Read Tedim Chin MARKA 13 Bible Online

MARKA 13 - Tedim Chin bible

MARKA 13

¹Biakinn panin Jesuh a pusuah laitakin a nungzuite khat in, “Sia aw, hih biakinnte bangzah takin lian a, a suangte bangzah takin gol ahi hiam?” a ci hi.

²Jesuh in, “Hih innte liansa-in thupi na sa mahmah hi. Ahi zongin hih innte lamna-a a kiciang suangte nih bek nangawn a kithuapna a om lo zah dongin a kiphelkek gawp hun hong tung ding hi,” ci-in a dawng hi.

³Biakinn galkhatah a om Oliv Mual tungah Jesuh tu-in a om laitakin Peter, James, Johan, le Andru hong pai-in amauteng guak a om laitakin,

⁴“Hih na thugen cik ciangin hong tung ding a, hih na thugente khempeuh hong tun ding ciangin bang lim hong om ding ahi hiam?” ci-in a dong uh hi.

⁵Jesuh in amaute kiangah, “Kuamah in hong khem zawh loh nadingin na kidawm un.

⁶Keima min pua-in mi tampi hong pai ding uh a, ‘Keimah, Khrih ka hi hi,’ ci-in mi tampi a khemzo ding uh hi.

⁷A gamla a galkidona thute le a nai-a galkidona huging na zak uh ciangin patau kei un. Tuate a piang ding mah hi a, hun beina ding hi nai lo hi.

⁸Minam khat le minam khat, kumpi khat le kumpi khat kido ding uh hi. Mun tuamtuamah zin hong ling ding a, kial zong hong tung ding hi. Hihte khempeuh pen gimna kipatna hi pan hi.

⁹“Limtakin kidawm un. Note hong kimanin thukhen zumah hong kipaipih ding a, kikhopna inn sungah zong hong kisat ding hi. Ukpite le kumpite mai-ah keima thu gen nading hun na ngah ding uh hi.

¹⁰Ahi zongin hun beina a tun ma-in mi khempeuh tungah Lungdamna Thu kihilh masa phot ding hi.

¹¹Note hong kimanin, thusitna a thuak dingin thukhen zumah hong kipaipih ciangin bang gen ding ihi hiam, ci-in ma lunghihmawh kei un. A thugen ding pen note hi loin Kha Siangtho ahih manin a hun tak ciangin na gen dingun a hong kisawl peuhpeuh na gen un.

¹²Unau khatlekhat a sih nadingun kikhia ding uh a, pa in a ta khia-in, ta in a nu le a pate khia-in a thatsak ding uh hi.

¹³Keima hangin Gentail mi khempeuh in note hong mudah ding uh a, ahi zongin a sih dongun a thuakzote in hotkhiatna a ngah ding uh hi.

¹⁴“Ama om loh nading pi-ah a lipkhaphuai zehphitna a hong om na muh uh ciangin (hih lai a simte in Jesuh’ cihnopna thei ta un!) Judea gam a om mite mualtungah tai un.

¹⁵A innkhum zangah a om laitak ahi khate zong, a kumsuk ciangin a neihsate a taipih dingin a la dingin a inn sungah lut nawn kei hen.

¹⁶Lolai-ah a om laitak ahi khate zong, a puan la dingin a inn uh zuan nawn kei hen.

¹⁷Tua laitakin nupi naupaiite le naungek neite a dingin haksa mahmah ding hi.

¹⁸Phalbi laitakin hih thu hong piankhak loh nadingin thu na ngen un.

¹⁹Bang hang hiam cih leh Pasian in leitung a piansak cil a kipanin tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.

²⁰Topa in tua gimna hun a ni khiam lo hileh a suaktazo kuamah om lo ding hi. Ahi zongin ama teel mite a khualna-in a ni a khiam hi.

²¹“Tua laitakin mi khatpeuh in, ‘Hih lai-ah Khrih om hi; hua lai-ah Khrih om hi,’ ci-in hong gen leh, um kei un.

²²Bang hang hiam cih leh Khrih kineihkhemte le kamsang kineihkhemte hong piang ding a, ahih zawhleh, a teelsa mite nangawn a khem nadingun lim le na lamdangte hong bawl ding uh hi.

²³Tua ahih manin kidawm un! A hun ma-in kong genkhin hi.

²⁴“Tua haksatna hun khit ciangin ni hong mial ding a, kha hong taang nawn lo ding hi.

²⁵Van panin aksite hong kia ding a, vantung a om nate a omngei bangin omthei nawn lo ding hi.

²⁶Tua ciangin Mihing Tapa, vangliatna le minthanna tawh meii lakah a hong paisuk kimu ding hi.

²⁷Tua ciangin leitung mun khempeuhah vantung mite sawl ding a, leimong khat pan mong khat kikalah a om a teel mite khempeuh a kaikhawmsak ding hi.

²⁸Thei kung tung pana thupiang panin thu thei un. A hiangte hong meeng a, a teh hong no ciangin khuakhal hun hong naita ding hi, ci-in na thei un.

²⁹Tua mah bangin hih thute hong tun ciangin amah hong naita a, hong tung dektak hi, ci-in na thei un.

³⁰Hih thu limtakin phawk un. Tu laitakin a nungta mi khempeuh a sihkhit ma-in hih thute hong tung ding hi.

³¹Van le lei mangthang ding a, ahi zongin ka thugente mangthang ngei lo ding hi.

³²“Ahi zongin tua ni le tua nai hun ding kuamah in thei lo hi. Vantunga om vantung mite ahi a, Tapa ahi keimah in ahi zongin ka thei kei a, ka Pa bek in a thei hi.

³³Tua hun ding thei lo na hih manun kikemin pilvang un.

³⁴Mi khat khualzin dingin paikhia a, a dinkhiat ding ciangin amau’ sep ding ciat a nasemte tungah tavuan pia a, kongcing pa in limtakin a cin ding a sawl mipa tawh kibang hi.

³⁵Inn nei pa, nitak ahi a, zankim ahi a, zingsang ak khuankuan ahi a, zingsang khuavak khit ahi zongin a bang hunin hong tung ding cih thei lo na hih manun ngakin na pilvang un.

³⁶Tua hikeileh amah thakhatin hong tungin na ihmut laitakun hong tuakkha ding hi.

³⁷Note tungah kong gen mah bangin mi khempeuh tungah zong, ‘Ngakin na pilvang un,’ ka ci hi,” a ci hi.