Read Tedim Chin MATTHAI 23 Bible Online

MATTHAI 23 - Tedim Chin bible

MATTHAI 23

¹Tua ciangin Jesuh in mihonte le a nungzuite kiangah thu gen a,

²“Thukham hilh siate le Farisi mite, Moses’ aana a nei-in thugente ahih manun,

³amaute’ gen khempeuh zui-in sem unla, ahi zongin amaute pen a gen bangun gamta lo uh ahih manin amaute’ gamtat bangin gamta kei un.

⁴Amaute in midangte tungah vangik mahmah suanin khihcip uh a, ahi zongin tua van a puakpih dingin a khutmeno khat nangawn uh a taangsak nuam kei uh hi.

⁵Amaute in a sepna khempeuh uh mite’ muhtheih dingin a hih se uh hi. Amaute in a talsuan le a banbulhte uh a gol pipi-in bawlin, a puanmongteep uh a sau theithei-in a bawl uh hi.

⁶Pawi sungah a om uh ciangin uliante’ tutna dinga a kibawl munah tunuam se uh a, kikhopna inn sungah zong uliante tutna tutphah nuampente tungah a tunuam diak uh hi.

⁷Mihon lakah mite in hopihin, ‘Sia aw,’ a cih ding uh a ut uh hi.

⁸Ahi zongin note pen, ‘Sia,’ na kicih ding uh hi lo hi. Sia khat bek na nei uh a, no adangte khempeuh unau khat na hi uh hi.

⁹Vantungah Pa khat bek nei na hih manun leitungah kuamah dang, Pa, na ci kei un.

¹⁰Topa dingin Khrih bek nei na hih manun note khatlekhat, ‘Topa,’ na kici kei un.

¹¹Note lakah a lianpen pa, na nasem uh hi ding hi.

¹²A kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi.

¹³“Mihoih a kineihkhem, no Thukham hilh siate le Farisi mite in gimna na thuak ding uh hi. Note in vantung ki-ukna sungah mite a lut theih loh nadingin kong na khakcip uh hi. Note lah na lutnuam kei uh a, a lutnuamte lah na lutsak kei uh hi.

¹⁴“Mihoih a kineihkhem, no Thukham hilh siate le Farisi mite in gimna na thuak ding uh hi. Meigong numeite tungah nuamtak sa-in a neihsa teng uh laksakin na zangmang uh a, mite in mihoih hong saktheih nading na deihna-un thu saupipi na ngen uh hi. Hih bangin na gamtatna uh hangin na gim thuak ding uh nasiazaw kan lai ding hi.

¹⁵“Mihoih a kineihkhem, no Thukham hilh siate le Farisi mite in gimna na thuak ding uh hi. Note in mi khat bek nangawn na ngah zawh nading uh na hanciamna un leitung tuitung lumletin khual na zin uh a, na ngahsunte uh zong note zah nihin a siahuai, hell khuk tung ding mi na suah uh hi.

¹⁶“Mittaw a bang lamhilhte aw, note in gimna na thuak ding uh hi. Bang hang hiam cih leh note in, ‘Mi khat biakinn tawh a kiciam leh phamawh lo a, ahi zongin biakinn sunga a om kham tawh a kiciam leh a kiciamna in len hi,’ na ci uh hi.

¹⁷Note pen mihai mittaw lamlak taktak na hi uh hi. Kham thupizaw ahi hiam, ahih kei leh tua kham a siangtho a suaksak biakinn thupizaw ahi hiam?

¹⁸Note in, ‘Mi khat, biakna tau tawh kiciam leh phamawh lo a, ahi zongin biakna tau tungah a kipia letsongte tawh a kiciam leh a kiciamna in len hi,’ na ci uh hi.

¹⁹Mittaw mite aw, a kipia nate thupizaw ahi hiam, ahih kei leh tua nate a siangtho a suaksak biakna tau thupizaw ahi hiam?

²⁰Tua ahih manin biakna tau tawh a kiciam mite pen a tunga a om nate khempeuh tawh zong a kiciam ahi hi.

²¹Biakinn tawh a kiciam mite pen a sungah a tengpa tawh zong a kiciam ahi hi.

²²Vantung tawh a kiciam mite zong Pasian’ kumpi tokhom tawh a kiciam hi a, tua tokhom tungah a tupa tawh zong a kiciam ahi hi.

²³“Mihoih a kineihkhem, no Thukham hilh siate le Farisi mite in gimna na thuak ding uh hi. Note in Pasian tungah lengmasel, masala, le kummin sing namtui a kipanin meh namtui nam khempeuh, sawm-ah-khat pia napi-in, thukham sungah a thupizaw ahi thutang, hehpihna, le thumante na don kei uh hi. Adangte nusia tuan loin hih thute na zuih ding uh ahi hi.

²⁴A makai ding hinapi-in, mittaw bangin bangmah tum loteng thupi ngaihsutin, a thupiteng na nusiakha uh a, tui tawh na dawnkhop khak loh nadingun thovai khaih napi-in kalaoh a nawmvalhkha tawh na kibang uh hi.

²⁵“Mihoih a kineihkhem, no Thukham hilh siate le Farisi mite in gimna na thuak ding uh hi. Note in hai le kuangte a pualam na siangsak uh a, ahi zongin tuate sungah, thatanghat thu le huaihamna tawh mi-a’ na suh uh nate a om hi.

²⁶A mittaw Farisi mite aw, a pualam zong a siangtho a suahtheih nadingin hai le kuang sunga a om nate a siangtho hisak phot un.

²⁷“Mihoih a kineihkhem, no Thukham hilh siate le Farisi mite in gimna na thuak ding uh hi. Note pen leikang tawh a kizut manin a pualam a hoih mahmah tawh kibang napi-in a sungah misi guh le a kihhuai nin nam khempeuh a omna hankhuk tawh na kibang uh hi.

²⁸Tua mah bangin note zong mite’ muhin mihoih mahmah bang napi-in na sung tawng taktak uhah mawhna le kineihkhemna bek a om hi.

²⁹“Mihoih a kineihkhem, no Thukham hilh siate le Farisi mite in gimna na thuak ding uh hi. Note in a sisa kamsangte’ han, a hoih mahmahin bawlin, a nuntakna uh a hoih, a sisate’ mualsuangte hoihtakin na zem uh a,

³⁰‘I pu i pate’ khan lai-in eite a om hi lehang, kamsangte a thah bangun eite in i that kei ding hi,’ na ci uh hi.

³¹Note pen kamsangte a that mite’ suanlekhakte mah na hih manun na zuaupi uh a gen na hi uh hi.

³²Tua ahih manin i pu i pate’ maban zomto vet un.

³³Gul a bang mite’ suanlekhak mite aw, hell khuk tun nading thukhenna panin a suakta dingin bangci-in kilamen thei na hi uh hiam?

³⁴Note kiangah kamsangte, mipilte, le siate ka hong paisak ding hi. Note in pawlkhatte thatin, pawl khatte singlamteh tungah khai-in, pawlkhatte na kikhopna uh inn sungah na sat ding uh a, khua khat pan khua khatah a banbanin na bawlsia ding uh hi.

³⁵Tua thu hangin, mawh nei lo Abel a kithah hun a kipanin biakinn le biakna tau kikal-a na thah uh, Barakhiah’ tapa Zekhariah hun ciang dongin, mawhna nei lo a kithat mite khempeuh hangin gimna note in na thuak ding uh hi.

³⁶Note kiangah kong genin-ah: Tuhuna mite tungah hih gimna hong tung takpi ding hi.

³⁷“Jerusalem, Jerusalem aw, kamsangte na that a, Pasian’ sawl kamtaite na denglum hi. Akpi in a kha tawh a note a huai mah bangin na mite ka huainuam tawntung a, ahi zongin na ut kei hi.

³⁸Tu-in na innte kisusiacip ding hi.

³⁹Nang kiangah kong genin-ah: ‘Topa’ min tawh a hong pai mipa in thupha ngah ta hen,’ na cih hun hong tun matengin kei nong mu nawn kei ding hi,” a ci hi.