Read Tedim Chin MATTHAI 24 Bible Online

MATTHAI 24 - Tedim Chin bible

MATTHAI 24

¹Biakinn panin Jesuh a paikhiat laitakin ama kiangah a nungzuite hong pai-in, tua biakinn a thupina zia a lak uh hi.

²Ahi zongin Jesuh in amaute kiangah, “Hihte khempeuh na mu khinta uh hi. Ke’n a mantak a kong genin-ah: Hih inn lamna-a a kiciang suangte a kithuapin a om nangawn a om nawn lo zah dongin kilawnkeek mang ding hi,” ci-in a dawng hi.

³Oliv Mual tungah Jesuh tu-in a om laitakin a nungzuite guak a tuamin hong pai uh a, “Hih thute cik ciangin hong piang ding a, nang na hong pai ding hun le hun bei nading bang lim hong om ding ahi hiam, hong gen in,” a ci uh hi.

⁴Jesuh in amaute kiangah, “Kidawm unla, mite’ khemsa-in ta kei un.

⁵Bang hang hiam cih leh keimah a kineih mi tampi hong pai ding a, ‘Kei, Khrih ka hi hi,’ ci-in mi tampi tak umkhialsak ding uh hi.

⁶A nai, a gamla-ah galkidona thu na za ding uh hi. Hihte a piang mah ding hi a, ahi zongin a bei nading hi nai lo ahih manin patau kei un.

⁷Gam khat le gam khat, kumpi khat le kumpi khat hong kido ding a, mun tuamtuamah kialpi hong tungin, zin hong ling ding hi.

⁸Hihte khempeuh pen gimna kipat nading hi pan hi.

⁹“Tua ciangin note hong kibawlsia-in hong kithat ding a, keima hangin Gentail mi khempeuh in note hong mudah ding uh hi.

¹⁰Tua hun ciangin mi tampi in a upna uh khahsuah ding a, khatlekhat kimudahin khatlekhat kilehhek ding uh hi.

¹¹Kamsang kineihkhem mi tampi hong piang ding a, mi tampi tak umkhialsak ding uh hi.

¹²Gitlohna khang mahmah ding ahih manin ki-itna hong kiam ding hi.

¹³Ahi zongin a bei dongin a thuakzote in hotkhiatna ngah ding uh hi.

¹⁴Tua ciangin mi khempeuh tungah teci ahi dingin Pasian’ hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi.

¹⁵“Tua ciangin kamsang Daniel in, ‘A lipkhaphuai zehphitna,’ ci-in a gen pen a siangtho munah hong om ciangin (hih lai a simte in Jesuh’ cihnopna thei ta un),

¹⁶Judea gam a om mite, mualtungah tai hen la,

¹⁷inn tungah a om mite zong, inn sungah van a la dingin lut nawn kei uh hen.

¹⁸Lo-ah a omte zong puan la dingin inn-ah ciah nawn kei hen.

¹⁹Tua hun laitakin naupaiite le naungek neite a dingin haksa mahmah ding hi.

²⁰Tua galtai hun pen phalbi laitak le Sabbath ni ahih khak loh nadingin thu na ngen un.

²¹Bang hang hiam cih leh leitung piancil a kipan tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.

²²Pasian in tua gimna hun a ni khiam lo hileh a suaktazo kuamah om lo ding hi. Ahi zongin ama teel mite a khualna-in a ni a khiam ding hi.

²³“Tua laitakin mi khatpeuh in, ‘Hih lai-ah Khrih om hi, hua lai-ah Khrih om hi,’ ci-in hong gen leh, um kei un.

²⁴Bang hang hiam cih leh Khrih a kineihkhemte le kamsang a kineihkhemte hong piang ding a, ahih zawh leh a teelsa mite nangawn a khem nadingun lim le nalamdang lianpipi hong bawl ding uh hi.

²⁵A hun ma-in hong genkholkhin ka hih manin limtakin kidawm un.

²⁶“Tua ahih kei leh zong mite in, ‘Gamlakah Khrih om hi,’ hong cih leh zong va paikha kei un. ‘Innsungah Khrih bu hi,’ hong cih leh zong umkha kei un.

²⁷Bang hang hiam cih leh Mihing Tapa hong pai ciangin khuaphialep in van mong khat panin mong khat dong a taanzaihsak mah bangin kitheikim ding hi.

²⁸“Sapul omna peuhah musane kikaikhawm ding hi.”

²⁹“Tua gimna hun a tunkhit phetin ni hong mialin kha hong taang nawn lo ding a, vantung panin aksite hong kia ding a, vantung a om nate a pai ngei-in pai thei loin lampialgawp ding hi.

³⁰Tua ciangin Mihing Tapa’ lim vantungah hong kilang ding hi. Tua ciangin leitung minam khempeuh dahin kap ding uh a, vangliatna le minthanna tawh meii lakah Mihing Tapa a hong pai a mu ding uh hi.

³¹Nakpi takin peengkul hong ging ding a, leitung mun khempeuhah a vantung mite hong paisakin, leimong khat pan mong khat dongin, a teelsa mite a kaikhawmsak ding hi.

³²Thei kung tung panin thu phawk un. Thei a hiang hong meengin a teh hong no ciangin khuakhal hun hong naita hi, ci-in na thei uh hi.

³³Tua mah bangin hih ka thugente khempeuh na muh uh ciangin Mihing Tapa hong tun ding hun hong nai mahmah ta hi, ci-in na thei un.

³⁴A mantak a kong genin-ah: Hih lai-a a om mite a sihkhit ma-in hih ka thugen khempeuh hong tung ding hi.

³⁵Van le lei a maimang zongin ka thugente maimang ngei lo ding hi.

³⁶Ahi zongin a ni le a nai hun ding pen kuamah in thei lo hi. Vantungah a om vantung mite ahi a, Tapa nangawn in ahi zongin thei lo a, Pa Pasian bek in thei hi.

³⁷Noah hun lai-in up hun lohpi khatin tuiciin a tun bangin Mihing Tapa zong up hun lohpi khatin hong pai ding hi.

³⁸Tuiciin a tun ma hunin, teembaw sungah Noah a tum ni hun ciang dong, mite in anne zune-in om uh a, mo kipi, mo kikha-in nuntak ngeina bangin om uh hi.

³⁹Tuiciin hong tungin tui in mi khempeuh a tupcip hun ciang dong, kuamah in bangmah a theih loh mah bangin Mihing Tapa hong pai ciangin zong kuamah in theikhol lo ding uh hi.

⁴⁰Tua hun laitakin lo a kuankhawm mi nih, khat kila-in khat kinusia ding hi.

⁴¹An a sukhawm numei nih, khat kila-in khat kinusia ding hi.

⁴²Tua ahih ciangin bang hunin na Topa uh hong pai ding cih thei lo na hih manun na pilvang un.

⁴³Ahi zongin na phawk ding uh thu in: Inn nei pa in zan laitakin guta pa a pai ding hun theikhol leh amah in na pangin a inn luhsak lo ding hi.

⁴⁴Tua ahih manin Mihing Tapa zong, note’ upmawh loh hun laitakin hong pai ding ahih manin note zong na kiging tawntung ta un.

⁴⁵“A pil a citak nasem i cih a bangcite ahi hiam? A naseppih dangte ukin a hun manmanin amaute’ nekzah ding ciat an a pia dingin a topa in a seh a nasempa ahi hi.

⁴⁶A topa hong ciah ciangin ama sawl bangin na semin a om a muhpa pen mi hampha mahmah khat ahi hi.

⁴⁷Ke’n kong genin-ah, ama neihsa khempeuh a uk dingin a topa in tua nasempa a koih ding hi.

⁴⁸Ahi zongin tua nasempa nasem hoih lo hi hen la, a lungsim sungah, ‘Ka topa hong ciahhak ding hi,’ ci-in,

⁴⁹a naseppih a lawmte satgawp hen la, zukham thei mite tawh anne zune-in na om leh,

⁵⁰a topa tung dingin a uploh ni hun khatpeuhin a topa hong tung ding a,

⁵¹a topa in nakpitakin gim pia-in, mihoih a kineihkhemte’ gimthuak dingteng thuaksak ding a, amah kapin a hagawi ding hi.