Read Tedim Chin MATTHAI 15 Bible Online

MATTHAI 15 - Tedim Chin bible

MATTHAI 15

¹Tua ciangin Jerusalem khua panin Farisi mite le Thukham hilh siate, Jesuh kiangah hong pai uh a,

²“Bang hangin na nungzuite in tangtawng pek panin a hong kihilh suksuk i pupa ngeinate zui lo uh ahi hiam? Amaute in an a nek ma-un a ngeina ding bangin a khut uh sil masa lo uh hi,” a ci uh hi.

³Jesuh in, “Bang hangin note in na pupa ngeina uh zui-in, Pasian’ thupiakna palsat zawsop na hi uh hiam?

⁴Pasian in, ‘Na nu le na pa na zahtak in,’ ci a, tua banah, ‘A nu ahi a, a pa ahi zongin a gensiate in thahna thuak ding hi,’ ci lai hi.

⁵Ahi zongin note in, ‘Mi khatpeuh in a nu ahi a, a pa ahi zongin a huh theih nading na khat peuhpeuh a neih leh, tua na pen Pasian a’ ding hi, ci peuh leh, a nu le a pa piak kul nawn lo hi,’ ci-in thu na hilh uh hi.

⁶Tua ahih manin na pupa ngeina uh na zuihna uh hangin Pasian’ thu na palsat uh hi.

⁷Na tungthamun mihoih a kineihkhem mite aw, Isaiah in note’ thu a genna man mahmah hi. Tua a genna-ah,

⁸‘Hih mite in a kampi bek uh tawh kei hong zahtak bawl uh a, ahi zongin a lungsim taktak uh kei tawh kigamla hi.

⁹Mihingte’ bawltawm thukhamte, Pasian’ thukham zahin mite tungah hilh uh ahih manin kei hong biak hangun a kimanna om lo hi,’ ci hi,” ci-in a dawng hi.

¹⁰Tua ciangin Jesuh in ama kiangah mihonte sam a, “Ka thugen na ngai unla, hoihtakin na theitel un.

¹¹Kam sungah a tumsuk nate in mi ninsak lo a, kam sung panin a pusuak nate in mi a ninsak hizaw hi,” a ci hi.

¹²Tua ciangin nungzuite in Jesuh kiangah, “Farisi mite in hih na thugen a zak uh ciangin na a sak mahmahna thu uh na thei hiam?” a ci uh hi.

¹³Jesuh in, “Vantungah a om ka Pa’ suan ahi lo kung khempeuh kibotkhia ding hi.

¹⁴Hih mite lunghihmawh ngaihsut kei un. Amaute pen mittaw makai ahi uh hi. Mittaw khat in mittaw dang khat makaih leh a nihun hawkguam sungah kiakhawm ding uh hi,” ci-in a dawng hi.

¹⁵Ahi zongin Peter in Jesuh kiangah, “Hih thugentehna a khiatna kote hong hilh in,” a ci hi.

¹⁶Jesuh in, “Note nangawn in thei lo a, tel lo na hi uh hiam?

¹⁷Kam sungah a tumsukte pen gil sung tawnin tua panin paikhiasuak hi lo ahi hiam?

¹⁸Ahi zongin kam sung panin a pusuakte pen lungsim panin hong kipankhia hi a, hihte in mi ninsakthei hi.

¹⁹Bang hang hiam cih leh lungsim panin mi thahnopna, mi zi tawh mawhnopna, nungak tawh mawhnopna, guktakna, zuau genna, mi gensiatna, le ngaihsut hoih lo a tuamtuam hong piangkhia hi.

²⁰Hih bang nate in mi ninsak a, khut sil loin annekna in mi ninsak lo hi,” ci-in a dawng hi.

²¹Tua lai panin Jesuh paikhia a, Taia khuapi le Sidon khuapi gam sung tengah a zin hi.

²²Tua gamah a teng Kanaan nupi khat hong pai-in hong kiko a, “David’ suan, Topa aw, kei hong hehpih in. Ka tanu in dawi vei a, nasia mahmah hi,” ci-in a hong thum hi.

²³Ahi zongin Jesuh in kam khat beek paupih lo hi. Tua ciangin a nungzuite in Jesuh kiangah, “Hih nupi i nung zui-in kikoko ahih manin a ciah nadingin sawl in,” ci-in a thum uh hi.

²⁴Jesuh in, “Tuu bangin a mangthang Israel mite lak bekah kei hong kisawl hi,” ci-in a dawng hi.

²⁵Ahi zongin tua nupi hong pai-in Jesuh’ mai-ah khukdin a, “Topa aw, kei hong huh in,” a ci hi.

²⁶Jesuh in, “Tate’ annek ding laksakin ui khawite piak ding kilawm lo hi,” ci-in a dawng hi.

²⁷Nupi in, “Hi mah hi, Topa aw; a topa sabuai tung panin a kia annengte, ui khawite in zong ne buang hi lo ahi hiam?” a ci hi.

²⁸Tua ciangin Jesuh in tua nupi kiangah, “Nupi aw, na upna lian taktak hi. Na deihna bangin hong piang ding hi,” ci-in a dawn khit ciangin a tanu thakhatin a dampah hi.

²⁹Tua lai panin Jesuh paikhia-in Galilee Tuili kiimah a pai hi. Mualtung lamah kahto-in a tu hi.

³⁰Ama kiangah mihon tampi tak hong pai uh a, khebaite, khezawte, mittawte, a pau thei lote, le cina dang tampi, Jesuh kiangah hong koih uh hi. Jesuh in tuate khempeuh a damsak hi.

³¹A pau thei lote pau thei-in, khezawte damin, khebaite hoihtakin lam paithei-in, mittawte in khua a muh theihkikna thu mihonpite in a muh uh ciangin lamdangsa mahmah uh a, Israel mite’ Pasian a phat uh hi.

³²Tua ciangin Jesuh in a nungzuite sam a, “Kei kiangah hih mite ni thum bang hong omkhin uh a, amaute in annek ding nei nawn lo uh ahih manin hehpihhuai ka sa hi. Lamkalah cimawh kha ding uh ahih manin gilkialin ka ciahsak nuam kei hi,” a ci hi.

³³Nungzuite in, “Mihon hih zah i piak ding, hih gamlakah koi panin an ngah ding ihi hiam?” a ci uh hi.

³⁴Jesuh in, “Anlum bangzah nei na hi uh hiam?” a cih ciangin, “Lum sagih le ngasa neu tawm khat om hi,” a ci uh hi.

³⁵Tua ciangin Jesuh in leilakah mihonte a tut nadingin a sawl hi.

³⁶Anlum sagih le a ngasate la-in Pasian tungah lungdamna a koh khit ciangin balnenin a nungzuite tungah pia a, a nungzuite in mihonpite mai-ah a lui uh hi.

³⁷Mihonte in ne-in a kham khit uh ciangin a khamval a neng a themte tawmkik uh a, paipel lian sagih a dim hi.

³⁸Tua an a ne mite, numei le naupang simloh, pasal cingteng mihing tulli ahi hi.

³⁹Jesuh in mihonte a ciahsak khit ciangin gunkuang tungah tuangin Magadan gamah a pai hi.