Read Tedim Chin MATTHAI 25 Bible Online

MATTHAI 25 - Tedim Chin bible

MATTHAI 25

¹“Tua hun ciangin vantung ki-ukna zia pen zinei thak pa a uap dingin a meivak uh tawh a pai nungak sawmte tawh kibang ding hi.

²Nungak sawmte sung panin nga pil uh a, nga hai uh hi.

³Tua a haite in a meivak sung uhah a tui thunthuah lopi-in pai uh a,

⁴ahi zongin a pil nungak ngate in a dimtakin thunin a pai uh hi.

⁵Zineipa hong tunghak ahih manin a vekpi-un lusu-in a ihmu uh hi.

⁶Ahi zongin zankim tak ciangin, ‘Zineipa hong tungta ding hi. Va dawn un,’ ci-in hong kiko hi.

⁷Tua nungakte zong tho-in a meivak uh hong puah ciat uh hi.

⁸Tua ciangin a haite in a pilte kiangah, ‘Ka mei uh mitta ahih manin na meitui uh hong hawm un,’ a cih ciangin

⁹a pilte in, ‘Hong hawm le ung ko a’ ding tawh kicing nawn lo ding ahih manin no a’ ding va leitawm zaw un,’ ci-in a dawng uh hi.

¹⁰Meitui lei dingin amaute a paikhiat kal sungin zineipa hong tung hi. A kigingsa-in a om nungakte in zineipa dawnin mopawi bawlna sungah a lutkhawm pah uh hi. Tua khit ciangin kong kikhak hi.

¹¹Tua khit ciangin nungak haite zong hong tung uh a, ‘Topa, Topa aw, kong hong hon in,’ a cih uh ciangin

¹²amah in, ‘Note ka hong thei het kei hi,’ na cihsan hi.”

¹³“Tua ahih manin a ni le a hun thei lo na hih manun na pilvang un.”

¹⁴“Inn panin khualzin dingin a paikhia mipa tawh zong kibang hi. Amah in a nasemte samin, a neihsateng a nasemte’ kep dingin a ap hi.

¹⁵Amau’ siamna tawh kizui-in khat tungah tulnga, khat tungah tulnih, khat tungah tulkhat a ap khit ciangin a zinkhia hi.

¹⁶Tul nga a ngah pa in sum bawlna-in zangpah a, a meet tulnga mah a ngahthuah hi.

¹⁷Tul nih a ngah pa in zong a meet tulnih mah a ngahthuah hi.

¹⁸Ahi zongin tulkhat a ngah pa in leisung to-in a topa’ sum a seelcip hi.

¹⁹“Hun sawtpi khit ciangin tua nasemte’ topa hong ciahkik a, a nasemte tawh a sum thu a siangsak uh hi.

²⁰Tul nga a ngah pa in a dang tulnga mah hong tawithuahin, ‘Topa aw, kei tungah tulnga nong ap hi. Hih lai-ah tulnga mah ka meetsak hi,’ hong cih ciangin

²¹a topa in, ‘Hoih mahmah hi; a hoih a citak nasempa aw, a tawmno na zekna-ah siam na hih manin a tampi tak ka hong zeksak ding hi. Hong pai in; kei tawh nuamsa khawm ni,’ a ci hi.

²²Tua ciangin tulnih a ngah pa zong hong pai-in, ‘Topa aw, kei tungah tulnih nong ap hi. Hih lai-ah tulnih mah ka na meetsak hi,’ hong cih ciangin

²³a topa in, ‘Hoih mahmah hi; a hoih a citak nasempa aw, a tawmno na zekna-ah siam na hih manin a tampi tak ka hong zeksak ding hi. Hong pai in; kei tawh nuamsa khawm ni,’ a ci hi.

²⁴Tul khat a ngah pa zong hong pai-in, ‘Topa aw, nang pen na sep loh na bawl lohnapi-ah na a deih, mi genhak mahmah na hihna ka hong thei hi.

²⁵Tua ahih manin ka hong kihta a, lei sungah na sum tulkhat ka seel hi. Tu-in hih lai-ah na sumzah mah om hi,’ a hong cih ciangin

²⁶a topa in, ‘A hoih lo, a thadah nasempa aw, ka sep loh ka bawl lohnapi-ah ka deihlam hong thei na hih leh,

²⁷sumkholna-ah ka sum na koihsak lecin hoih ding hi. Tua hileh tu-a ka hong tunkik ciangin a bulpi le a meet ka ngahkhawm ding hi.

²⁸Tua ahih manin ama tung panin a tulkhat laksak unla, tul sawm a nei pa tungah piathuah un.

²⁹Bang hang hiam cih leh a neisate kipiathuah ding a, hau semsem ding hi. Ahi zongin a nei lote tung panin a neihsa sunsun nangawn kilaksak ding hi.

³⁰Bangmahin a kimang lo hih nasempa ahihleh pualam khuamialna lakah lawnkhia un. Tua lai-ah kapin a hagawi ding hi,’ ci hi.

³¹“Mihing Tapa a vantung mite tawh Kumpi-in hong paikhawm uh ciangin a kumpi tokhom tungah hong tu ding hi.

³²Ama mai-ah leitung minam khempeuh hong kikhawm ding hi. Gancing pa in tuu le keelte a khen mah bangin mi khempeuh khen nihin hong koih ding hi.

³³Tuu a bang mite a taklamah koihin, keel a bang mite a veilamah koih ding hi.

³⁴Tua ciangin Kumpipa in a taklamah a om mite kiangah, ‘Ka Pa in thupha a piak mite aw, hong pai ta un. Leitung piancil a kipanin note a dingin a kibawlkholsa gamnuam hong luah un.

³⁵Bang hang hiam cih leh ka gilkial laitakin an nong pia uh a, ka dangtak laitakin tui nong pia uh a, khualmi ka hih laitakin zin nong do uh a,

³⁶puan nei loin ka om laitakin puan nong guan uh a, ka cinat laitakin nong veh uh a, ka thongkiat laitakin nong hawh uh hi,’ a ci ding hi.

³⁷Tua ciangin mihoihte in, ‘Topa aw, cikin na gilkial hong mu-in an hong pia a, cikin na dangtak hong mu-in tui hong pia ka hi uh hiam?

³⁸Cikin khualmi na hih laitakin hong mu-in zin hong do a, cikin puan nei lo na hih laitakin hong mu-in puan hong guan ka hi uh hiam?

³⁹Cikin cina na hih laitakin hong mu-in hong veh a, cikin thongkia na hih laitakin hong mu-in hong hawh ka hi uh hiam?’ a ci ding uh hi.

⁴⁰Tua ciangin Kumpipa in amaute kiangah, ‘Note kiangah kong genin-ah: Hih ka sanggamte a neupen khat nangawn na limbawl uh ciangin kei tungah a hong bawl na hi uh hi,’ ci-in a dawng ding hi.

⁴¹“Tua ciangin a veilamah a om mite kiangah, ‘Pasian in a samsiat mite aw, keima kiang panin paikhia unla, Dawimangpa le a nungzuite a dingin a kibawl meikuang tawntung sungah pai un.

⁴²Bang hang hiam cih leh ka gilkial laitakin an nong pia kei uh a, ka dangtak laitakin tui nong pia kei uh a,

⁴³khualmi ka hih laitakin zin nong do kei uh a, puan ka neih loh laitakin puan nong guan kei uh a, ka cinat laitakin nong veh kei uh a, ka thongkiat laitakin nong hawh kei uh hi,’ a ci ding hi.

⁴⁴Tua ciangin amaute in zong, ‘Topa aw, cikin na gilkial hong mu a, cikin na dangtak hong mu a, cikin khualmi na hih hong mu a, cikin na puan neih loh hong mu a, cikin na cinat hong mu a, cikin na thongkiat hong mu a, cikin kote in nang hong huh nuam lo ka hi uh hiam?’ a ci ding uh hi.

⁴⁵Tua ciangin amah in, ‘Note kiangah kong genin-ah: Hih mite a neupen khat nangawn na huh loh uh ciangin kei a hong huh lo na hi uh hi,’ ci-in a dawng ding hi.

⁴⁶Tua ahih ciangin tawntung gimthuakna sungah amaute pai ding uh a, mihoihte ahihleh nuntak tawntungna sungah lut ding uh hi,” a ci hi.