Read Tedim Chin MATTHAI 12 Bible Online

MATTHAI 12 - Tedim Chin bible

MATTHAI 12

¹Tua zawh a sawt loin Sabbath ni khatin mangbuh lo nawkin Jesuh a pai hi. A nungzuite a gil uh kial ahih manin mangbuhvuite zutin a ne uh hi.

²Farisi mite in a muh uh ciangin Jesuh kiangah, “En in, Sabbath ni-in i hih dingin a kilawm lo gamtatna na nungzuite gamta uh hi,” a ci uh hi.

³Jesuh in amaute kiangah, “David le a kikholhpihte a gilkial laitakun David’ gamtatna thu sim ngei lo na hi uh hiam?

⁴Pasian’ inn sungah amah lut a, siampite lobuang, amah le a kikholhpihte in a nektheih ding ahi lo Ompihna Anlum la-in amah le a kikholhpihte in a ne uh hi.

⁵Tua ahih kei leh zong siampite in Sabbath sim mahin biakinn sungah Sabbath thukham khial napi-in mawhsakna a ngah tuan lohna thu uh, Moses Thukham sungah sim ngei lo na hi uh hiam?

⁶Note kiangah kong genin-ah: Tua biakinn sangin a lianzaw khat hih lai-ah hong om hi.

⁷Lai Siangtho sungah, ‘Ganhing tawh biak ding ka deih kei a, migitna ka deihzaw hi,’ a cihnopna thu teltakin thei le-uhcin a mawh lopi kimlai na mawhsak kei ding uh hi.

⁸Bang hang hiam cih leh Mihing Tapa pen Sabbath ni a ukpa ahi hi,” ci-in a dawng hi.

⁹Tua lai panin Jesuh paisuakin amau kikhopna inn sungah a lut hi.

¹⁰Tua lai-ah a khut langkhat a zaw mi khat a na om hi. Jesuh gamta khial hi, ci-in a mawhna a zong nuam mi pawlkhat tua lai-ah om uh ahih manin tua mite in Jesuh kiangah, “Sabbath ni-in cina damsak ding a kilawm mah ahi hiam?” ci-in a dong uh hi.

¹¹Jesuh in amaute kiangah, “Note khatpeuh in tuu khat nei unla, Sabbath ni-in dum sungah tua tuu kia leh, tua tuu va lenin kaikhiato ding hi lo na hi uh hiam?

¹²Mi pen tuu sangin nakpitakin manphazaw ahih manin Sabbath ni-in a hoih sep ding a kilawm ahi hi,” ci-in a dawn khit ciangin

¹³a mipa kiangah, “Na khut zan in,” a ci hi. A mipa in zong a khut zanpah a, midangte mah bangin hoihtakin a damkik hi.

¹⁴Ahi zongin Farisi mite paikhia uh a, Jesuh a thahtheih nading uh vai a hawm uh hi.

¹⁵Jesuh in amah a kisawmna thu a theih ciangin tua mun panin a paikhia hi. Mi tampi in amah hong zui uh hi. Amah in cina mi khempeuh damsak a,

¹⁶Pasian in kamsang Isaiah tungtawnin a gen thu a tuntheih nadingin, kuama kiangah ama thu a gen loh nadingun thu a pia hi. Tua a genna-ah,

¹⁷

¹⁸“Keimah in ka teelsa ka nasempa, ka it mahmah, ka lungkimna pa en un. Keima Kha ama tungah ka pia ding a, Gentail mite tungah upna man a pulak ding hi.

¹⁹Amah in thu seel loin, a aw sangsak lo ding a, konglakah zong a awging kiza lo ding hi.

²⁰Amah in a zawngkhal mite dopbawl ding a, a cimawh mite tungah migi ding hi. Thuman thutang a gualzawhsak mateng khawl ngei lo ding hi.

²¹Gentail mite in amah bek mah lametin nei ding uh hi,” ci hi.

²²Tua ciangin mi pawlkhat in Jesuh kiangah mittawt le pau theih loh a thuah dawivei mi khat hong paipih uh hi. Jesuh in amah damsak ahih manin amah hong pauthei-in khua zong hong muthei hi.

²³Tua ciangin mi khempeuh in lamdangsa mahmah uh a, “Hih pa, i lametet David’ suan hi lo ding ahi hiam?” a ci uh hi.

²⁴Ahi zongin Farisi mite in hih thu a zak uh ciangin, “Dawimangpa Beelzebul min tawh dawi a hawlkhia hi lel hi,” a ci uh hi.

²⁵Jesuh in amaute’ ngaihsutna thei ahih manin amaute kiangah, “Gam khat peuhpeuh, a gammite kiphelkhamin pawlkhat le pawlkhat kido le-uh tua gam a sia suak ding hi; khua khat ahi a, innkuan khat ahi zongin kiphelkhamin kido le-uh kip lo ding hi.

²⁶Tua mah bangin Satan le Satan kihawlkhia le-uh a ukna bangci kip theih ding ahi hiam?

²⁷Keimah in Beelzebul vangliatna tawh dawite hawlkhia ka hih leh na mipihte un a kua’ vangliatna tawh hawlkhia ahi uh hiam? Na mipihte un na ngaihsut khialhna uh hong kilangsak hi.

²⁸Note’ ngaihsut bang hi loin, Pasian’ Kha in dawi hawlkhiat nading vangliatna kei tungah hong pia ahih manin note lakah Pasian’ ukna hun hong kipan khin ahihna hong kilang hi.

²⁹Mi khatpeuh in mi thahat khat pa’ inn sungah lutin a neihsate a laksak theih nadingin tua inn nei a thahatpa a hencip masak phot ding kisam hi. A hencip zawh khit ciang bekin a inn-ah lutin a neihsate lathei pan hi.

³⁰Kei hong pawlpih lo peuhmah keima lang hi uh a, kei hong kaihkhoppih lo peuhmah a thehthang ahi uh hi.

³¹Tua ahih manin note kiangah kong genin-ah: Mihingte’ kampau khialhna le gamtat khialhnate kimaisak thei ding a, ahi zongin Kha Siangtho langpangin a gensiate kimaisak lo ding hi.

³²Mihing Tapa langpangin a gensiate a mawhna uh kimaisak thei ding a, ahi zongin Kha Siangtho langpangin a gensiate pen tuhun a kipan a tawntungin a mawhna uh kimaisak lo ding hi.

³³“Singgah limci a gahtheih nadingin a kung a cidam phot ding kisam a, a kung gina kei leh a gah limci lo hi. Tua ahih manin singkung khat a pianzia pen a gahin hong kithei hi.

³⁴Gul bangin ngian a zang note aw, migilo na hih uh ciangin bangci-in thuhoih genthei mah ding na hi uh hiam? Bang hang hiam cih leh lungsim sunga thu om pen kam in a genkhia hi bek hi.

³⁵Mihoihte in a hoih a kholteng suahkhia a, migilote in gitlohna a kholteng a suahkhia ahi hi.

³⁶Note kiangah kong genin-ah: Thukhen ni ciangin mi khempeuh in phattuamna a om lo a kampaunate uh khempeuh bangin thusitna a thuak ding uh hi.

³⁷Bang hang hiam cih leh nomau kampauna tawh kizui-in thu hong kikhen ding a, dik hi, cihna ahi a, mawh hi, cihna ahi zongin na ngah nadingun nomau kampau mah hong kibulphuh ding hi,” a ci hi.

³⁸Tua ciangin Thukham hilh siate le Farisi mi pawlkhat in Jesuh kiangah, “Sia aw, nalamdang khat nong lah ding ka deih uh hi,” ci-in a ngen uh hi.

³⁹Ahi zongin Jesuh in, “Tuhuna mite bangzahin giloin, Pasian’ thu thei lo ahi uh hiam? Na lamdang ka bawl ding na hong ngen tazen uh hi. Jonah thu tawh kisai nalamdang longal adang hong kilaklo ding hi.

⁴⁰Ngasa gilpi sungah sun thum le zan thum sung Jonah a om mah bangin Mihing Tapa zong sun thum le zan thum sung mah lei sungah om ding hi.

⁴¹Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khuamite in note mawhsakna thu hong gen ding uh hi. Note kiangah kong genin-ah: Tu mahmahin note kiangah Jonah sangin a lianzaw khat a om hi.

⁴²Leitaw lam gam kumpinu in Solomon’ pilna thu a ngai dingin leitung phelkhat kantanin hong pai ahih manin thukhen ni ciangin amah in note mawhsakna thu hong gen ding hi. Note kiangah kong genin-ah: Tu mahmahin hih lai-ah Solomon sangin a lianzaw khat a om hi.

⁴³“Mi khatpeuh sung panin dawi a kihawlkhiat khit ciangin a ten nading mun keuna zongin a vak kawikawi hi. Ahi zongin a ten nading mun a muh zawh loh ciangin,

⁴⁴‘Ka paikhiatnasa inn mahah ciahkik ning,’ ci hi. A hong paikik ciangin tua inn na awng lai a, kipuah siangin hoihtakin a om a mu hi.

⁴⁵Tua ciangin va paikik a, amah sangin a siahuaizaw dawi sagih hong tunpihin tua mipa sungah a teng uh hi. Tua ahih manin tua mipa pianzia pen a masa huna sangin a siazaw hi. Tua ahih ciangin tuhuna migilote zong hih mipa’ pianzia mah tawh kibang ding uh hi,” a ci hi.

⁴⁶Tua bangin mite kiangah thu genin a om laitakin a pualamah a nu le a naute in Jesuh hopih nuamin a om uh hi.

⁴⁷Tua ahih manin tua lai-ah a om mite khat in Jesuh kiangah, “Na nu le na naute in nang hong hopih nuamin a pualamah om uh hi,” a ci hi.

⁴⁸Ahi zongin Jesuh in tua mipa kiangah, “Ka nu kua bangte hi a, ka naute kua bangte ahi uh hiam?” a cih khit ciangin

⁴⁹a nungzuite lam kawk a, “Hihte pen ka nu le ka sanggamte ahi uh hi.

⁵⁰Vantungah a om ka Pa’ deihna bangin a gamta mi peuhmah ka sanggam pasal, ka sanggam numei, ka nu ahi uh hi,” ci-in a dawng hi.