in upmawhna lungsim nei-in, a kininsak tawm a zi a upmawh leh; tua ahih kei leh zong, a numei kininsak lo napi-in, a pasal in upmawhna lungsim nei-in, a zi a upmawh le;

¹⁵tua pa in siampipa kiangah a zi paipihin, tuanu a dingin a kisam biakna, mangbuhham lawh khat paipih ding hi. A tungah sathau sung loin, paknamtui zong koih lo ding hi; bang hang hiam cih leh tua pen upmawhna hanga an tawh biakna, mawhna phawkkik nadinga an tawh biakna ahi hi.

¹⁶“Siampipa in tua nu va paipihin, TOPA’ mai-ah koih ding hi.

¹⁷Siampipa in lei beel khatin tui siangtho la ding a, biakbuk sual tunga om leivui tawmkhat la-in tua tui sungah khah ding hi.

¹⁸Siampipa in TOPA’ mai-ah tua numei koih ding a, numei’ sam phelin, upmawhna hanga an tawh biakna ahi phawkkikna an tawh biakna tua numei tawisak ding hi. Siampipa in ama khut sungah tuisia tawi ding hi.

¹⁹Tua ciangin siampipa in amah kiciamsakin, ‘Na pasal’ ukna nuai-ah na om sungin, kuamah in nang hong luppih loin, nitna lamah a kihel lo na hih leh, hih tuisia panin suakta in.

²⁰Ahih hangin na pasal’ ukna nuai-ah om napi-in nangmah vakvai a, nang le nang kininsakin, na pasal ahi lo midang khat in nang hong luppih leh,

²¹(siampipa in tua numei kiciamsak ding a, tua nu kiangah) TOPA in na pheipi teemsakin na pumpi a pawmsak ciangin, na mite lakah hamsia le kiciamna-a zat dingin TOPA in nang hong bawlin,

²²hih tuisia in na gil sung zui hen la, na pumpi pawmsakin na pheipi teemsak hen,’ ci ding hi. Tua ciangin numei in, ‘Amen, Amen,’ ci ding hi.

²³“Tua ciangin siampipa in laibu khat sungah hih hamsiate gelhin tuisia sungah silkhia ding hi.

²⁴Tua numei a nasak velval thei ding tuisia a dawnsak

²⁵siampipa in numei’ khutsung panin upmawhna hanga an tawh biakna lakhia ding a, TOPA’ mai-ah tua an vei-in biakna tau-ah paipih ding hi.

²⁶Siampipa in phawk nadingin an tawh biakna khut dim khat la-in biakna tau tungah hal ding a, tua khit ciangin a tui pen a numei dawnsak ding hi.

²⁷Amah in a tui a dawnsak khit ciangin, tua nu amahmah kininsakin a pasal tungah thuman loin gamta ahihleh, tua tuisia pen ama sungah tumin nasak velval ding a, a pumpi pawmin a pheipi teem ding a, tua numei pen mite lakah hamsiatna-in kizang ding hi.

²⁸Ahih hangin amahmah a kininsak hi loin a siang ahihleh, tua nu suakta-in ta nei thei ding hi.

²⁹“Zi khat, a pasal’ ukna nuai-ah om napi-in vakvai-in amahmah a kinitsak ciang,

³⁰ahih kei leh pasal khat in upmawhna lungsim nei-in a zi a upmawh ciangin, upmawhna thute-ah zat ding ngeina tu-a bang ahi hi. Siampipa in TOPA’ mai-ah numei koih ding a, hih ngeina khempeuh numei’ tungah zang ding hi.

³¹Hih thu-ah pasal in mawhsakna thuak lo ding a, ahih hangin numei a mawh leh ama mawhna thuak ding hi,” a ci hi.