Read Tedim Chin HABAKKUK 3 Bible Online

HABAKKUK 3 - Tedim Chin bible

HABAKKUK 3

¹Kamsang Habakkuk in hih bangin thu ngen hi:

²TOPA aw, nangma sepsa thute ka za a, lamdang ka sa mahmah hi. Na hih ngeisa na liante, kote’ hunin zong hong hih kik in. Na heh hun ciang nangawnin zong hehpihna lungsim hong nei in.

³Teman khua panin Pasian hong pai a, Paran Mual panin Siangtho Pa hong pai hi. Ama minthanna vang in vanpi tuam a, leitung khempeuh, amah phatna tawh kidim hi.

⁴Khuaphialep taang bangin amah hong pai a, a khutsung panin khuavak taangkhia a, tua pen a vangliatna a koihna mun ahi hi.

⁵Ama mai-ah cinatna tungsak a, tua nungah sihna zuisak pah hi.

⁶Amah a khawl ciangin leitung ling a, amah in a et ciangin minam khempeuh ling uh hi. Tangtawng lai-in a totsa, tanglai mual liante kitam kham a, a om tawntung mual neute kimetcip hi.

⁷Kush gammite a lau mahmahna, Midian gammite a linna ka mu hi.

⁸TOPA aw, na sakolte tungah nang hong tuangin, na gualzawhna leengte tawh nong pai nadingin, gunpite tungah na heh suak a, tuipi tungah thangpai na hi hiam?

⁹Na thal a lawn dingin na kithawi a, na thallawng sungah na thaltang a dimin om a, na keek in leitung kapkham hi.

¹⁰Mual liante in nang hong muh ciangin ling uh a, van panin guah tampi hong zu hi. Leinuai-a om tuite ging zuazua a, tuihualte in a sangpipi banto hi.

¹¹Na thaltang leeng a muh ciang, na teipi tee zalzal a muh ciangin, ni le kha a omna sanah a khawlcip uh hi.

¹²A hehsa-in leitungah na pai a, a sinso sa-in minamte na tuancil hi.

¹³Na mite a honkhia dingin na paikhia a, na teel kumpipa, a honkhia dingin na kuankhia hi. Migilote’ makai pa na sugawp a, a nungzui khempeuh tawh zong na sumai hi.

¹⁴Mi cimawhte, mun simthamah a sukgawp bangin, kote a hong suthang dingin huihpi bangin hong pai laitakin na thal tawh a galkap mangpa na kaplet hi.

¹⁵Nangmah in na sakolte tawh tuipi na tuancil a, tui lianpite phuan zuazua hi.

¹⁶Hih thute khempeuh ka zak ciangin ka pumlin’ a, lau lua-in ka muk ling sapsap hi. Ka guh ka taang hong zen a, guh nei lo bangin ka pukcipsuk hi. Ko hong simgawp mite Pasian in gim a piak ding hun daitakin ka ngak khikhe ding hi.

¹⁷Theigahte a hut khin a, leengguite a gah kei zongin, oliv kungte gah lo a, lo-ah an a piang kei zongin, tuu khempeuh a si khin a, ganbuk khempeuh a hawm khin zongin,

¹⁸TOPA Pasian pen hong honkhia pa ahih manin lungdamin ka kipak lai veve ding hi.

¹⁹TOPA Pasian, keima thahatna ahi hi; sakhi khe bangin ka khe hong zaptelsak a, mun sangna-ah lungmuang takin kei hong paisak hi.