Read Tedim Chin MATTHAI 13 Bible Online

MATTHAI 13 - Tedim Chin bible

MATTHAI 13

¹Tua ni mahin tua inn panin Jesuh paikhia a, tuili gei-ah pai-in thuhilh dingin a tu hi.

²Ama kiimah a hong kikhawm mi tamlua ahih manin amah gunkuang tungah pai-in tu a, mihonte ahihleh tuili gei-ah a omsak hi.

³Amah in thugentehna a tuamtuam zangin thu tampi hilhin a genin-ah: “Khaici vawhpa khaici vawh dingin a kuankhia hi.

⁴Khaici a vawh ciangin pawlkhatte lo lai lam dungah tu a, vasate hong leengin a ne uh hi.

⁵Pawlkhatte, suang a kitawphahna leidaina mun a tu hi. Lei thuk loin lum ahih manin a khaici popah hi.

⁶Ahi zongin ni hong sat ciangin ankungte in zung thuk kha zo lo uh ahih manin tua ankungnote vulin a keu hi.

⁷Pawlkhatte, lingbulsum a omna mun leilak tu a, lingbulsumte hong selin hong khang ahih manin ankungte a depgawp hi.

⁸Ahi zongin pawlkhatte, lei hoihna mun tu-in hong khang hi. Pawlkhatte in a zah zakhat, pawlkhatte in a zah sawmguk, adangte in a zah sawmthum a gah hi,” ci-in a gen khit ciangin,

⁹“Zak nading bil a neite in hih thu na za ta un,” ci-in Jesuh in a thugen a khum hi.

¹⁰Tua ciangin nungzuite in Jesuh va naihin ama kiangah, “Bang hangin thugentehna zangin amaute tungah thu gen na hi hiam?” ci-in a dong uh hi.

¹¹Jesuh in, “Vantung ki-ukna tawh kisai thusim note tungah hong kihilh a, ahi zongin amaute tungah kihilh lo hi.

¹²Bang hang hiam cih leh a neisate tungah kipia thuahin hau semsem ding a, a nei lote tung panin a neihsa sunsun nangawn kilaksak ding hi.

¹³Amaute in enen napi-in mu thei lo uh a, ngaingai napi-in za thei lo, tel thei lo uh ahih manin thugentehna zangin thu a gen ka hi hi.

¹⁴Kamsang Isaiah’ thugenkholhna, hih thu tawh kisai-ah amau a dingin tung taktak hi. Tua a genna-ah, ‘Na zakzak uh hangin na tel kei ding uh a, na etet uh hangin na mu kei ding uh hi.

¹⁵Hih mite’ lungsim mawl mahmah hi; a bil uh bingsak uh a, a mit uh a si uh hi. Tua bang hi kei le-uh, a mit uh tawh mu-in, a bil uh tawh za-in, a lungsim un tel ding a, kei lamah amaute hong kihei-in, amaute ka damsak ding hi, ci-in Pasian in gen hi,’ ci-in kigelh hi.

¹⁶Ahi zongin note’ mit in mu-in na bil un za ahih manin a hampha mahmah na hi uh hi.

¹⁷Ahi taktakin note kiangah kong genin-ah: Kamsangte le Pasian’ mi tampite in note’ muhte munuam mahmah napi-in mu lo uh a, note’ zakte zanuam mahmah napi-in za lo uh hi.

¹⁸“Tua ahih ciangin tu-in khaici vawhpa thugentehna thu na ngai un.

¹⁹Mi pawlkhat in Pasian’ hong ukna tawh kisai a lungdamhuai thu za napi-in a thu theitel lo uh ahih manin Dawimangpa hong pai-in amau lungsim sunga a kivawh thu a lakkhiatsak hi. Hih bangte pen lolai lampi dung a tu khaicite tawh kibang hi.

²⁰Suang kitawphah leilak a tu khaicite pen Pasian’ thu a zak ciangun lungdam takin a sangpahte a cihnopna ahi hi.

²¹Ahi zongin amaute sungah thuktum zo lo ahih manin tawlkhat sung bek um uh hi. Tua ahih manin Pasian’ thu hangin haksatna ahi a, bawlsiatna ahi zongin khat peuhpeuh a tun ciangin tawpkikpah uh hi.

²²Lingbulsum omna leilakah a tu khaicite pen Pasian’ thu za napi-in amau nuntakna sung uhah leitung lunghihmawhna le hauh nopnate in Pasian’ thu vuknelh ahih manin bangmah a suakkhia zo lote a cihnopna ahi hi.

²³Lei hoihna munah a tu khaicite pen Pasian’ thu a zak ciangin a tel mite a cihnopna ahi hi. Tua bang mite a dingin Pasian’ thu in man nei a, pawlkhatte a dingin a zah zakhat, pawlkhatte a dingin a zah sawmguk, pawlkhatte a dingin a zah sawmthumin Pasian’ thu in man a nei hi,” a ci hi.

²⁴Tua ciangin Jesuh in thugentehna dang khat gen a, “Vantung ki-ukna pen bang tawh kibang hiam cih leh: A lo-ah taangci hoih a vawhpa tawh kibang hi.

²⁵Ahi zongin zan khat, mite a ihmut kalun galte khat hong pai-in taang lakah tahum tang vawhin a paikhia hi.

²⁶Taangte hong po-in a vuih hun ding ciangin tahum kungte zong hong lianin hong kilang hi.

²⁷Tua ciangin lonei pa’ nasemte ama kiangah hong pai-in, ‘Na lolai-ah na vawh khaici pen taangci hoihte ahi hi. Hih tahumte koi pana hong piang ahi hiam?’ a cih ciangin

²⁸amah in, ‘Galte’ vawh ahi hi,’ ci-in a dawng hi. A nasemte in ama kiangah, ‘Tua ahihleh kote va kuanin ka va bot ding uh hiam?’ ci-in a dong uh hi.

²⁹Ahi zongin amah in, ‘Va bot kei un. Tahumte bot le-uhcin taang tawh na botkhawm kha ding uh hi.

³⁰Anlak hun mateng a nam nihin tuaci om phot hen. Anlak hun ciangin anlate kiangah, “Tahumte bot masa unla, meikhukah khul dingin lomhen un. Ahi zongin taangte la-in ka ansal-ah hong sung un,” ka ci ding hi,’ ci hi,” a ci hi.

³¹Tua ciangin Jesuh in thugentehna dang khat gen leuleu a, “Vantung ki-ukna pen bang tawh kibang hiam cih leh, mi khat in a lo sungah a vawh ankam tang tawh kibang hi.

³²Khaici khempeuh lak panin ankam tang a neupen ahi hi. Ahi zongin a khankhit ciangin ankung lakah a golpen suak ahih manin vasate in a hiang tungah bu a tomtheihna zah ding ciang hong suak thei hi,” a ci hi.

³³Tua ciangin thugentehna khat mah gen leuleu a, “Vantung ki-ukna pen bang tawh kibang hiam cih leh, nupi khat in annel seu thum dim meek manin silngo sawh a, a vekpi-in silngo in zelin a pawmsak tawh kibang hi,” a ci hi.

³⁴Jesuh in hih thute khempeuh, thugentehna vive zangin thu hilh a, thugentehna zang loin thu khat beek a gen kei hi.

³⁵Hih bangin thugentehna a zatna pen kamsang Isaiah in, “Thugentehna zangin thu ka gen ding a, leitung piancil a kipan a kithei lo thute ka gen ding hi,” ci-in a genkholhsakna thu a tun nading ahi hi.

³⁶Tua ciangin mihonte lak panin Jesuh paikhia-in inn sungah a lut hi. A nungzuite ama kiangah hong pai uh a, “Lolai-a om Tahum Thugentehna a khiatna hong gen in,” a cih uh ciangin

³⁷Jesuh in, “Taangci hoih a vawhpa pen Mihing Tapa ahi hi.

³⁸Lolai pen leitung hi a, taangci hoih i cih pen Pasian’ ukna sungah a om mite ahi uh hi. Tahumte pen Gilopa tawh a kipawl mite hi a,

³⁹tahum tang a vawh gal pa pen Dawimangpa ahi hi. Anlak hun pen leitung bei nading hun hi a, anla nasemte pen vantung mite ahi hi.

⁴⁰Tahumte kikaikhawmin meikhuk sungah a kikhultum mah bangin leitung bei hun ciangin tua bangmahin kihih ding hi.

⁴¹Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin

⁴²meikhukpi sungah tua bang mite lawn ding uh a, tua lai-ah amaute kapin a hagawi ding uh hi.

⁴³Tua hun ciangin Pasian’ mite ahihleh a Pa uh Ukna sungah ni bangin a taang ding uh hi. Zak nading bil a neite in hih thu na za ta un.

⁴⁴“Vantung ki-ukna pen lolai-ah a kiseel sum tawh kibang hi. Mi khat in a muh ciangin limtakin a seelpha hi. Amah lungdam mahmahin a inn-ah ciahpah a, a neih khempeuh a zuak khit ciangin tua lo a lei hi.

⁴⁵“Vantung ki-ukna pen sumbawlpa in a zon kep hoihpente tawh zong kibang hi.

⁴⁶Sumbawlpa in a manpha diak pawl kep khat a muh ciangin ciahpahin a neih khempeuh a zuak khit ciangin tua kep a lei hi.

⁴⁷“Vantung ki-ukna pen tui sungah kipaai-in ngasa namkim a awkna ngen tawh zong kibang hi.

⁴⁸Ngasa tampi tak a awk ciangin ngabengte in tui gei-ah a ngen uh kaikhia-in tusuk uh a, nektheih ding ngasate, paipel sungah guangin, nektheih loh ding ngasate, a lawnkhia uh hi.

⁴⁹Leitung hun bei ciangin zong tua bangmah hi ding hi. Vantung mite hong pai-in mihoihte lak panin migilote lakhia-in,

⁵⁰meikhukpi sungah tua migilote a khul ding uh hi. Tua lai-ah kapin a hagawi ding uh hi.

⁵¹“Hih ka thugente khempeuh a khiatna na thei uh hiam?” ci-in Jesuh in a dot ciangin amaute in, “Ka thei uh hi,” ci-in a dawng uh hi.

⁵²Tua ciangin Jesuh in amaute kiangah, “Vantung ki-ukna sungah a hong lut Thukham hilh siate khempeuh pen, a sumkholna panin a thak le a lui, a ut utin a lakhia thei ziauziau sumnei pa tawh kibang uh hi,” a ci hi.

⁵³Jesuh in hih thugentehnate a gen khit ciangin tua lai panin paikhia-in

⁵⁴ama khua-ah pai a, kikhopna inn sungah thu a hilh hi. Ama thugen a za mite in lamdangsa mahmah uh a, “Hih mipa in hih bang pilna koilai panin ngah a, bang hangin hih bang na lamdangte bawlthei ahi hiam?

⁵⁵Khutsiam pa’ tapa hi lel a, a nu zong Mary a kici nu hilel hi lo ahi hiam? Ama naute zong James, Josef, Simon le Judas hi lo ahi uh hiam?

⁵⁶A nau numeite zong hih lai mah a om hi lo ahi uh hiam? Tua bang hinapi-in hih mipa in koi lai panin hih bang thuteng ngahthei ahi hiam?” a ci uh hi.

⁵⁷Tua ahih manin amah a sangzo kei uh hi. Tua ciangin Jesuh in amaute kiangah, “Kamsang khat pen, ama khua, ama behte, le ama innsung longal-ah kizahtakin pahtawina a ngah hi,” a ci hi.

⁵⁸Nazareth khuamite in amah a up lohna hangin tua khua-ah nalamdang tampi a bawl kei hi.