Read Tedim Chin MATTHAI 7 Bible Online

MATTHAI 7 - Tedim Chin bible

MATTHAI 7

¹“Pasian in note hong mawhsak loh nadingin midangte va mawhsaksak nawn kei un.

²Bang hang hiam cih leh midangte’ thu na khenzia uh tawh kizui-in note tungah hong khen ding a, midangte tungah na zat uh ngeina mah note tungah hong zang ding hi.

³Bang hangin na lawmte’ mit sunga ninthem tang muhsak thei napi-in nangma mit sunga singluang tang phawk thei lo na hi hiam?

⁴Nangma mit sungah singluang a tang kimlai, bangci-in na lawmte kiangah, ‘Na mit sunga ninthem tang hong lakkhiatsak ning,’ ci thei ding na hi hiam?

⁵No a kineihkhem mite aw, note’ mit sunga singluang tang lakhia masa le-uhcin, na lawmte uh mit sunga ninthem tang na lakkhiat theihna dingun hoihtakin khua na mu thei pan ding uh hi.

⁶“Uite tungah a siangtho nate pia kei un. Pia le-uhcin hong pet zawsop ding hi. Vokte mai-ah na suangmanphate uh lot kei un. Lot le-uh cin sikcip lel ding uh hi.

⁷“Ngen un; na nget uhleh hong kipia ding hi. Zong un; na zon uh leh na mu ding uh hi. Kongkhak na kiu un; na kiuh uhleh hong kihon ding hi.

⁸Bang hang hiam na cih uhleh a ngente khempeuh in ngah ding uh a, a zongte khempeuh in mu ding uh a, a kiute khempeuh a’ ding kong kihon ding hi.

⁹Pa ahi note khatpeuh in na tate un anlum hong ngen leh suangtum pia ding na hi uh hiam?

¹⁰Ngasa hong ngen leh gul pia ding na hi uh hiam?

¹¹Note mihoih lo hinapi-in na tate uh tungah na hoih piak ding ngaihsun thei na hih uhleh vantungah a om na Pa un a ngen mite tungah na hoihte hong piazaw mahmah ding hi lo ahi hiam?

¹²Tua ahih manin note tungah hong kibawl ding na deih bangun midangte tungah na bawl un. Moses Thukhamte le kamsangte’ thuhilhnate pen hih mah a deihna ahi hi.

¹³“Kong kawcik bek tawnin lut un. Hell khuk tun nading kongvang pen lianin a lampi baih a, mi tampi in a zui uh hi.

¹⁴Ahi zongin nuntak tawntungna tun nading kong kawcikin a lampi haksa a, mi tawmno bek in a zuizo uh hi.

¹⁵“Kamsang taktak a hilote na muh uh ciangin limtakin kikem un. Amaute in a tungthamah tuu lim hong pua-in, ahi zongin a sungtawng taktak uh ngia hangsan bang ahi uh hi.

¹⁶Amaute’ gamtatna tawh amau’ pianzia na thei ding uh hi. Lingvom kung panin leenggah kilo ngei a, sialtalling kung panin theigah kilo ngei ahi hiam?

¹⁷Tua ahih manin singkung cidamte in gah limci gah a, singkung ginalote in gah ginalo gah uh hi.

¹⁸Singkung cidamte in gah ginalo gah ngei lo a, singkung ginalote in gah limci gah ngei lo hi.

¹⁹Gah limci a gah lo singkungte kiphukin meikhuk sungah kikhul hi.

²⁰Tua ahih manin amau’ gamtatna tawh amau’ pianzia na thei ding uh hi.

²¹“Kei kiangah, ‘Topa, Topa aw,’ hong ci mi khempeuh, vantung ki-ukna sungah lutthei kim lo ding uh a, vantungah a om ka Pa’ deihna bangin a gamtateng bek lutthei ding uh hi.

²²Tua ni ciangin mi tampi in kei kiangah, ‘Topa, Topa aw, nangma min tawh thu hilhin, nangma min tawh dawite hawlkhia-in, nangma min tawh nalamdang lian tampi bawl hi lo ka hi uh hiam?’ hong ci ding uh hi.

²³Tua ciangin keimah in amaute kiangah, ‘Note ka hong thei ngei kei hi. Siatna a gamta mite aw, kei kiang panin kihemkhia un,’ ka ci ding hi.

²⁴“Ka thuhilhna za-in a zui mi khempeuhte pen suang tungah a inn a lam mipil pa tawh kibang ding hi.

²⁵Guah hong zu-in, tui hong khangin, huihpi hong nung a, tua inn a nawkgawp uh hangin suang tungah kilam ahih manin kisia zo lo hi.

²⁶Hih ka thugente za napi-in a zui nuam lote pen sehnel tungah a inn a lam mihai pa tawh kibang ding hi.

²⁷Guah hong zu-in, tui hong khangin, huihpi hong nung a, tua inn a nawkgawp uh ciangin a kisia hi. Tua inn naksiat mahmah hi,” ci-in thu a gen hi.

²⁸Jesuh in hih a thugente a man khit ciangin, ama thugenna hangin mihonpite in lamdangsa mahmah uh hi.

²⁹Amah in Thukham hilh siate bangin thu gen loin, aana neite bangin thu a genzaw hi.