Read Tedim Chin ZEKHARIAH 12 Bible Online

ZEKHARIAH 12 - Tedim Chin bible

ZEKHARIAH 12

¹Vanpi zalin leitung piangsak a, mihingte tungah nuntakna a pia TOPA in Israel mite tawh kisai-in thu gen a,

²“Leenggahzu bangin Jerusalem khuapi ka bawl ding a, a kiima om minam dangte in a nek ciangin khamin a hoi ding uh hi. Jerusalem khuapi a umcih uh ciangin Judah gam khuapi dangte zong umcih ding uh hi.

³Tua hun hong tun ciangin suangtumpi gik mahmah bangin Jerusalem khuapi ka bawl ding a, likkhiat a sawm minam khat peuhpeuh in liamlawh ding hi. Leitung minamdang khempeuh kipawlin Jerusalem a sim ding uh hi.

⁴Tua ni ciangin a sakolte uh ka lausak ding a, a sakol tung tuangte uh ka haisak ding hi. Ahi zongin Judah mite ka kem ding a, a galte uh’ sakolte, a mit ka tawsak ding hi.

⁵Tua ciangin Judah minamte in, ‘Jerusalem-a a teng mite, Vanglian TOPA ahi amau’ Pasian’ hangin thahat uh hi,’ ci ding uh hi.

⁶“Tua ni ciangin Judah minamte, tulak kang le buhphual kang ka bangsak ding a, a kiima om minamdangte khempeuh a susia ding uh hi. Ahi zongin Jerusalem mite, a khuapi sungah lungmuangin a om hithiat ding uh hi.

⁷“Tua ciangin Judah galkapte tungah gualzawhna ka pia masa ding a, David’ suanlekhakte le Jerusalem khuamite’ minthanna pen Judah midangte’ minthanna sangin lianzaw tuan lo ding hi.

⁸Tua ni ciangin TOPA in Jerusalem-a a teng mite hu ding a, a ginalo pente nangawn David zahin thahat ding hi. David’ suanlekhakte in TOPA’ vantungmi le Pasian mahmah bangin amaute a makai ding uh hi.

⁹Jerusalem sim ding a hanciam minam khempeuh tua ni ciangin ka susia ding hi.

¹⁰“David’ suanlekhakte le Jerusalem khuamite’ tungah hehpihna lungsim le thungetna lungsim ka guan ding hi. Amaute in a sutlup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpitakin kapin thum ding uh hi.

¹¹Tua hun laitakin Jerusalem khua sungah kapin thumna pen Megiddo zanglei-a Hadadrimmon pasian’ sihna hangin kahna le thumna zah mahin nasia ding hi.

¹²Gam sung khempeuhah a innkuankuanin dahin kap ding uh hi. David’ suanlekhakte sung panin a innkuankuanin kapin, a zite uh zong a tuam mahin kap ding uh hi. Nathan’ suanlekhakte zong a innkuankuanin kapin, a zite uh zong a tuam mahin kap ding uh hi.

¹³Levi’ suanlekhakte le a zite, Shimei’ suanlekhakte le a zite,

¹⁴le beh dang khempeuhte zong a behbehin, a zite uh tawh a tuam ciatin kapin a thum ding uh hi.