Read Tedim Chin GAMLAK VAKNA 9 Bible Online

GAMLAK VAKNA 9 - Tedim Chin bible

GAMLAK VAKNA 9

¹Amaute Egypt gam panin a paikhiat zawh uh a kum nihna a kha masa sungin Sinai sehnel gamah TOPA in Moses kiangah,

²“A kiseh hunin Paisan Pawi, Israel mite khamsak in.

³A kiseh hun, tu kha ni sawm le li ni nitakin a thukhamte le a ngeina kip omte bangin na kham ding uh hi,” a ci hi.

⁴Tua ahih ciangin amaute in Paisan Pawi a kham nadingun Moses in Israel mite tungah a gen hi.

⁵Amaute in a kha masa, a ni sawm le li ni nitakin Sinai sehnel gamah Paisan Pawi kham uh a, TOPA in Moses a thupiak bangin Israel mite a gamta uh hi.

⁶Misi luang a lawnna uh hangin a nin mi pawlkhat om uh a, tua ni-in amaute in Paisan Pawi kham thei lo uh ahih manin Moses le Aaron’ mai-ah pai uh hi.

⁷Tua mite in, “Misi luang lawnna hangin ka nin uh hi. Ahi ta zongin bang hangin a kiseh hunin Israel midangte tawh TOPA biakna hong kipiasak khawm lo ahi hiam?” a ci uh hi.

⁸Moses in amaute kiangah, “Note’ thu tawh kisai, TOPA’ thupiak ka zak dong na ngak dih un,” a ci hi.

⁹TOPA in Moses kiangah,

¹⁰“Israel mite tungah hih bangin gen in: Note’ lakah mi khatpeuh ahi a, na suanlekhakte uh khatpeuh in ahi zongin misi luang lawnna hangin a nin ahi a, khualzinin gamlapi-ah a om ahi zongin, TOPA a dingin Paisan Pawi kham veve ding hi.

¹¹A kha nihna a ni sawm le li ni nitakin amaute in kham ding uh a, amaute in silngo sawh loh anlum le a kha meh tawh ne ding uh hi.

¹²Amaute in a zingsang dong bangmah siit lo ding uh a, a guh khat zong sutan lo ding uh hi. Paisan Pawi ngeinate tawh kizui-in amaute in a kham ding uh hi.

¹³Ahih hangin a siang mi khat khualzin lo napi-in Paisan Pawi a kham kei leh, amah in a kiseh hunin TOPA biakna pia lo ahih manin a mite lak panin tua mipa kihawlkhia ding hi. Tua mi in ama khialhna mah thuak ding hi.

¹⁴“Note’ lakah khualmi khat hong peemin, TOPA a dingin Paisan Pawi a kham le Paisan Pawi thukhamte le a ngeina kipte bangin hih ding hi. Peemta le tualsung mite a dingin ngeina a kibang na neikhawm ding uh hi,” a ci hi.

¹⁵Biakbuk a kidinsak ni-in meii in thuciamna biakbuk tuam a, nitak a kipan a zingsang dong meikuang tawh kibangin biakbuk tung sanah a om hi.

¹⁶Tua bangin omden hi. Sunin meii in tuam a, zanin mei tawh a kibang khat in tuam hi.

¹⁷Puanbuk tung san panin meii a kilaktoh khit ciangin Israel mite ding khia uh a, meii a kiphuhna munah Israel mite in giahphual a sat uh hi.

¹⁸TOPA in thu a piak ciangin Israel mite ding khia uh a, TOPA in thu a piak ciangin amaute in giahphual a sat uh hi. Biakbuk tung sanah meii a khawl laiteng, amaute zong giahphual ah om uh hi.

¹⁹Biakbuk tungah ni tampi sung meii a om khinta zongin Israel mite in TOPA’ thupiakna zui-in ding khia tuan lo uh hi.

²⁰Biakbuk tungah ni tawmno sung bek meii om thei zel hi. Tua bang ciangin zong TOPA’ thupiak bangin giahphual ah amaute tawmno sung mah omin, TOPA’ thupiakna bangin amaute a ding khia uh hi.

²¹Khat veivei nitak a kipan zingsang dong tua meii om hi. Zingsangin meii a kilaktoh ciangin amaute ding khia uh a, tua ahih kei leh, sun khat le zan khat a omlai le zong, meii a kilaktoh hun hunin amaute ding khia uh hi.

²²Ni nih ahi a, kha khat ahi a, a hun sauzaw ahi zongin biakbuk tung sanah meii a khawl laiteng giahphual ah Israel mite omin ding khia lo uh a, ahih hangin a kilaktoh peuh ciangin amaute ding khia uh hi.

²³TOPA’ thupiakna tawh amaute in giahphual sat uh a, TOPA’ thupiakna mah tawh amaute ding khia uh hi. TOPA in Moses a thupiak bangin amaute in TOPA’ thu a mang uh hi.