Read Tedim Chin MATTHAI 21 Bible Online

MATTHAI 21 - Tedim Chin bible

MATTHAI 21

¹Jerusalem khuanai, Bethfage khua a omna Oliv Mual a tun uh ciangin Jesuh in a nungzuite nih ma sawl a,

²“Mai-a a om khua-ah va pai un. Na tun uh ciangin la nuta khau a kikhih na mu ding uh hi. Hong sut unla hong kai un.

³Mi khatpeuh in hong paupih leh, ‘Topa in deih hi,’ ci le-uhcin hong paisak pah ding hi,” ci-in a vaikhak hi.

⁴Hih thu pen kamsangpa’ thugenna a tun nadingin a piang ahi hi.

⁵Tua a genna-ah, “En un, na kumpipa uh hong pai hi. Kiniamkhiatna tawh lapi tung le lano tungah tuangin hong pai hi, ci-in Zion khuamite kiangah gen un,” a ci hi.

⁶Nungzui tegel zong Jesuh sawl bangin va pai uh hi.

⁷Amaute in a la nuta hong paipih uh a, a tungah a puante uh a phah khit uh ciangin Jesuh a tuang hi.

⁸Mihon tampite in ama pai nading lampi-ah a puante uh na phah uh a, adangte in nisuh hiangte satin lampi-ah a na phah uh hi.

⁹A mai-a pai mihonte le a nunga zui mihonte awng uh a, “David’ suan Jesuh in phatna ngah ta hen! Topa’ min tawh hong pai pa in thupha ngah ta hen! A sangpena om Pasian in phatna ngah ta hen!” a ci uh hi.

¹⁰Jerusalem khuasung a tun uh ciangin khuasung mi khempeuh gamlum henhan uh a, “Hih pa kua ahi hiam?” ci-in khatlekhat a kidong uh hi.

¹¹Mihonpite in, “Galilee gam Nazareth khua pana kamsang Jesuh hi,” ci-in a dawng uh hi.

¹²Tua ciangin Pasian biakna innpi huang sungah Jesuh lut a, tua sungah van zuak van lei-a a om mi khempeuh a hawlkhia hi. Sumkhek nasemin a om mite’ sabuai le vakhu zuakte’ tutnate a lumletsak gawp hi.

¹³Amaute kiangah, “Pasian in Lai Siangtho sungah, ‘Ka inn pen thungetna inn kici ding hi,’ ci napi-in, note in guktakna phualpi na suaksak uh hi,” a ci hi.

¹⁴Biakinn sung Jesuh kiangah mittawte le khebaite hong pai uh a, amah in amaute a damsak hi.

¹⁵Ahi zongin siampi liante le Thukham hilh siate in a nalamdang bawlte mu-in, biakinn sungah naupangte in, “David’ suan Jesuh in phatna ngah ta hen!” ci-in a kikona a zak uh ciangin heh uh ahih manin

¹⁶Jesuh kiangah, “Hih naupangte’ otna na za hiam?” ci-in a dong uh hi. Jesuh in, “Ka za hi. Lai Siangtho sungah, ‘Naungekte le naupangte’ kam tawh a cingtaak phatna na gen sak hi,’ a cihna thu sim ngei lo na hi uh hiam?” ci-in a dawng hi.

¹⁷Tua ciangin Jesuh in amaute nusia a, khuapi sung pan paikhia-in Bethany khua-ah a giak hi.

¹⁸A zingsang ciangin khuapi zuanin hong paikik laitakin Jesuh a gil a kial hi.

¹⁹Lam gei-ah theikung khat mu ahih manin a gei-ah va pai a, ahi zongin a teh simloh bangmah a mu kei hi. Jesuh in tua theikung kiangah, “Gah ngei nawn kei in!” a cih khit phetin a theikung a sipah hi.

²⁰Nungzuite in a muh uh ciangin lamdangsa uh ahih manin, “Bang hangin theikung tuaci sihpah ahi hiam?” a cih uh ciangin

²¹Jesuh in, “Note kiangah a mantak a kong genin-ah: Note in uplahna nei hetloin, upna taktak na neih nak-uhleh hih theikung tungah a piang bang na hih theih uh banah, hih mual kiang nangawnah, ‘Na omna pan paikhia-in tuipi sung kidenna in,’ ci le-uhcin na cih bangun piang ding hi.

²²Upna na neih nak-uhleh na nget peuhpeuh uh na ngah ding uh hi,” a ci hi.

²³Biakinn tual sungah Jesuh lutkik a, thuhilhin a om laitakin siampi liante le upate ama kiangah hong pai uh a, “Hih nate kua thu tawh bawl a, na bawl nading kua in aana hong pia ahi hiam?” ci-in a dot uh ciangin

²⁴Jesuh in, “Kei zong thu khat kong dong masa ding hi. Na hong dawn nak-uhleh kei zong kua thu tawh bawl cih ka hong gen ding hi.

²⁵Johan in tuiphum theih nading thu koi lai panin ngah ahi hiam? Pasian kiang panin thu ngah ahi hiam, ahih kei leh mihingte kiang panin thu ngah ahi hiam?” a ci hi. Amaute khatlekhat kiseel uh a, “Pasian kiang pan hi,” ci lehang, “Bang hangin um lo na hi uh hiam?” hong ci ding hi.

²⁶Ahi zongin, “Mihingte kiang pan hi,” ci leuleu lehang, mi khempeuh in Johan pen kamsang hi, ci-in ngaihsun uh ahih manin mihonte i kihta zel hi, kici uh hi.

²⁷Tua ahih ciangin Jesuh kiangah, “Ka thei kei uh hi,” ci-in a dawng uh hi. Jesuh in zong amaute kiangah, “Kei zong hih nate, kua thu tawh ka bawl cih ka hong gen kei ding hi,” a ci hi.

²⁸Tua ciangin Jesuh in amaute kiangah, “Note in bangci ngaihsut na hi uh hiam? Mi khat in tapa nih nei hi. A ta uzaw kiangah, ‘Ka ta aw, tuni-in leenggah lo-ah va kuan in,’ ci-in a sawl ciangin

²⁹amah in, ‘Kuan nuam kei ing,’ ci napi-in a lungsim kikheelin a kuankik hi.

³⁰Tua ciangin a ta nauzaw kiangah tua mah bangin va ci a, ‘Pa aw, va kuan mah ning,’ ci napi-in a kuan kei hi.

³¹Hih tapa nihte sung panin a koi bel pen a pa’ deih bangin gamta ahi hiam?” a ci hi. Amaute in, “A ta uzaw a ta hi,” a ci uh hi. Tua ciangin Jesuh in amaute kiangah, “Note kiangah a mantak a kong genin-ah: Pasian’ ukna sungah note sangin siahdongte le numei paktatte lut masazaw ding hi.

³²Bang hang hiam cih leh note kiangah Tuiphumpa Johan hong pai-in thuman lampi hong lak napi-in na um kei uh a, ahi zongin siahdongte le numei paktatte in a um uh hi. Hih thu na theih khit uh ciang nangawnin na lungsim uh na kheel nuam tuan kei uh a, na um kei veve uh hi.

³³“Thugentehna dang khat na ngai lai un. Mi khat in lo zuanin leenggui suan a, a kimkot umin, leenggah cil nading bawl a, a honna ding tausang khat a lam khit ciangin lo khawhlawhte khawhlawh sakin gam dangah a pai hi.

³⁴Leenggah min hun a tun ciangin ama ngah ding teng a va la dingin lo khawhlawhte kiangah a nasemte a paisak hi.

³⁵Lo khawhlawhte in a nasemte na manin khat na satgawp uh a, khat na thatin, khat suang tawh na denggawp uh hi.

³⁶Tua ciangin lo nei pa in a masa-a sangin nasem a tamzaw va paisak leuleu a, ahi zongin a masa-a mah bangin a nasemte a na bawlsia veve uh hi.

³⁷Tua khit ciangin ka tapa paisak leng na zahtak ding uh hi, ci-in ngaihsun ahih manin a tapa a paisak hi.

³⁸Ahi zongin lo khawhlawhte in a tapa a muh uh ciangin, ‘Hih pa pen a gamhluah ding pa ahi hi. Hong pai un; amah thatin a luah dingteng eite inla ni,’ a kici uh hi.

³⁹Tua ahih manin amah manin that uh a, lo nawlah a paai uh hi.

⁴⁰Tua ahih ciangin leenggah lo nei pa hong pai ciangin a lo khawhlawhte bangci bawl ding ahi hiam?” ci-in a dong hi.

⁴¹Amaute in, “Tua migilote thatgawp ding a, a hun hunin leenggah a pia ding lo khawhlawh dangte khosak ding hi,” a ci uh hi.

⁴²Jesuh in amaute kiangah, “Lai Siangtho sungah, ‘Innlamte in a nilkhiat suang pen innkiu suang bulpi suak khinta hi. Hih pen Topa’ bawl hi a, i muh ciangin lamdang i sa hi,’ ci-in a kigelhna sim ngei lo na hi uh hiam?

⁴³Tua ahih ciangin note kiangah kong genin-ah: Note pen Pasian hong ki-uksak nawn lo ding a, a kilawmin a gamta ding mite bek Pasian in uk ding hi.

⁴⁴Hih suang tungah a kia mi khempeuh kizan gawp ding a, mi khatpeuh tungah tua suang a kiat leh zong dengzan gawp ding hi,” a ci hi.

⁴⁵Siampi liante le Farisi mite in hih thugentehna a zak uh ciangin amaute a cihnopna-in a gen ahihlam a phawk uh hi.

⁴⁶Jesuh a man dingin kithawi uh a, ahi zongin mihonte in kamsang khatin ngaihsun uh ahih manin mihonte a kihtak manun a man ngam kei uh hi.