Read Tedim Chin ZEKHARIAH 2 Bible Online

ZEKHARIAH 2 - Tedim Chin bible

ZEKHARIAH 2

¹Ka muhna dang khat leuleu-ah, a khut sungah tehna khau a tawi mi khat ka mu hi.

²Koi-a pai ding na hi hiam, ci-in ka dot ciangin amah in, “Jerusalem khuapi a sauna ka theih nadingin a teh dingin a pai ding ka hi hi,” hong ci hi.

³Tua ciangin vantung mipa hong paikhia a, vantung midang khat in amah na dawntuah hi.

⁴Tua ciangin vantungmi a masa pa in a dawntuah pa kiangah, “Va tai inla, tehna khau a tawi tangvalpa kiangah hih thu va gen in. Jerusalem khua sungah mihing le ganhing tam mahmah ding ahih manin Jerusalem kulhhuam sungah ta zo lo ding uh hi.

⁵Tua khuapi a hu dingin meikulh bangin TOPA mahmah a omna ding, le tua khua sungah a minthanna tawh a tenna ding thu, TOPA in kam ciamzo hi, ci-in va gen in,” a ci hi.

⁶TOPA in ama mite kiangah, “Mun khempeuhah note kong thehthang khin hi. Ahi zongin tu-in Babylon panin taikhia-in Jerusalem-ah ciahkik un.

⁷Babylon-ah a om mite aw, Zion-ah tai un,” ci hi.

⁸Hih bangin maang ka muh khit ciangin, ama mite’ na a sutgawp minam dangte kiangah thu a gen dingin Vanglian TOPA in kei hong sawl a, TOPA’ mite a su mi peuhpeuh in a mit nauta bangin a manphapen khat a su ahi hi.

⁹TOPA mahmah in note hong su ding a, nidanga note’ na hong sepsak mite in tu-in note’ nate hong lehsuh kik ding uh hi, hong cisak hi. Hih bangin thu hong pian’ ciangin Vanglian TOPA in kei hong sawl ahih lamtak na thei ding uh hi.

¹⁰TOPA in hih bangin hong ci hi: “Jerusalem mite aw, lungdamin la sa un. Note tawh a hong omkhawm ta ding ka hi hi,” ci hi.

¹¹Tua hun ciangin TOPA kiangah minam tampi hong pai ding uh a, ama mite a suak ding uh hi. TOPA in note hong ompih ding a, tua ciangin note kiangah kei a hong sawl ahihna thu na thei ding uh hi.

¹²Judah mite pen gam siangtho sungah TOPA’ neihtuam hong suakkik ding a, Jerusalem khua pen ama it penpen khuapi hong hi kik ding hi.

¹³Mi khempeuh aw, TOPA’ mai-ah gamdai-in om un. Bang hang hiam cih leh a siangtho ama omna mun panin amah hong paikhia ta hi.