Read Tedim Chin GAMLAK VAKNA 8 Bible Online

GAMLAK VAKNA 8 - Tedim Chin bible

GAMLAK VAKNA 8

¹Tu-in TOPA in Moses kiangah,

²“Aaron tungah hih bangin gen in. Meivakte na koih ciangin, meivak sagihte in meivak khuam mai teng a taan dingin koih in, ci-in gen in,” a ci hi.

³Aaron in tua bangmahin hih a, TOPA in Moses a thupiak bangin, meivak khuam mai teng a taan dingin meivakte a koih hi.

⁴Meivakkhuam a kibawlna zia in: Kham a kiseek hi a, a bul pan a kipan a paakte dongin a kiseek ahi hi. TOPA in Moses tungah a lahsa lim tawh kizui-in amah in meivakkhuam a bawl hi.

⁵TOPA in Moses kiangah,

⁶“Israel mite lak panin Levi mi teng lakhia inla, amaute siangsak in.

⁷Amaute siansak nadingin hih bangin na hih ding hi: Siansuahna tui amaute tungah theh inla, a pumpi khempeuh uh mulkiatna tawh amau kiatsak inla, a puante uh sawpin amau mah na kisiang tawmsak ding hi.

⁸Tua ciangin bawngtalno khat le sathau le annel a kibawl an tawh biakna amaute na lasak ding a, nangmah in khialhna hanga biak nadingin bawngtalno adang khat na la ding hi.

⁹Kikhopna buk mai-ah Levi mite paipihin, Israel mihon buppi na khawm ding hi.

¹⁰TOPA’ mai-ah Levi mite na paipih ciangin, Israel mite in Levi mite tungah a khut uh nga ding uh a,

¹¹amaute in TOPA’ na a sep theih nadingun Aaron in Israel mite sung panin Levi mite TOPA’ mai-ah vei-a biakna-in a pia ding hi.

¹²Tua ciangin Levi mite in bawngtalte’ lu tungah a khut uh nga ding uh hi. Levi mite a’ ding kilemna bawlsak nadingin khialhna hanga biakna-in khat, meihal biakna-in a khat, TOPA’ tungah na pia ding hi.

¹³“Aaron le a tapate’ mai-ah Levi mite na koih ding a, TOPA’ tungah amaute vei-a biakna-in na pia ding hi.

¹⁴Tua bangin Israel mite lak panin Levi mite na khenkhia ding a, Levi mite keima a’ hi ding uh hi.

¹⁵Amaute siangthosakin vei-a biakna-in na piak khit ciangin kikhopna bukah na a sem dingin Levi mite pai ding uh hi.

¹⁶Bang hang hiam cih leh Israel mite’ lak panin kei’ tungah amaute hong kipia khin hi. Israel mite’ tacil khempeuh tang dingin keima a dingin amaute ka la khin hi. Bang hang hiam cih leh Israel mite’ lakah tacil khempeuh mihing hitaleh ganhing hitaleh keima-a’ ahi hi.

¹⁷Egypt gam sungah tacil khempeuh ka thah ni-in keima a dingin amaute ka tuam koih a,

¹⁸Israel mite’ lak panin tacil khempeuh tang dingin Levi mite ka la khin hi.

¹⁹Kikhopna bukah Israel mite a dingin na a sem ding le, biakbuk mai-ah Israel mite a paikhak ciangin Israel mite’ lakah gimna a tun loh nadingin Israel mite a dingin kilemna a bawl dingin Israel mite’ lak panin Aaron le a tapate’ tungah letsongin Levi mite ka pia khin hi,” a ci hi.

²⁰Tua bangin Moses le Aaron le Israel mihonpite khempeuh in Levi mite’ tungah a hih uh hi. TOPA in Levi mite tawh kisai-in Moses’ tungah a thupiak khempeuh tawh kizui-in Israel mite in amaute tungah a hih uh hi.

²¹Israel mite, khialhna panin amaute kisiangthosak tawm uh a, a puante uh sawp uh hi. Aaron in vei-a biakna-in TOPA’ mai-ah amaute pia a, amaute siansak nadingin Aaron in amau a’ ding kilemna a bawlsak hi.

²²Tua khit ciangin Aaron le a tapate’ omna kikhopna buk sungah na a sem dingin Levi mite a pai uh hi. TOPA in Levi mite tawh kisai-in Moses a thupiak bangin amaute in Levi mite’ tungah a hih uh hi.

²³TOPA in Moses kiangah,

²⁴“Hih pen Levi mite tawh a kisai thu ahi hi. Kum sawmnih le kum nga pan a tungsiah a phate, kikhopna buk nasepna sungah na a sem dingin hong pai ding uh hi.

²⁵Kum sawmnga a phak uh a kipan nasepna panin amau kihemkhia-in na sem nawn lo ding uh hi.

²⁶Ahih hangin kikhopna buk sungah a sanggamte uh huh ding a, amaute in a na taktak sem lo ding uh hi. Tua bangin Levi mite’ nasep ding na seh ding hi,” a ci hi.