Read Tedim Chin ZEKHARIAH 1 Bible Online

ZEKHARIAH 1 - Tedim Chin bible

ZEKHARIAH 1

¹Persia gam uk Kumpipa Darias in a uk a kum nihna, a kha giatna sungin TOPA in kamsang Zekhariah tungah thu a gen hi. Zekhariah pen Berekhiah’ tapa hi a, ama pu Iddo ahi hi.

²TOPA in Zekhariah kiangah, “Mite tungah hih bangin thu gen in: ‘Na pu na pate uh tungah TOPA ahi keimah ka heh mahmah hi.

³Ahi zongin tu-in kei kiangah hong ciahkik le-uhcin, kei zong note kiangah kong paikik ding hi.

⁴Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn loh nading hilh uh hi. Ahi zongin amaute in ka thu ngainuam loin, ka thu hong mang lo uh hi.

⁵Tu-in na pu na pate uh koi-ah om ahi hiam? Tua kamsangte nungtalai sa na hi uh hiam?

⁶Ahi zongin ka nasem ahi kamsangte’ tungtawnin ka hilhkholhna le ka thupiaknate in note dongin hong sukhalo ding sa na hi uh hiam, ka ci hi. Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in gim a pia ka hihna thu a phawk uh hi,’ ci in,” a ci hi.

⁷Darias in a uk a kum nihna kum, kha sawm le khatna ahi Shebat kha ni sawmnih le ni li ni-in TOPA in kei tungah thu hong gen a, zanin maang hong musak hi.

⁸TOPA’ vantungmi khat sakol san khat tungah a tuang ka mu hi. Kuam sunga a om mui singkungte lakah amah khawl a, ama nungah sakol dang a san, a gial, a kang om hi.

⁹Tua ciangin keimah in, “Sia aw, hih sakolte bang a cihnopna ahi hiam?” ci-in ka dong hi. Amah in hong dawng a, “Bang a cihnopna hiam cih kong lak ding hi.

¹⁰Hih sakol tung tuangte pai kawikawi-in leitung a en dingin TOPA in a sawl ahi hi,” hong ci hi.

¹¹Tua ciangin mui kung lakah a khawl TOPA’ vantung mite kiangah amaute in, “Leitung khempeuh ka en kawikawi khin uh a, leitung khempeuh khuaphawk loin nuamtakin om uh hi,” ci-in thu a zasak uh hi.

¹²Tua ciangin TOPA’ vantungmi in, “Vanglian TOPA aw, Jerusalem khuapi le Judah gam khuapite tungah kum sawmsagih sung na heh khinta hi. Amaute hehpih loin bang tanvei omlai ding na hi hiam?” ci hi.

¹³Tua ciangin TOPA in dikna le hehnepna kam tawh vantung mite dawng a,

¹⁴Vanglian TOPA in ama tungah a gensa thute khempeuh keimah in ka taangko sawn nadingin tua vantungmi in kei hong sawl a, “Ka khuapi siangtho Jerusalem, nakpitakin itin ka lunghimawh hi.

¹⁵Tua bangin nuamtakin a om hithiat minamte tungah ka heh mahmah hi. Ka mite tungah ka hehna ki-ip tentanin ka om laitakin, hih minam dangte in ka mite’ gimna nasiasak semsem uh hi.

¹⁶Tua ahih ciangin Jerusalem khuapi tungah ka hehpihna a lak dingin ka hong paikik hi. Tua khuapi sungah ka biakinn kilamkik ding a, khuapikulh zong kiciangkik ding hi, Vanglian TOPA in ci hi, ci-in gen in,” hong ci hi.

¹⁷Tua ciangin vantungmi in ka taangkona ding hong genkik leuleu a, “Ama khuapite nakpitakin cithei kikin, Jerusalem khuapi a hehnep kikna ding, le ama khuapi-in a neihkikna ding, Vanglian TOPA in gen hi, ci-in gen in,” hong ci hi.

¹⁸Ka khuadak leh saki li ka mu hi.

¹⁹Bang a cihnopna ahi hiam, ci-in vantungmi kiangah ka dong hi. Amah in hong dawng a, “Judah mite le Jerusalem mite a thehthang gawp leitung vangliatnate a cihnopna ahi hi,” hong ci hi.

²⁰Tua ciangin TOPA in sek tawi mihing li hong lak hi.

²¹Hih mite, bang hih ding ahi hiam, ci-in ka dong hi. Amah in hong dawng a, “Hih saki lite in Judah mite thehthang gawp a, a lang uhah kuamah pang ngam lo ahih manin, Judah gam sugawpin a mite a thehthang gawp minamte, tu-in hih sek tawi lite in lausakin a lawnthal ding ahi hi,” hong ci hi.