Read Tedim Chin HABAKKUK 2 Bible Online

HABAKKUK 2 - Tedim Chin bible

HABAKKUK 2

¹Ka khuadakna tausang tungah kahto-in, TOPA in kei tungah bang hong gen ding a, ka lungkim lohna teng hong bangci dawn hiam, cih ka ngak hi.

²Tua ciangin TOPA in hih bangin hong dawng a, “Nangmah ka hong muhsak thu khempeuh a simnop mahmah dingin tungman peek tungah gelh in.

³Hih thu a tunna ding hun hi pah nai lo ahih manin lai-in ciamteh in. Ahi zongin hong tung baihta ding a, kong lah khempeuh a manin hong tung ding hi. A tung hak tawh a kibangkha ahi zongin ngak keikai in. Ka seh hun a cin ciangin hong tung takpi ding a, zekai lua nawn lo ding hi.

⁴Tua a hong tung ding thu pen ‘A gilo mite suakta lo ding a, thuman mite ahihleh Pasian tungah a cihtak manun nungta ding hi,’” a hong ci hi.

⁵Hauhna pen zuaupi hi a, a huaiham mite kiphasakin omkhong thei lo uh a, hankhuk mah bangin, phazo, cih omsak thei lo uh a, lungkim hun cih nei thei lo uh hi. Tua ahih manin minam dangte a ban banin simin a uk uh hi.

⁶A zawhna gammite in amau a zo mite simmawh bawlin, “No a’ ahi lopi kimlai no a dingin na la uh a, ahi zongin tu-in gimna na thuak ding uh hi. Note tungah lei hong bate khem bawlin, bang tanvei na hauhna uh behlap nuam lailai na hi uh hiam?” ci ding uh hi.

⁷Note in na phawk ma-un note mahmah leiba neite na suak ding uh a, na leiba uh a meet hong kisungsak ding hi. Galte in note hong lingsak keuhkeuh ding a, na nate uh hong laksakmang khin ding hi.

⁸Note in minam dang tampite’ na na sut uh a, tu-in a omlai mite in note’ na hong sut ding uh hi. Bang hang hiam cih leh note in mi thatin, khuapite le a sunga teng mite na bawlsia uh hi.

⁹Mi’ van na suhna uh tawh na mite uh hausakin, lauhuaina le siatna a ngah loh nadingin na innkuan uh bawl na hih manun gim na ngah ding uh hi.

¹⁰Note’ vaihawmna mah in na mite uh tungah maizumna hong tun a, minam dangte na suksiatna uh tawh, note mahmah’ siatna ding a bawl na hi uh hi.

¹¹Note a hong langpan’ dingin kulh suangte nangawn hong kiko ding a, innkamte in zong kikopih ding uh hi.

¹²Note in mi thahna tawh khuapi satin, mawhna tawh khuapi phut na hih manun gimna na ngah ding uh hi.

¹³Na zawh uh minamte’ nasepnate a mawkna suakin, amau’ sepsateng khempeuh a khu-in leengmang hi. Hih thu pen Vanglian TOPA in a piansak ahi hi.

¹⁴Tuipi, tui tawh a kidim mah bangin TOPA’ minthanna theihna tawh leitung kidim ding hi.

¹⁵Na hehna uh tawh na gamvengte uh niamkhiatin na mindaisak uh a, zukham bangin amaute hoisak na hih manun gimna na ngah ding uh hi.

¹⁶Tua ahih manin note in zong minthanna ngah loin maizumin mindaina tawh na kidiah ding uh hi. Note mahmah in na hoi dongun na dawn ding uh hi. TOPA in gimpiakna hai, note hong dawnsak ding a, na minthanna uh mindaina a suak ding hi.

¹⁷Note in Lebanon gam singkungte phuk na hih manun note zong hong kiphuk ding a, a ganhingte zong that na hih manun tu-in ganhingte in note hong lausak ding uh hi. Gam sung khempeuhah mi thatin na bawlsiatna hang uh le khuapite le a sunga tengte na suksiatna hangun note tungah hih bangin a hong piang ding ahi hi.

¹⁸Milim, banga kimang ahi hiam? Mihingte’ bawltawm na khat hi lel a, thuman hong gen thei lo hi. Tua bangin a pau thei beek lo pasian a bawlpa in muanin a neih bang phatuam ahi hiam?

¹⁹Sing khatpeuh a kibawl na khat kiangah, “Khanglo in,” ci-in, a pau thei lo suangtum kiangah, “Tho in,” ci na hih manun gimna na ngah ding uh hi. Hih bang milim in note hong hilh thei ding ahi hiam? Ngun le kham tawh limtakin a kizut hangin a sungah nuntakna om lo hi.

²⁰TOPA, a biakinn siangtho sungah om hi; leitung mi khempeuh ama mai-ah dai dide-in om ta uh hen.