Read Tedim Chin MARKA 1 Bible Online

MARKA 1 - Tedim Chin bible

MARKA 1

¹Pasian’ Tapa Jesuh Khrih tawh kisai Lungdamna Thu hih bang ahi hi.

²Kamsang Isaiah Lai Siangtho sungah, “Nangma mai-ah ka kamtai pa ka sawl a, amah in na pai nading lampi a bawlkhol ding hi.

³Gam sungah mi khat kiko a, ‘Topa’ pai nading lampi bawl unla, a tot ding lampi tangsak un,’ ci hi,” ci-in a kigelhna tawh hong kipankhia hi.

⁴Tua mah bangin gam sungah Johan hong vak a, mawhna kisikin tui kiphum un; tua hileh na mawhna uh Pasian in hong maisak ding hi, ci-in thu a hilh hi.

⁵Johan’ thuhilhna a ngai dingin Jerusalem khua a kipan Judea gam sunga om mi khempeuhte a hong pai uh hi. Amaute in a mawhnate uh va pulak uh a, Jordan Gun sungah Johan in amaute a tuiphum hi.

⁶Johan in kalaoh mul kigan puan silhin, savun kawnggak tawh a kawng gak a, kauphe le gamlak khuaizu tawh a kivak hi.

⁷Amah in mite tungah thu hilh a, “Ka nungah hong pai ding pa pen kei sangin nakpitakin lianzaw a, kunin a khedap khau a sutsak ding nangawnin ka kilawmzo kei hi.

⁸Keimah in tui sungah note kong phum a, amah in Kha Siangtho sungah note hong phum ding hi,” a ci hi.

⁹Tua laitakin Galilee gam sunga om Nazareth khua panin Jesuh hong pai a, Jordan Gun sungah Johan in amah a tuiphum hi.

¹⁰Tui sung panin Jesuh a thawhkhiat khit phetin vantung kihongin, ama tungah vakhu bangin Kha Siangtho a hong kumsuk a mu hi.

¹¹Vantung panin aw khat hong ging a, “Nang pen ka it mahmah ka Tapa na hi a, nang tungah ka lungkim mahmah hi,” a ci hi.

¹²Thakhat thu-in Kha Siangtho in gamlakah Jesuh a paisak hi.

¹³Gamlakah ni sawmli sung om a, Satan in tua hun sungteng a ze-et hi. Tua lai-ah gamsa gilote zong om a, ahi zongin vantung mite hong pai-in amah huhin an a vak uh hi.

¹⁴Thong sungah Johan a kikhiat khit ciangin Galilee gam sungah Jesuh hong pai a, Pasian kiang panin hong pai Lungdamna Thuthak gen a,

¹⁵“A hunhoih hong tungta a, Pasian’ Uk ding hun hong kipanta hi. Na mawhna uh kisikkik unla, hih Lungdamna Thuthak um un,” ci-in a hilh hi.

¹⁶Galilee Tuili gei tawnin Jesuh a pai laitakin, Simon le a nau Andru, ngabengte ahih manun, ngen tawh nga khuhin a om a mu hi.

¹⁷Jesuh in amau tegel kiangah, “Kei hong zui un; nga mat bangin mi tampi a huaite kong suaksak ding hi,” a ci hi.

¹⁸Amau tegel in zong a ngen uh nusia-in Jesuh a zuipah uh hi.

¹⁹Tawmkhat a pai khit ciangin Zebedi’ tapa James le a nau Johan zong, a gunkuang tung uhah a ngen uh khui-in a om a mu leuleu hi.

²⁰Jesuh in amaute a muh phetin sampah a, amau tegel in zong a pa uh Zebedi le a thacialte uh nusia-in Jesuh’ nung a zui uh hi.

²¹Tua ciangin Kapernaum khua tung uh a, a Sabbath ni-in kikhopna inn sungah Jesuh pai-in thu hilh ding a kipan hi.

²²A thuhilhna a za mi khempeuh in ama thugenna zia hangin lamdang a sa uh hi. Amah in Thukham hilh siate bangin thu gen loin aana nei mite bangin thu a genzaw hi.

²³Tua laitakin kikhopna inn sungah dawivei mi khat hong lut a,

²⁴“Nazareth khuami Jesuh aw, kote tawh nang bang kisai ihi hiam? Kote a susia dingin hih lai-ah hong om na hi hiam? Pasian’ mi siangtho na hihlam kong thei hi,” ci-in a kiko hi.

²⁵Jesuh in, “Pau kei in; hih mipa sung panin paikhia in,” ci-in tua dawi tungah thu a pia hi.

²⁶Dawi gilo in tua mipa kongkaw sakin a linsakgawp khit ciangin nakpitakin awngin ama sung panin a paikhia hi.

²⁷Mi khempeuh in lamdangsa uh a, khatlekhat in, “A bangci thu ahi hiam? Bang thuthak hilh tuan ahi hiam? Hih mipa in dawi gilote thupiak nading aana nei a, dawi gilote in ama thu a mang uh hi,” ci-in a kikum uh hi.

²⁸Tua ahih ciangin hih Jesuh’ thu in Galilee gam sung khempeuh thakhatin a zelpak hi.

²⁹Tua ciangin kikhopna inn panin amaute paikhia-in Simon le a nau Andru’ inn-ah paisuakpah uh a, James le a nau Johan in zong a zui uh hi.

³⁰Simon’ sungnu nattunin lupna ngak a, Jesuh a tunphetin tua nu’ natna thu ama kiangah kigen hi.

³¹Amah zong tua nu kiangah pai a, a khutin lenin a phongto hi. A natna dam a, a zinte zong a dozo pah hi.

³²Tua nitak lam, ni a tum khit ciangin mite in Jesuh kiangah cina khempeuh le dawivei khempeuh a hong paipih uh hi.

³³Tua khuami khempeuh a inntualah hong kikhawm uh hi.

³⁴Jesuh in natna namkim a vei mi tampi damsak a, dawi tampi tak zong a hawlkhia hi. Dawite in Jesuh thei uh ahih manin, Jesuh in dawite thu gensak lo hi.

³⁵A zing ciang phalvak ma-in Jesuh tho-in gamdaihna mun khatah na pai-in thu a ngen hi.

³⁶Ahi zongin Simon le a lawmte in Jesuh a zong dingin nungzuih uh a,

³⁷amah a muh uh ciangin, “Mi khempeuh in nang hong kan uh hi,” a ci uh hi.

³⁸Ahih hangin Jesuh in, “Hih kiimnai-a om khuadangte-ah pai ni. Keima hong paina pen thuhilh ding ahih manin tua khuate-ah thu ka hilh ding hi,” a ci hi.

³⁹Tua ahih ciangin Galilee gam sung khempeuhah amah zin a, a kikhopna uh innte-ah thu hilhin dawite a hawlkhia hi.

⁴⁰Miphak khat Jesuh kiangah hong pai-in khukdin a, “Topa aw, hong damsak nuam peuh lecin nong damsak thei ding hi,” ci-in a thum hi.

⁴¹Jesuh in hehpihhuaisa ahih manin a khut zanin lawng a, “Nang kong damsak nuam hi,” a ci hi.

⁴²Thakhat thu-in a phaknatna bei-in a damsiang hi.

⁴³Tua ciangin Jesuh in khauhtakin ama tungah thu genin paikhiasak pah a,

⁴⁴“Hih thu kuama kiangah gen kei in. Siampipa kiangah paisuak pahin amah kivelsak in. Tua ciangin na damsiangna thu mi khempeuh in a theih nadingin Moses thupiaksa bangin biakpiakna bawl in,” a ci hi.

⁴⁵Ahih hangin a mipa paikhia-in a paina khempeuhah hih thupiang khempeuh gen belin a nei hi. Hih thu nakgen lua-in kitheithang gawp ahih manin, tua hun a kipanin mite’ theihin khua sungah Jesuh lut thei nawn lo hi. Tua ahih manin gamdaihna munah amah om a, mun khempeuh panin ama kiangah mite a hong pai uh hi.