Read Tedim Chin ZEKHARIAH 8 Bible Online

ZEKHARIAH 8 - Tedim Chin bible

ZEKHARIAH 8

¹Vanglian TOPA in kei tungah thu hong genin

²amah in, “Jerusalem mite ka itluatna hangin Jerusalem khuapi ka huh nuam mahmah a, hih banga ka itluatna in a galte tungah ka heh hong suaksak hi.

³Ka khuapi siangtho Jerusalem-ah ciahkikin ka teng ding hi. A citak khuapi, ci-in minthang ding a, Vanglian TOPA’ mual pen mual siangtho kici ding hi.

⁴Jerusalem khuapi kongzing le lamkabomte-ah a tu dingin puteekte omkik ding a, teeklua kisa-in ciangkhut khunin pai ding uh hi.

⁵Kongzing khempeuhah numei naupang kimawlin phezaizai ding uh hi.

⁶“Tu-a a omlai note a dingin hih thu ahi thei lo ding tawh a kibat hangin kei a dingin ahi mawh ding thu hi lo hi.

⁷Nisuahna le nitumna gamte panin ka mite ka honkhia ding a,

⁸Jerusalem khua sungah ka tunpihkik ding hi. Amaute pen keima mi hi-in, kei zong amau’ Pasian ka hi ding a, amau tawh ka thuciamnate limtakin ka zui ding hi.

⁹“Thakhauhin lungsim hang un. Ka biakinn a kilamkikna ding a bul a kiphuh laitakin kamsangte in a gen thute mah a za na hi uh hi.

¹⁰Tua hun ma-in mi ahi a, ganhing ahi zongin na a sem dingin kuamah in cial zo lo a, galte kihtakna hangin kuamah a ututin om thei lo hi. Mi khatlekhat ka kidosak hi.

¹¹Ahi zongin tu-in a suaktalai hih minamte, nidang ate ka bangsak kei ding hi.

¹²Lungnuam takin lokho singpua-in nuam a sa ding uh hi. Leengguite gahpha ding a, guah tampi zu-in lo-ah an tampi piang ding a, a suaktalai ka minamte tungah hih bang thupha khempeuh ka tungsak ding hi.

¹³A beisa hunah, Judah gammite le Israel gammite pen, minam dangte in kihamsiatna-in zang uh a, ‘Judah le Israel-te’ thuak bangin thuak un,’ kici uh hi. Ahi zongin note kong honkhia ding a, tu-in midangte in, ‘Judah le Israel bangin thupha ngah un,’ ci-in thupha kipiakna-in zang ding uh hi. Tua ahih manin na lungsim uh hangsak unla lau kei un.

¹⁴“Na pu na pate un kei hong hehsak ciangin amaute tungah siatna tunsak ding ka ngaihsun a, ka lungsim ka khiam het kei hi.

¹⁵Ahi zongin tu-in Jerusalem khua mite le Judah gammite tungah thupha piak ding ka ngaihsun hi. Tua ahih ciangin lunghimawh kei un.

¹⁶Hih bangin note gamta un: Note khatlekhat tungah thuman thutak kam kipau un. Thukhenna zumah, kilemna a piangsak ding thutang zang un.

¹⁷Khatlekhat kisiatsakna ding vaihawm kei unla, a man lopi-in teci pangin kiciam kei un. Zuauna, thuman lohna, le kibawlsiatnate ka deih kei hi,” hong ci hi.

¹⁸Vanglian TOPA in kei tungah thu hong genin

¹⁹amah in, “Kha lina, kha ngana, kha sagihna, le kha sawmna sunga antannate pen, Judah gammite a dingin lungdamin kipakin pawi bawlna hun suak ta ding hi. Tua ahih manin thuman le kilemna deih pha un,” hong ci hi.

²⁰Vanglian TOPA in hih bangin ci hi: “Minam liante le khuapi liante panin Jerusalem-ah mi hong pai hun hong tung ding hi.

²¹Khuapi khat-a om mite in khuapi dang a om mite kiangah, ‘Vanglian TOPA bia-in ama tung panin thupha ka ngen ding uh hi. Hong zui un,’ ci ding uh hi.

²²A vanglian a thahat minamte zong Vanglian TOPA a bia ding le ama tung panin thupha a ngen dingin Jerusalem-ah hong pai ding uh hi.

²³Tua hun ciangin minam tuamtuamte sung panin mi sawm, Jew mi khat kiangah hong pai-in, ‘Pasian in nang hong ompihna thu za ka hih manun na nung hong zuisak in,’ ci-in thum ding uh hi,” a ci hi.