Read Tedim Chin HAGGAI 2 Bible Online

HAGGAI 2 - Tedim Chin bible

HAGGAI 2

¹Tua kum mah, a kha sagihna, a ni sawmnih le ni khat ni-in kamsang Haggai tungah TOPA in thu gen a,

²Judah gam ukpa Zerubbabel, siampi lianpen pa Joshua, le mi khempeuh tungah thu a gen dingin sawl a,

³“Nidanga biakinn a hoihna dan a ciamteh theilai na om uh hiam? Tu-in bangci na sa uh hiam? Note’ muhna-ah a gen taak het lo tawh kibang ding hi.

⁴Tu-in note kuamah lungkia kei un. Note tawh hong omkhawm ka hih manin nasep kipan un.

⁵Egypt gam panin na paikhiat lai-un, note kong ompih tawntungna ding thu kong ciam hi. Tu-in zong note hong ompihlai ka hih manin lau kei un.

⁶“A sawt loin vanpi le leipi, tuipi le leitung ka lokgawp ding hi.

⁷Minam dang khempeuh lokgawp ding ka hih manin a neihsa uh sum le paite, hih munah hong kipuak ding a, biakinn sungah a dimin van hong om ding hi.

⁸Leitung a a om ngun le kham khempeuh keima-a’ ahi hi.

⁹Biakinn thak pen a lui sangin hoihzaw-in thupizaw ding hi. Hih biakinn-ah cihtheihna le nopsakna kong pia ding hi,” cisak hi.

¹⁰Gam uk kumpipa Darias in a uk a kum nihna mah, a kha kuana a ni sawmnih le ni li ni-in kamsang Haggai tungah TOPA in thu gen leuleu a,

¹¹“Hih thu tawh kisai-in siampite’ ngaihsutna dong in:

¹²Mi khatpeuh in biakna-a a kipia sa siangtho themkhat, a puantualpi thep kawmah puakha hen la, tua a puantualpi tawh anlum khat peuhpeuh ahi a, a kihuan an khat peuhpeuh ahi a, leenggahzu, ahih kei le oliv thau, ahih kei leh an nam khat peuhpeuh ahi zongin sukha leh, tua a sukkhak an pen biakna an siangtho a suak ding hiam?” ci-in a dongsak hi. Tua bangin a kidot ciangin siampite in, “Tua puantualpi in a sukkhak ante, biakna an siangtho suak tuan lo ding hi,” ci-in a dawng uh hi.

¹³Tua ciangin Haggai in, “Mi khat in, misi tawh a kisukkhak manin mi nin a suah khit ciangin hih ante khat peuhpeuh lawngkha leh tua a lawnkhak ante a nin a suak ding hiam?” ci-in a dong hi. Siampite in, “A nin suak ding hi,” ci-in a dawng uh hi.

¹⁴Tua ciangin Haggai in thu gen a, “TOPA in hih bangin ci hi: Tu-a nong dawnna uh mah bangin hih minam dangte’ sepna khempeuhah tua bangin piang ahih manin, biakna tau tungah a piak uh na khempeuh a nin suak hi.

¹⁵“Note tungah a piangsa thute limtakin ngaihsun un. TOPA’ biakinn lam ding na kipat ma-un bangci na hi uh hiam?

¹⁶An seu sawmnih pha ding ci-in ansal-ah na pai uh ciangin seu sawm bek na pha a, leenggahzu thawlpi sawmnga pha ding ci-in leenggahzu kholna beelpi-ah na pai uh ciangin thawlpi sawmnih dim bek a na pha hi.

¹⁷Na an ciin khempeuh uh cingteek sakin ka kausansak a, tuate nangawn a susia dingin gialpi ka kiatsak hangin note na kisik nuam kei lailai uh hi.

¹⁸Tu-in, kha kuana a ni sawmnih le ni li ni, biakinn bulpi a kiphuh khit, tuni a kipanin limtakin ngaihsun un.

¹⁹Na ansal uhah na upmawhzah sangun an na tawmzaw lai ding ahi hiam? Leenggui le theikung, mang kawlsing le oliv kungte gah nai lo lai ding ahi hiam? Tua bang hi nawn lo ding a, tuni a kipanin note thupha kong pia ding hi, ci hi,” a ci hi.

²⁰Tua kha a ni sawmnih le ni li ni mahin TOPA in Haggai tungah a nihveina thu genkik a,

²¹“Vanpi le leipi a lokgawp ding ka hihna thu, Judah gam ukpa Zerubbabel kiangah gen in.

²²Kumpipa’ gam khempeuh lumletin a vangliatna uh a beisak ding ka hi hi. Leengte le leeng hawlte ka lawnthal ding a, sakol leengte le a tung tuangte puk ding uh a, amaute khatlekhat kithatlum ding uh hi.

²³Ka nasem Zerubbabel aw, tua ni ciangin nang hong la-in ka mite’ kumpi dingin kong bawl ding hi. Bang hang hiam cih leh nang pen ka hong teelpa na hi hi, Vanglian TOPA in ci hi, ci-in gen in,” a ci hi.