Read Tedim Chin MIKAH 3 Bible Online

MIKAH 3 - Tedim Chin bible

MIKAH 3

¹Israel a uk makaite aw, hih thu ngai un: Note in thutang thuman a deih dingin a kilawm hinapi-in,

²thuhoih deih loin thusia na deih zawsop uh hi. Note in mite’ vun na hing hawkkhiat uh a, a guh uh na hing kheuh uh hi.

³Ka mite’ sa na netum uh hi. A vun uh hawkin, a guh uh na satkham uh a, beel-a meh huan ding bangin na satnen gawp uh hi.

⁴TOPA’ tungah huhna ngenin na kiko hun uh hong tung ding a, ahi zongin amah in note hong dawng lo ding hi. Note gamtatsia na hih manun, na ngetna uh hong ngai lo ding hi.

⁵Sum a piazo mite kiangah thunuam gen a, a pia lo mite kiangah gal tuah ding a gen kamsangte in mite lam a khialsak uh hi. TOPA in tua bang kamsangte kiangah,

⁶“Keima mite lam khialsak na hih manun mailam thu gentheihna maang na mu nawn kei ding uh a, mailam thu peuhmah na gen thei nawn kei ding uh hi. Kamsangte aw, note’ hun beita ding a, ni in hong tumsan ta ding hi,” ci hi.

⁷Hih bang thugen kamsangte, a thugen kholhna uh Pasian in a tunsak loh manin maizumin mindai ding uh hi.

⁸Ahi zongin kei ahihleh, Israel mite tungah a mawhna uh a genkhia dingin TOPA’ kha le a vang tawh ka kidim a, thutang gen ngamna ding lungsim ka nei hi.

⁹Ngai un! Israel a uk makaite aw. Note in thutang deih loin, thuman kimlai a khialin na hei uh hi.

¹⁰Mi thahna le thuman lohna tawh, Pasian’ khuapi, Jerusalem na lam uh hi.

¹¹Khuapi ukte in sumgolh ngahtheihna ding ngaihsutna bek tawh thu khen a, siampite in sum ngahtheihna ding ngaihsutna bek tawh thu gen a, kamsangte in zong sum ngahtheihna ding ngaihsutna bek mah tawh mailam thu genkhol uh hi. Tua bang hinapi-in amaute in TOPA, muanin nei uh a, “TOPA in eite hong ompih a, eite tungah siatna hong tung lo ding hi,” a ci uh hi.

¹²Tua ahih manin note’ hangin lo khawh bangin Zion kikho-in, Jerusalem, nin kipaihna phualpi hong suak ding a, biakinn omna mual, gamlak a suak ding hi.