Read Tedim Chin GAMLAK VAKNA 7 Bible Online

GAMLAK VAKNA 7 - Tedim Chin bible

GAMLAK VAKNA 7

¹Moses in biakbuk dingsakin, tua biakbuk le a nazatte khempeuh sathau nuhin ap a, biakna tau le a nazatte khempeuh sathau nuhin a ap a man ni-in,

²Israel makaite, a beh ukpite, minam makaite ahi a kisim mite a ukte in,

³buk a nei leeng guk le bawngtal sawm le nih TOPA’ mai-ah paipih uh a, leeng khatah makai nih, mi khatah bawngtal khat ciatin sehin a biakna uh pia uh hi. Amaute in biakbuk mai-ah tuate pia uh hi.

⁴Tua ciangin TOPA in Moses kiangah,

⁵“Kikhopna buk nasepna-ah zat dingin amau’ tung panin tuate sang inla, a nasep ciat uh tawh kizui-in Levi mite pia in,” a ci hi.

⁶Tua ahih ciangin Moses in leengte le bawngtalte saangin Levi mite a pia hi.

⁷Amau’ nasep tawh kizui-in Gershon mite tungah leeng nih le bawngtal li pia hi.

⁸Siampi Aaron’ tapa Ithamar’ ukna nuai-ah na a sem Merari mite tungah amau’ nasep tawh kizui-in leeng li le bawngtal giat pia hi.

⁹Ahih hangin Kohath mite tungah bangmah pia lo hi. Bang hang hiam cih leh liangko-ah a puak ding uh a siangtho nate kep ding amaute tavuan kipia hi.

¹⁰Biakna tau sathau a kinuh ni-in a ap nadingin makaite in a biakna uh biakna tau mai-ah pia uh hi.

¹¹TOPA in Moses kiangah, “Biakna tau ap nadingin makai khat in ni khat ciat a biakna uh pia ding uh hi,” a ci hi.

¹²A ni masa ni-a biakna a piapa pen Judah minam, Amminadab’ tapa Nahshon ahi hi.

¹³Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

¹⁴shekel sawm a gik kham pakan khat, paknamtui a dim tawh;

¹⁵meihal biak nadingin bawngtalno khat, tuutal khat, kum khat a pha tuuno a pa khat;

¹⁶khialhna hanga biak nadingin keel a pa khat,

¹⁷le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Amminadab’ tapa Nahshon’ piak ahi hi.

¹⁸A ni nih ni-in Issakhar mite a makai, Zuar’ tapa Nethanel in biakna pia hi.

¹⁹A biak nadingin amah in biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

²⁰shekel sawm a gik kham pakan khat, paknamtui a dim tawh;

²¹meihal biak nadingin bawngtalno khat, tuutal khat, kum khat a pha tuuno a pa khat;

²²khialhna hanga biak nadingin keel a pa khat;

²³le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Zuar’ tapa Nethanel’ piak ahi hi.

²⁴A ni thum ni-in Zebulun mite a makai, Helon’ tapa Eliab ahi hi.

²⁵Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

²⁶shekel sawm a gik kham pakan khat, paknamtui a dim tawh;

²⁷meihal biak nadingin bawngtalno khat, tuutal khat, kum khat a pha tuuno a pa khat;

²⁸khialhna hanga biak nadingin keel a pa khat;

²⁹le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Helon’ tapa Eliab’ piak ahi hi.

³⁰A ni li ni-in Reuben mite a makai, Shedeur’ tapa Elizur ahi hi.

³¹Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

³²shekel sawm a gik kham pakan khat, paknamtui a dim tawh;

³³meihal biak nadingin bawngtalno khat, tuutal khat, kum khat a pha tuuno a pa khat;

³⁴khialhna hanga biak nadingin keel a pa khat;

³⁵le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Shedeur’ tapa Elizur’ piak ahi hi.

³⁶A ni nga ni-in Simeon mite a makai, Zurishaddai’ tapa Shelumiel ahi hi.

³⁷Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

³⁸shekel sawm a gik kham pakan khat, paknamtui a dim tawh;

³⁹meihal biak nadingin bawngtalno khat, tuutal khat, kum khat a pha tuuno a pa khat;

⁴⁰khialhna hanga biak nadingin keel a pa khat;

⁴¹le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Zurishaddai’ tapa Shelumiel’ piak ahi hi.

⁴²A ni guk ni-in Gad mite a makai, Deuel’ tapa Eliasaf ahi hi.

⁴³Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁴⁴shekel sawm a gik kham pakan khat, paknamtui a dim tawh;

⁴⁵meihal biak nadingin bawngtalno khat, tuutal khat, kum khat a pha tuuno a pa khat;

⁴⁶khialhna hanga biak nadingin keel a pa khat;

⁴⁷le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Deuel’ tapa Eliasaf’ piak ahi hi.

⁴⁸A ni sagih ni-in Efraim mite a makai, Ammihud’ tapa Elishama ahi hi.

⁴⁹Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁵⁰shekel sawm a gik kham pakan khat, paknamtui a dim tawh;

⁵¹meihal biak nadingin bawngtalno khat, tuutal khat, kum khat a pha tuuno a pa khat;

⁵²khialhna hanga biak nadingin keel a pa khat;

⁵³le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Ammihud’ tapa Elishama’ piak ahi hi.

⁵⁴A ni giat ni-in Manasseh mite a makai, Pedahzur’ tapa Gamaliel ahi hi.

⁵⁵Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁵⁶shekel sawm a gik kham pakan khat, paknamtui a dim tawh;

⁵⁷meihal biak nadingin bawngtalno khat, tuutal khat, kum khat a pha tuuno a pa khat;

⁵⁸khialhna hanga biak nadingin keel a pa khat;

⁵⁹le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Pedahzur’ tapa Gamaliel’ piak ahi hi.

⁶⁰A ni kua ni-in Benjamin mite a makai, Gideoni’ tapa Abidan ahi hi.

⁶¹Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁶²shekel sawm a gik kham pakan khat, paknamtui a dim tawh;

⁶³meihal biak nadingin bawngtalno khat, tuutal khat, kum khat a pha tuuno a pa khat;

⁶⁴khialhna hanga biak nadingin keel a pa khat;

⁶⁵le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Gideoni’ tapa Abidan’ piak ahi hi.

⁶⁶A ni sawm ni-in Dan mite a makai, Ammishaddai’ tapa Ahiezer ahi hi.

⁶⁷Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁶⁸shekel sawm a gik kham pakan khat, paknamtui a dim tawh;

⁶⁹meihal biak nadingin bawngtalno khat, tuutal khat, kum khat a pha tuuno a pa khat;

⁷⁰khialhna hanga biak nadingin keel a pa khat;

⁷¹le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Ammishaddai’ tapa Ahiezer’ piak ahi hi.

⁷²A ni sawm le khat ni-in Asher mite a makai, Okran’ tapa Pagiel ahi hi.

⁷³Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁷⁴shekel sawm a gik kham pakan khat, paknamtui a dim tawh;

⁷⁵meihal biak nadingin bawngtalno khat, kum khat a pha tuuno a pa khat;

⁷⁶khialhna hanga biak nadingin keel a pa khat;

⁷⁷le thunuama biakpiak nadingin bawngtal nih, tuutal nga, le kum khat a pha tuuno a pa nga ahi hi. Hihte pen Okran’ tapa Pagiel’ piak ahi hi.

⁷⁸A ni sawm le nih ni-in Naftali mite a makai, Enan’ tapa Ahira ahi hi.

⁷⁹Ama piakte pen biakinn shekel tawh kizui-in shekel za le sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak tawh;

⁸⁰shekel sawm a gik kham pakan khat, paknamtui a dim tawh;

⁸¹meihal biak nadingin bawngtalno khat, tuutal khat, kum khat a pha tuuno a pa khat,

⁸²khialhna hanga biak nadingin keel a pa khat;

⁸³le thunuama biakpiak nadingin bawngtal nih, tuutal nga, keel a pa nga, le kum khat a pha tuuno a pa nga ahi hi. Hihte pen Enan’ tapa Ahira’ piak ahi hi.

⁸⁴Biakna tau sathau a kinuh ni-in a piakte: Ngun kuangdai sawm le nih, ngun kuang sawm le nih,

⁸⁵ngun kuangdai khat ciangin shekel za le sawmthum gikin ngun kuang khat ciangin shekel sawmsagih gik a, ngun kuangte khempeuh pen biakinn shekel tawh kizui-in shekel tulnih le zali gik hi.

⁸⁶Paknamtui tawh a kidim kham pakan sawm le nihte, biakinn shekel tawh kizui-in khat ciangin shekel sawm gik a, kham pakan khempeuh pen shekel za le sawmnih gik hi.

⁸⁷Meihal biak nadingin ganhing khempeuh pen bawngtal sawm le nih, kum khat a pha tuuno a pa sawm le nih, an-a biaknate tawh; le khialhna hanga biakna-in keel a pa sawm le nih,

⁸⁸le thunuama biakpiakna-in ganhing khempeuh bawngtal sawmnih le li, tuutal sawmguk, keel a pa sawmguk, kum khat a pha tuuno a pa sawmguk ahi hi. Hihte pen biakna tau sathau a kinuh khit ciangin apna biakna ahi hi.

⁸⁹TOPA tawh a kiho dingin kikhopna buk sungah Moses a pai ciangin, kherub nihte’ kikal, thuciamna singkuang tungah a om hehpihna tokhom tung san teng panin amah a hopih awging khat om a, tua awging in Moses a hopih hi.