Read Tedim Chin MATTHAI 5 Bible Online

MATTHAI 5 - Tedim Chin bible

MATTHAI 5

¹Jesuh in tua bangin mihon tampi tak a muh ciangin mualtung lamah kahto-in tusuk a, a nungzuite zong ama nai-ah hong tu uh hi.

²Tua ciangin a kam ka-in amaute tungah thu hilh ding kipan a,

³“Kha thu lamah zawngkhal a kisate sungah vantung ki-ukna thu om ahih manin thupha ngah mi ahi uh hi.

⁴Dahin a thum a tau mite Pasian in amaute hehnem ding ahih manin thupha ngah mi ahi uh hi.

⁵A lungnem mite in Pasian’ ciamsa leitang ngah ding uh ahih manin thupha ngah mi ahi uh hi.

⁶Pasian’ deihteng sep ding a hanciamte Pasian in lungkimna ngahsak ding ahih manin thupha ngah mi ahi uh hi.

⁷Midang a hehpih mite tungah Pasian in hehpihna pia ding ahih manin thupha ngah mi ahi uh hi.

⁸Lungsim takpi tawh Pasian a zong mite in Pasian mu ding ahih manin thupha ngah mi ahi uh hi.

⁹Kilem nading deihin a hanciam mite in Pasian’ tate cihna ngah ding uh ahih manin thupha ngah mi ahi uh hi.

¹⁰Pasian’ deihna bangin a gamtat manin bawlsiatna a thuak mite vantung ki-ukna sungah a omte ahih manin thupha ngah mi ahi uh hi.

¹¹“Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi.

¹²Note a dingin vantungah thaman lianpi hong kikoih kholhsak ahih manin tua bang na tuah uh ciangin nuamin na lungdam un. Note’ hun ma-a kamsangte zong tua bangmahin a na kibawlsia ngei ahi hi.

¹³“Note pen leitung mite a dingin ci tawh na kibang uh hi. Ahi zongin ci a alna bei leh i alsakkik theih nading lampi om nawn lo hi. A kizat nading bangmah om nawn lo a, mite’ tuatcilgawp dingin kipaai lel hi.

¹⁴“Note pen leitung mite a dingin khuavak tawh na kibang uh hi. Mual dawnah a om khua kiseelcip thei lo hi.

¹⁵Mei a vak khit ciangin kuamah in lawh khuhlo hi. Meivakna mun sangah koihzaw a, innsung khempeuh a taangsak hi.

¹⁶Midangte in na gamtatna hoihte uh a muh ciangin vantungah a om na Pa uh min a phat theih nadingun mite mai-ah na gamtat hoihna uh khuavak bangin na kilangsak un.

¹⁷“Moses Thukham le kamsangte’ thuhilhnate a phiat dingin hong pai hi, ci-in hong ngaihsun kei un. Tuate a phiat dingin a hong pai hi loin, amaute’ hilhna a kicingsak dingin a hong pai ka hizaw hi.

¹⁸Hoihtakin na phawk ding uh thu panin: Van le lei a bei mateng, hih thukhamte a neupen khat nangawn’ deihna tangtung lopi-in mawkmai lo ding hi.

¹⁹Tua ahih manin hih thukhamte lakpan a neupente khat bek nangawn zuikha loin, midangte in zong a zuih loh nadingin a gen mite pen vantung ki-ukna sungah mi neupen hi ding uh hi. Ahi zongin hih thukhamte zui-in, midangte in zong a zuih nadingin a hilh mite pen vantung ki-ukna sungah milian hi ding uh hi.

²⁰Tua ahih manin Pasian’ deihna bangin gamtat nading thu-ah Thukham hilh siate le Farisi mite sangin na cihtakzawk uhleh vantung ki-ukna sungah a om thei bek ding na hi uh hi.

²¹“Tanglai mite tungah, ‘Mi that kei un. Mi that peuhmah in sihna thuak ding hi,’ ci-in a kigenna thu na zaksa uh ahi hi.

²²Ahi zongin ke’n note kiangah kong genin-ah: A sanggampa tungah a heh mi in thukhenna thuakkha thei ding hi. A sanggampa kiangah, ‘Bangmah a kimang lo,’ ci-in a ko bawl mi in uliante mai-ah thusitna thuak thei ding a, a sanggampa kiangah, ‘Mi hai,’ ci-in a simmawh mi in hell meikuang sungah khulna thuak thei ding hi.

²³Tua ahih manin Pasian tungah biakna a pia dingin biakna tau mai-ah na om laitakin na sanggamte khat peuhpeuh na tungah a lungkim lohna thu na phawk leh,

²⁴Pasian na biak nading nate, a biakna tau mai-ah nusia photin, pai-in na sanggampa tawh va kilem phot inla, tua khit ciangin hong paikikin Pasian biakna pia in.

²⁵Nangma tungah mi khatpeuh lungkim loin zumah hong khiat leh, zum na tun ma-un hun om lai-in na kilem pak nadingin hanciam in. Tua hikeileh zum na tun uh ciangin thukhente khutsung na tung ding a, thukhente in palikte khut sungah hong apin, palikte in thong sungah hong khum ding hi.

²⁶A mantakin kong genin-ah: Na liau sum na piak khit dong matengin thong sung panin na suakta ngei kei ding hi.

²⁷“‘Mi zi tungah na mawh kei ding hi,’ ci-in a kigenna thu na zaksa uh ahi hi.

²⁸Ahi zongin ke’n kong genin-ah: Mawhpih nopna lungsim tawh numei khat a en mi peuhmah in a lungsimah tua numei tawh a mawh ahi hi.

²⁹Tua ahih manin na mit taklam in na mawh nading hong piansak leh khelkhia inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi.

³⁰Na taklam khut in na mawh nading hong piansak leh sattan inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi.

³¹“‘A zi a ma mi peuhmah in a zi tungah makna lai pia ta hen,’ ci-in a kigenna zong na zak khitsa uh ahi hi.

³²Ahi zongin ke’n note kiangah kong genin-ah: Mi khat peuhmah in pasal dang tawh a mawhna hang lobuang, a zi a mak peuhmah a, a zi in pasal a neihkik leh mi tawh a mawh dingin a bawl a suak hi. Tua a kima numei a tenpihte, numei tawh a mawh mah ahi hi.

³³“Tanglai-in mite tungah, ‘Pasian tungah na kiciamnate uh pelh kei unla, ama tungah na kiciam bangun tungsak un,’ ci-in a kigenna na zaksa uh ahi hi.

³⁴Ahi zongin ke’n note kiangah kong genin-ah: Hih ding khat peuhpeuh na neih uh ciangin kiciamna na zang vet kei un. Kiciamna-in vantung na zang kei un - Pasian’ tokhom hi veve hi.

³⁵Leitung zong kiciamna-in na zang kei un - Pasian’ khengakna mah hi veve hi. Jerusalem khuapi zong kiciamna-in na zang kei un - Kumpi lian ahi Pasian’ khuapi mah hi veve hi.

³⁶Kiciamna-in na lutang zong na zang kei in. Na lu tunga om samzang khat bek nangawn a kangsa vomsak thei loin, a vom pen na kangsak thei kei hi.

³⁷Na gen peuhmah ahi ahihleh, ‘Hi,’ ci inla, ahi lo ahihleh, ‘Hilo,’ cihna tawh kicingsak in. Tua bang hi loin kiciamna kam na zat ciangin Dawimangpa tawh kizomin thuman lo na hih lamtak hong kilang hi.

³⁸“Note in, ‘Mittang khat tang ding mittang khat, ha khat tang ding ha khat,’ ci-in a kigenna na zaksa uh ahi hi.

³⁹Ahi zongin note kiangah ke’n kong genin-ah: A gilote na thukkik kei un. Mi khatpeuh in na paang taklam hong bet leh a langkhat zong na dawh lai zaw in.

⁴⁰Mi khatpeuh in na puansungsilh a ngahnop manin zumah hong khia-in hong laksak leh na puantungsilh zong na piathuah lai in.

⁴¹Galkapte khatpeuh in tai khat sung a van pua dingin hong sawl leh a valin tai khat sung mah na puaksak lai in.

⁴²Mi khat peuhpeuh in na khat peuhpeuh hong nget leh na pia inla, nang kiang panin na a hong leitawi mite na pia in.

⁴³“Note in, ‘Na vengte uh na it unla, na galte uh na mudah un,’ ci-in a kigenna thu na zaksa uh ahi hi.

⁴⁴Ahi zongin ke’n note kiangah kong genin-ah: Na galte uh na it unla, no hong bawlsiate a dingin thu na ngetsak un.

⁴⁵Tua hileh vantungah a om na Pa uh tate na hi thei ding uh hi. Bang hang hiam cih leh amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi.

⁴⁶Tua ahih manin no hong itte bek na it uhleh Pasian in bang thaman hong pia zenzen ding ahi hiam? Siahdongte nangawn in amau a itte it thei uh hi.

⁴⁷Na lawmte bek uh hopihin thupha na piak uhleh mi mawkmawkte sangin na hoihzawkna uh bang om ahi hiam? Gentail mite nangawn in tua bang ciang lel hih thei uh hi.

⁴⁸Tua ahih manin vantungah a om na Pa uh a cingtaak mah bangin note zong lungsim citakin na cingtaak nading uh na hanciam un.