Read Tedim Chin MATTHAI 14 Bible Online

MATTHAI 14 - Tedim Chin bible

MATTHAI 14

¹Tua hun laitakin Galilee gam sungteng a uksawn kumpi Herod in Jesuh’ thu a za hi.

²Amah in a nuai-a uliante kiangah, “Hih pa pen Johan hi a, sihna panin a hingkik hi ding hi. Tua ahih manin hih bang nalamdang bawlna ding vangliatna nei hi ding hi,” a ci hi.

³Bang hang hiam cih leh Herod in a nau Filip’ zi Herodias a tenpihna hangin Johan in Herod kiangah, “Na naupa’ zi na tenpih ding ngeina hi lo hi,” ci-in gen zelzel ahih manin Herod a heh suak a, Johan mansakin, khau khihsakin, thong sungah a khumsak hi.

⁵Herod in Johan that nuam hi. Ahi zongin mite in kamsangin ngaihsun uh ahih manin mite a kihtakna hangin thatsak ngam lo hi.

⁶Ahi zongin Herod’ suah ni pawi bawl hun hong tun ciangin mihonte mai-ah Herodias’ tanu hong laam ciangin Herod lungdam mahmah ahih manin,

⁷“Na hong nget peuhpeuh ka hong pia ding hi,” ci-in a kiciam hi.

⁸Tua numei in zong a nu’ ngaihsut piakna zui-in, “Kuangdai khat sungah Tuiphumpa Johan’ lutang, hih lai mahmahah hong pia in,” ci-in a ngen hi.

⁹Kumpipa dah mahmah hi. Ahi zongin a kiciamnasa ahihna hang leh a leenglate’ maitang a zahtakna hangin a ngetna a kipiak nadingin thu a pia hi.

¹⁰Tua ahih manin mi sawlin thongah Johan’ lutang a tansak hi.

¹¹Kuangdai khat tawh tua a lutang hong kipaipihin numei kiangah kipia a, tua numei in a nu kiangah a paipih hi.

¹²Tua ciangin Johan’ nungzuite hong pai uh a, a luang la-in a vui khit uh ciangin Jesuh kiangah hih thu a ko uh hi.

¹³Jesuh in tua thu a zak ciangin tua mun panin kihemkhia-in gamdaihna mun a zuan dingin gunkuang tawh a pai hi. Mite in ama paikhiatna thu a theih uh ciangin a khua ciat panun lei lam tawnin Jesuh nung hong zui uh hi.

¹⁴Tui gei-ah Jesuh a tun ciangin mihon tampi a na om a mu hi. Amaute hehpihhuai sa a, a cinate a damsak hi.

¹⁵Ni a tum kuan ciangin nungzuite in Jesuh kiangah, “Hih lai mun gamlak hi a, ni zong tum dektak ta hi. Hih kiimnai-a om khuate-ah mite va pai-in a an ding uh a lei nadingun sawlkhia in,” a ci uh hi.

¹⁶Ahi zongin Jesuh in, “Amaute a paikhiat ding kisam lo hi. Amaute’ nek ding bangkhat peuhpeuh pia un,” ci-in a dawn ciangin

¹⁷amaute in, “Anlum nga le ngasa tawn nih lobuang bangmah dang om lo hi,” a ci uh hi.

¹⁸Jesuh in, “Tuate hong paipih un,” ci-in a sawl khit ciangin,

¹⁹lopa tungah mihonte a tut nadingun a sawl hi. Tua ciangin anlum nga le ngasa tawn nih la-in vantung lam ento a, Pasian tungah a lungdamna a ko hi. Tua ciangin anlum balnenin a nungzuite pia a, a nungzuite in mihonte mai-ah a lui uh hi.

²⁰Mi khempeuh in ne-in a kham khit uh ciangin a khamvalte uh khawmkik uh a, paipel sawm le nih a dim hi.

²¹Tua an a ne mite, numei le naupang simloh, pasal cingteng mi tul nga bang a pha hi.

²²Tua ciangin Jesuh in mihonpite a ciahsak laitakin a nungzuite gunkuangah tuangsak a, tuili gal khatah a pai dingin ama mai-ah a ma paisak hi.

²³Mihonte a ciah khit ciangin thungen dingin mual tunglamah a paito hi. Khuamial ciangin Jesuh guakbek gamlakah om a,

²⁴ahi zongin nungzuite pen lei tawh gamlapi kihal khinta uh a, huih in amaute lehmut ahih manin gunkuang a kilokgawp hi.

²⁵Zingsang lam nai thum le nai guk kikal khawng ciangin a nungzuite kiang lam manawhin tui tungah Jesuh hong pai hi.

²⁶Ahi zongin nungzuite in tui tungah hong pai a muh uh ciangin lau mahmah uh a, “Sikha hi,” ci-in ngaihsun uh ahih manin a lau manun a awng uh hi.

²⁷Jesuh in amaute hopihpah a, “Na lungsim uh hangsak un. Keimah ka hi hi. Lau kei un,” a ci hi.

²⁸Tua ciangin Peter in, “Topa aw, nang na hihtakpi leh, tui tung tawnin nang kiangah kei zong hong paisak in,” a ci hi.

²⁹Jesuh in, “Hong pai in,” a cih ciangin Peter zong gunkuang tung panin kumkhia a, Jesuh’ omna lam manawhin tui tungah a pai hi.

³⁰Ahi zongin huihpi nung a muh ciangin lau a, tui sungah tum dektak ahih manin, “Topa aw, hong hon in,” a ci hi.

³¹Jesuh in zong a khut tawh Peter zamin len a, “Upna cingtaak lopa aw, bang ci-a hong tuaci muanlah na hi hiam?” a ci hi.

³²Gunkuang tungah a kahtoh khit uh ciangin huihpi nung a dai hi.

³³Tua ciangin gunkuang sungah a om nungzuite in Jesuh bia uh a, “Pasian’ Tapa taktak na hi hi,” ci-in a gen uh hi.

³⁴Tui a kantan khit uh ciangin Gennesaret gamah a tung uh hi.

³⁵Tua gam mite in Jesuh ahihlam a theih uh ciangin tua gam kiim khempeuhah thu zasak uh a, cina khempeuh Jesuh kiangah a hong paipih uh hi.

³⁶Ama puanmongteep beek a lawnkhak theih nadingun Jesuh kiangah ngen uh a, a puanmongteep a lawng mi khempeuh in damna a ngah uh hi.